Гадаад харилцааны сайд Л.Болд 4 дүгээр сарын 27-ны өдөр Бүгд Найрамдах Серби Улсын Гадаад хэргийн сайд ноён Иван Мркич-ийг ГХЯ-нд хүлээн авч уулзаж, хоёр талын болон олон талын харилцаа, хамтын ажиллагааны асуудлаар санал солилцлоо.

Ноён Иван Мркич Ардчилсан орнуудын хамтын нийгэмлэгийг амжилттай даргалж, энэхүү байгууллагын үйл ажиллагааг өргөжүүлэхэд Монгол Улс үнэтэй хувь нэмэр оруулж буйг тэмдэглээд, Сайд нарын 7 дугаар бага хуралд амжилт хүсэв. Түүнчлэн тэрээр хоёр орны харилцаа, хамтын ажиллагааг идэвхжүүлэх хүсэл, эрмэлзэлтэйгээр Монгол Улсад ирснээ онцлоод  харилцан төлөөлөгчид солилцох, Элчин сайдын яамаа нээх, Консулын төлөөллийг бэхжүүлэх, иргэдийн харилцан зорчих нөхцлийг хөнгөвчлөх зэрэг томоохон алхмуудыг авч хэрэгжүүлэх бодолтой байгаагаа илэрхийлэв.

Сайд Л.Болд Улаанбаатар хотноо болж буй АОХН-ийн Сайд нарын 7 дугаар бага хуралд  хүрэлцэн ирж, өндөр түвшинд оролцож буйд Сербийн Засгийн газар болон Сербийн Гадаад хэргийн сайд Иван Мркич-д талархал илэрхийлээд, хоёр талын харилцаа, хамтын ажиллагааг идэвхжүүлэх, дипломат төлөөлөгчийн газруудаа харилцан нээх нь харилцаа, хамтын ажиллагаанд чухал алхам болохыг онцолж, иргэд харилцан зорчих нөхцлийг хөнгөвчлөх нь аялал жуулчлалыг хөгжүүлэх, бизнес эрхлэгчдийг дэмжих томоохон алхам болно хэмээн үзэж буйгаа тэмдэглэв. Мөн Монгол Улс нь Далайд гарцгүй, хөгжиж байгаа орнуудын олон улсын судалгааны төвийг байгуулахаар ажиллаж буйг тэмдэглэж, энэ чиглэлээр хамтран ажиллах боломж, бололцоо байгааг онцоллоо.