Манай улсад зохион байгуулагдах Ардчилсан орнуудын хамтын нийгэмлэгийн сайд нарын VII бага хурал өнөөдрөөс эхэлж байна. Өчигдөр зочдын хагас нь ирсэн. Энэ үйл явдал дэлхий дахины анхаарлын төвд байгаа. Учир нь уг хуралд улсын Ерөнхийлөгч нэг, дэд Ерөнхийлөгч хоёр, Ерөнхий сайд нэг, Шадар сайд дөрөв, бусад нь сайдын түвшний 104 орны 1215 төлөөлөгч ирэх юм. Мөн Нобелийн энхтайваны хоёр шагналтан, ардчилал хүний эрхийн төлөө цогтой тэмцэгчидээс гадна олон улсын томоохон 20 гаруй байгууллагын удирдлагууд ч төлөөлөгчдийн бүрэлдэхүүнд багтсан. Ийм чухал үйл явдлыг сурвалжилахаар дэлхийн 50 гаруй томоохон хэвлэлийн байгууллагын сэтгүүлчид ирлээ.

Манай улс ардчилсан орнуудын хамтын нийгэмлэгийг даргалж байгаагийн хувьд уг хурлыг эх орондоо зохион байгуулж байгаа билээ. Улс орны удирдлагаас эхлээд сөрөг хүчин, ард иргэд гээд бүгдээрээ л энэ хурлыг амжилттай явуулж дуусгахыг хичээж байна. Гэвч санаснаар хурал сайхан болж өнгөрөхгүй бололтой байна. Өчигдөрөөс МАХН-ынхан жагсаал цуглаандаа бэлтгэж байгаа мэдээлэлүүд гарсан. Үүнтэй зэрэгцэн шоронд хоригдон эмчилгээ хийлгэж байгаа МАХН-ын дарга, Ерөнхийлөгч асан Н.Энхбаяр өчигдөр оройноос эхлэн өлсөглөнгийн бэлтгэлээ базааж дууссан байна. Тэрээр энэ хурал болохыг мэдэж байсан учир эртнээс өлсөглөнд бэлтгэсэн тухай эх сурвалж мэдээллээ. Н.Энхбаяр өөрийгөө хэлмэгдсэн гэж үзсээр ирсэн бөгөөд шоронгоос тэмцлийн бүхий л арга хэлбэрийг явуулж байгааг бүгд мэднэ.  
Түүний хувьд олон улсын энэ хурлын үеэр өлсөглөн зарлаж, хэлмэгдсэнээ дэлхий дахинд зарлаж ойлгуулах сайхан боломж байж мэдэх юм. Тэгээд ч энэ хурлын зүг дэлхий нийт анхаарлаа хандуулчихсан байна. Өмнө түүнтэй олон удаагийн хурал цуглаанд хамт оролцож найз нөхөд болсон улс төрчидөөс нь ирнэ. Тэд мэдээж Н.Энхбаярыг асууж сураглана. Бас дэлхийн томоохон 50 гаруй байгууллагын төлөөлөгчид ирнэ. Тэд хурлаас гадна Монголын тухай нэвтрүүлэг, мэдээлэл цаг алдахгүй олон улсад түгээнэ. Энэ боложмийг ашиглаад Н.Энхбаяр Монгол Улсад ардчилал хумигдаж байгаа, хэлмэгдэл газар авсан,  ардчилагчид Засгийн эрхэнд гаруутаа өрсөлдөгч хүчнийхээ төлөөллийг хорьж цагдах болсон зэрэг олон асуудлыг хөндөхөөр төлөвлөсөн байж мэднэ. Гэхдээ түүнийг өлсөглөн зарлавал мэдээлэлүүд хэвлэлээр гарна. Олон улсын хэвлэлүүд шуугина. Бусад орны төлөөлөгчид асуудлыг анхаарлан сонсоно. Энэ алхам л түүний хувьд улс төрийн томоохон нүүдэл байж мэднэ. Түүнээс биш Н.Энхбаярыг эмнэлэгээс гаргахгүй нь тодорхой. З.Баянсэлэнгэ тэргүүтэй МАХН-ынхан жагсаж мэднэ. УИХ-ын гишүүн нь жагсаад эхлэвэл гадныханд эвгүйгээр л ойлгогдож мэдэх юм.
Уг хурлын нэг байнгын хороогоор иргэний нийгэм, хүний эрх, ардчилалын хөгжил төлөвшилд учирч буй гажуудлуудыг хөндөн ярина. Хаалт нээлтээс гадна энэ салбарын хуралд МАХН-ынхан ихээхэн анхаарч байгаа сураг гарлаа.
Ийнхүү Н.Энхбаяр шоронгоос ээлжит тоглолтоо удирдахаар бэлэн болжээ. Монголд ийм хэмжээний хурал болж буй нь манай улсын нэр хүнийг дэлхий дахинд өргөх үйл явц, ардчилалын хөгжилд хувь нэмэрээ оруулсны баталгаа гэж бид тодорхойлж байгаа. Гэвч “сайн юманд садаа бий” гээгчээр энэ сайхан үйл явдлыг бас өөр сонирхолтой үйл явдлууд ч чимэхээр болоод явчихлаа даа.