НИТХ-ийн ээлжит есдүгээр хуралдаан өнөөдөр болж “Ахмадын орон сууц-4000” хөтөлбөрийн төсөл, “Улаанбаатар орон сууц” сангийн журам, “Бага сургуулийн барилгын байршил тогтоох” зэрэг зургаан асуудал хэлэлцэх байлаа. Гэвч “Ахмадын орон сууц-4000” хөтөлбөрийн төслийн талаархи эхний асуудал дээр НИТХ дахь МАН-ын бүлэг санал нэгдэхгүй байгаагаас завсарлага авсан юм. Ахмадуудад ач буян санах мөрийн хөтөлбөрийн төсөлд тусгасан “өмчлөлд шилжүүлэхгүйгээр тодорхой хугацаанд” гэсэн агуулгыг “ахмад настанд хөнгөлөлттэй нөхцөлөөр өмчлалд нь шилжүүлэх орон сууцны фонд бүрдүүлэх” гэж өөрчлөх нь зүйтэй гэж МАН-ын бүлэг үзжээ.

Өөрөөр хэлбэл ахмадуудад орон сууцыг нь өмчлүүлж, орон сууцны асуудлыг нь эцэслэн шийдвэрлэж, үр хүүхэд, ач гучдаа үлдээх өмчтэй болгох саналтай байгаа юм байна. Харин НИТХ-ийн олонхийг буюу 40 гаруй гишүүний 26-г нь бүрдүүлдэг АН-ын бүлэг ахмад настаныг түрээсийн орон сууцаар хангаж, өөд болход нь байрыг нь хурааж аван дараачийн ахмад настанд түрээслэх бодлого барьж байгаа ажээ. НИТХ дахь МАН-ын бүлэг зөвхөн энэ асуудал дээр завсарлага аваад цааш үлдсэн таван асуудлыг хэлэлцье гэхэд Нийслэлийн Засаг дарга Э.Бат-Үүл болон АН-ын гишүүд “та нар ингэж байгаа бол бусад оруулсан асуудлыг ч татаж авна” хэмээн бухимдаж бусад асуудлуудыг хэлэлцхээс татгалзсан байна. Хэрвээ ахмадууд түрээсийн орон сууцанд орвол сард бараг 150 мянга орчим төгрөг төлөх юм байна.

60 настай уг байранд ороод 80 хүртэл амьдарлаа гэж бодход элбэг 40 ам метр байрны мөнгийг түрээст төлөх ажээ. НИТХ дахь МАН-ын бүлэг “хоёр нүүр гаргахгүй, хоёргүй сэтгэлээр ажиллана” гэж байгаа ч ийм зүйлтэй эвлэрэхгүй. Монгол хүний сүжиг сэжигт арай л таарахгүй хэмээн ярьж байна. Иймээс тэд ахмадуудаа түрээсийн байранд амьдруулах гэвэл хуралд оролцохгүй гэлээ. АН-ыханы зүгээс шүүмжлэлтэй хандан  завсарлага авч ажил унагаж, ажилд садаа боллоо гэцгээж байгаа ч яг үнэндээ дээрх хөтөлбөрийг баталлаа гэхэд маргааш хэрэгжүүлээд явах бололцоогүй байгаа ажээ.
Ахмадын хорооллыг барина гээд байгаа долдугаар хорооллын айлууд нь нүүж газраа чөлөөлөөгүй, дулаан цахилгаан, сургууль цэцэрлэгийн барилга муудсан, хомсдсон гээд гүйцэтгэл нэг тиймэрхүү байгаа ажээ. Уг хөтөлбөрт ахмадуудад зориулсан орон сууцыг дахин түрээслэхгүй, худалдахгүй, өв залгамжлахгүй, шилжүүлэхгүй гэж заажээ. Уг нь ахмадууд өөрийн гэсэн байртай болвол үр хүүхэддээ өвлүүлэх нь тэдний эрхийн асуудал юм. Нийслэлийн татвар төлөгчдийн “ясны хөлс” гэж ярьдаг жилдээ 150 тэрбум төгрөгийн татвар өнөөдөр гурав, дөрөв дахин өссөн. Ахмадууд маань өөрсдийн залуу нас, эрч хүч, билиг оюун, хөдөлмөр бүтээлээ төр нийгмийн бүтээн байгуулалт, хөгжил цэцэглэлтийн үйлсэд болон ирээдүй хойч үе болсон бидний төлөө зарцуулсаныг бид мартах ёсгүй.

Тэгэхээр мөнгө, сэтгэл гаргаад цөөхөн ахмадуудад байр бариад өгчихөд биднээс юу хорох вэ дээ. Мөн НИТХ-аас “Гэр хорооллын дахин төлөвлөлтийн үйл ажиллагааны журам” батлагдан тус ажлыг гүйцэтгэх барилгын компаниуд нь нүүлгэн шилжүүлэх иргэдийг түр байршуулах асуудлыг өөрсдөө шийдвэрлэх үүрэг хүлээж байгаа учир Зуун айлд баригдсан  “Түр суурьшуулах 300 айл”-ын орон сууцыг эхний ээлжинд ахмад настанд орон сууцны дэмжлэг үзүүлхэд зарцуулхаар зориулалтыг нь өөрчлөхийг НИТХ-ын МАН-ын бүлэг уриалаад байгаа ажээ. Нийслэлд өнөөдөр найман мянга орчим иргэн байр хүссэн өргөдөл өгсөн байдаг. Үүнээс З00 ахмад настаныг шигшээд Зуун айлд баригдсан байрнаас өгье гэхээр НИТХ-ийн АН-ыхан бас л хойрго хандсаар байгаа ажээ.