Төр засгийнхан үндэсний аж ахуйн нэгжүүдээ шалгалт нэрээр дарамталдаг байдал энэ засгийн үед эргэн ирж байх шиг байна. Учир нь МАK компанид 10 удаагийн шалгалтыг Өмнөговь аймгийн Засаг дарга Б.Бадраа оруулжээ. Мэдээж түүнийг Ерөнхий сайд Н.Алтанхуягийн даалгавараар ийм зүйл хийсэн гэж хардах боллоо. Үндэсний томоохон үйлдвэрлэгч МАK-ийг Засгийн газрын зүгээс ингэж дарамтлах хэд хэдэн шалтгаан бий гэж эх сурвалж мэдээллээ.
 
МАK-ийн Б.Нямтайширын хүү УИХ-ын гишүүн Н.Номтойбаяр Ерөнхий сайд Н.Алтанхуягийг огцруулахаар ихээхэн эрчимтэй хөдлөх болсон нь үүний шалтаг болсон бололтой. Нэг бус удаа Н.Номтойбаяр гишүүн Н.Алтанхуяг сайдтай ам муруйсан. Ингэх ч шалтгаан байжээ. Анх энэ хоёрын харилцаа энгийн л байж. Түнжин хагарах шалтгаан анх Дорнод аймгийн Засаг даргыг томилохоос эхэлжээ.

Дорнод аймгаас сонгогдсон гишүүний хувьд Н.Номтойбаяр аймгийн ИТХ-ын олонхийн санал авсан залууг батламжлуулахаар олон удаа Ерөнхий сайд Н.Алтанхуягт хандсан байдаг. Уулзах хүсэлтээ тавьсан ч маргааш, нөгөөдөр гэж бултсаар нэг ч удаа уулзаагүй гэдэг. Тэр ч бүү хэл Дорнод аймгийн ИТХ-ын шийдвэрийг хууль бус гэсээр гурван удаа санал хураалт явуулсан сураг гардаг. Энэ гурван санал хураалтанд МАН-ын залуу л өнгөлөөд гараад байж. Түүнийг нь Ерөнхий сайд Н.Алтанхуягт уламжилахаар батламжилахаас татгалзаад байж. Тэгж байгаад шал өөр хүнийг Засаг даргаар тавьчихаж. Үүнд нь Н.Номтойбаяр гишүүн дургүйцэж Н.Алтанхуяг сайдтай сөргөлдөж эхэлжээ. Энэ хоёрын хэрүүл, тэмцэл ингэж тавигдсан юм.

Тэгээд МАН-ын бүлгийн хуралд Ерөнхий сайд Н.Алтанхуяг ирж мэдээлэл хийхэд Н.Номтойбаяр аймгийнхаа асуудлыг хөндөж яагаад Засаг даргыг нь батламжлаагүйг олон дахин асуусан. Олон дахин асуухад нь Н.Алтанхуяг бараг л хариулт өгч чадахгүй байсан. Энэ бичлэг интернэтээр цацагдсаныг олон хүн үзсэн. Тэр ч бүү хэл МАН-ын хурал дээр хуулиа биелүүлэхийг шаардсан Н.Номтойбаярыг “Чи хэзээ хууль хэрэгжүүлдэг болсон юм” гэсэн үгээр Н.Алтанхуяг утсан. Үүнд нь дургүйцсэн залуу гишүүн Н.Алтанхуягийг сая огцруулах асуудлыг нилээд идэвхитэй хөөцөлдлөө.

Гэтэл Н.Алтанхуяг түүнд томоохон бэлэг барьсан сураг газар авч байна. Тэрээр Өмнөговь аймгийн Засаг дарга Б.Бадраагаар дамжуулан МАK-д 10 удаа шалгалт оруулах чиглэлийг өгсөн бололтой байдаг. Шалгалт оруулах болгондоо тус компанийн үйл ажиллагааг хаана гэж сүрдүүлдэг байна. Мэдээж өмнө найрсаг харилцаатай байсан Б.Бадраа дарга гэнэт үндэсний томоохон аж ахуйн нэгжид ингэж дарамт учруулж чадахгүй. Энэ бол дээрээсээ буюу Н.Алтанхуягийн даалгаварыг аваад ингэж хөдөлж байгаа гэж учир мэдэх хүмүүс тайлбарлаж байна.

Хэрэв МАK-ийг хаах гэсэн энэ үйлдэл болоод 10 удаагийн шалгалт нь үнэн бол арай л дэндэж байна гэсэн үг юм. Хэзээ Монгол Улсад үндэсний үйлдвэрлэлүүдэд хэдхэн сарын хугацаанд 10 удаагийн шалгалт оруулж дарамталж байлаа даа. Энэ бол Засгийн зүгээс үндэснийхээ үйлдвэрүүдэд дарамт үзүүлж байгаагийн нэг илрэл. Маргаашнаас эхлээд Н.Алтанхуягийг огцруулах асуудлыг хөндсөн гишүүдийн хувь эзэмшдэг компаниуд руу ээлж дараалан шалгалт оруулж дарамтлахад гайхах юмгүй болж. Энэ нь цаашдаа хавтгайраад МАН-ын жирийн гишүүдийн аж ахуйн нэгжүүдийг шалгах хүртлээ өргөжинө. Бүр цаашилбал үндэсний бусад аж ахуйн нэгжүүд рүү хальтран орох эхлэл болно гэж эх сурвалж тайлбарлалаа.

Үнэхээр болохгүй бүтэхгүй байгааг нь хэлж сануулах гэсний төлөө ийм арга хэмжээ авч байгаа нь үнэн бол энэ улсад дарангуйлал бүрэн утгаараа эргэн ирж байна гэсэн үг юм. Ардчилалын хурал хийгээд үлгэр жишээ засаглалтай гээд зарлаад буй манай улсад ардчилал нь ингэж дарангуйлал, айлган сүрдүүлэлт болон хувирч байна.