Н.Алтанхуягийг огцруулах гэсэн МАН-ын санаархал үр дүн муутай байлаа. Анхнаасаа бүтэхгүй гэдэгээ өөрсдөө ч мэдэж байсан. Учир нь тэдэнд Н.Алтанхуягийг дэнжигнүүлэх хүч байхгүйг олон нийт мэднэ. Гэхдээ л удаа дараа ноцтой үйлдэл үзүүлсэн Засгийн тэргүүнийг хөдөлгөх гэж үзэхгүй бол сөрөг хүчин байгаад ч яахав. МАН асуудлаа тавьж АН хамгаалаад л өнгөрлөө. Гэхдээ Н.Алтанхуягийн улайм цайм үйлдэл энэ намын нэр хүндийг улам л доош нь чангааж эхэлсэн. Учир нь Н.Алтанхуяг намынхаа рейтингийг өсгөдөг биш бууруулдаг дарга гэдэг нь олон үйлдлээр батлагдаж байгаа. АН-ынхан ийм даргадаа арга хэмжээ авахгүй бол ард түмэн ирэх сонгуулиар сайхан дүгнэлт хийгээд өгч мэднэ. 

Харин өчигдөр түүнийг огцруулах асуудлаар МАН-ынхан тун дажгүй санал асуулга явуулж байр сууриа илэрхийлсэн ч ичиж үхмээр муу дүгнэлт уншив. Засгийн огцруулах гэж байгаа сөрөг хүчний дүгнэлтийг бүлгийн дарга Н.Энхболд уншсан. Түүний үгэнд авах сайхан санаа даанч байсангүй. Социализмын үеийн даргынх шиг уйтгартай жижүүрийн өгүүлбэрүүдээр дүүрэн байлаа. Сөрөг хүчин энэ үгэндээ ач холбогдол өгсөнгүй. Олон талаас нь авч хэлэлцсэнгүй. Сурталчилгаа пиарийнх нь бага хаа ч байсан юм. Нөгөө уран цэцэн үгтэй залуус нь яагаад саналаа хэлсэнгүй вэ гэж бодогдохоор. Ийм дүгнэлт хийгээд, ийм үг уншаад байвал энэ засгийг яаж хөдөлгөхөв дээ. 

Харин эрх баригч бүлгийн дарга тун ноцтой саналууд хэлэв. Байр сууриа хамгаалж, өмнөх засагт өнөөгийн асуудал бэрхшээлээ сайн тохож чадав. Бас авлигалын асуудалд тулгуурлаж сөрөг хүчнийг хэд сайн “элэгдэж” өглөө. Тэрээр “Төсвийн хөрөнгийг хувьдаа завшсан, ах дүү, хамаатан садныхаа дансанд хэдэн тэрбумаар нь байршуулсан, гадаад руу гуйвуулсан, чанарын шаардлага хангахгүй бараа, материалыг хэдэн арван тэрбумаар нь нийлүүлсэн, ашигт малтмалын лицензийг хэдэн зуугаар нь арилжсан зэрэг гутамшигт гэмт үйлдлүүд ар араасаа хөвөрсөөр байна. Авлигын сүлжээ уул уурхайн том үйлдвэрүүд, төрийн албаны бүх шатанд бэхжиж, авлигын өртөг нэг тэрбум ам.долларт дөхөж байна” хэмээн дүгнэсэн юм. Энэ бол эрх баригч хүчний бүлгийн даргын байр суурь биш АН-ын байр суурь байж таарна. Угаасаа тэгж хэлж уншсан юм.  

Д.Эрдэнэбат даргын “авлигын өртөг нэг тэрбум ам.долларт дөхөж байна” гэж хэлсэн үг үнэхээр их анхаарал татаж байна. Тэр энэ тоог яаж гаргасан бэ? Яаж тооцож ийм тоо гаргаснаа сайн тайлбарлах хэрэгтэй болов. Ард түмэн сонирхож байна. Одоогийн яригдаад байгаа авлигалын бүх хэрэгүүдийн хүрээнд яригдаж байгаа мөнгөнүүдийн нийлбэрийг хэлээд байна уу? Эсвэл өөр утга, агуулгаар хэлсэн үү гэдэг нь дараагийн асуудал болон үлдлээ. Өөрөөр хэлбэл АН-ын бүлгийн дарга нэг тэрбум ам.долларын өртөгтэй авлигалын эзэд нь буюу хэн хэдэн тэрбумын авлигал авсан, өгснийг тайлагнах шинэ ажилтай болов. Ямар ч байсан эрх баригч хүчин авлигалын өртөг нэг тэрбум ам.долларт хүрснийг зарлав. 

Хэдхэн хоногийн дараа манай улсад ардчилсан орнуудын сайд нарын хурал болно. Уг хуралд 120 гаруй орны 1200 орчим төлөөлөгчид ирнэ гэж байгаа. Тэдний нэг ярианы сэдэв нь авлигалын асуудал. Энэ хуралаар тэд танай улсын авлигалын өртөг нэг тэрбум төгрөгт хүрлээ гэсэн үү? Яаж, ямар аргачлалаар бодоод ийм тоо гаргасан бэ гээд сонирхож асуух байх л даа. Тэд зүгээр сонирхож асуухгүй өөрийн орондоо очоод Монгол Улсын авлигалын өртөг нэг тэрбум ам.долларт хүрснийг ярина. Хэвлэл мэдээллийн хэрэгсэлээр зарлана. Манай улсын сурталчилгааны нэгэн өнцөг ийм байх нь гарцаагүй болов.