МАХН-ын дарга Н.Энхбаярын биеийн байдал эмч нарын санааг ихээхэн зовоож байна. Түүнийг эмчлэх нэмэлт баг гарсан. Гэсэн ч тэд Н.Энхбаярын биеийг дээрдүүлнэ гэдэгтээ итгэл муутай байгаа гэж эх сурвалж мэдээлэв. Учир нь түүний бие өдөрөөс өдөрт ихэд дордож байгаа аж.

Тэгээд ч тэрээр манай улсад болж буй ардчилсан орнуудын хамтын нийгэмлэгийн үеэр “Шударга ёсны төлөө”, “Би улс төрийн хэлмэгдсэн хоригдол” гэсэн уриан дор өлсөглөн зарлахаар бэлтгэж хоолоо бага идэж биеэ дасгаж байсан нь эрүүл мэндэд нь ихээхэн нэрмээс болжээ. Хэрэв ЗГХЭГ-ын дарга Ч.Сайханбилэг түүнтэй уулзаж өлсөглөнг нь зогсоогоогүй бол ухаан алдалтаас ч илүү муу юм болох байсан гэнэ.

Н.Энхбаярыг ухаан алдаж бие нь муудахад хоёрдугаар эмнэлэгийн гадаа намынх нь гишүүдээс гадна УИХ-ын гишүүн О.Баасанхүү, O.Баянсэлэнгэ тэргүүтнүүд очсон. Хамгийн сонирхолтой нь түүнийг ухаан алдаж унахад Шадар сайд Д.Тэрбишдагва, Сангийн сайд Ч.Улаан хоёр очоогүй гэж яригдаж байна. Тэднийг даргыгаа бие нь муудахад очихгүй байгаад олон хүн гайхаж байна. Тэд саяхан л Н.Энхбаярын дэмжлэгээр гарч ирж, түүний төлөө тэмцэнэ гэж байсан итгэл нь алдарч эхэлж байгаа бололтой. Тэгээд ч өмнө О.Цолмонг уулзах гэхээр Д.Тэрбишдагва, Ч.Улаан хоёр зугтаад хөдөө явчихсан. Түүнийг нь мэдсэн О.Цолмон төрийн ордонд орж ирээд ихэд уйлсан тухай хэвлэлээр баахан шуугисан. Ийнхүү даргыгаа ухаан алдахад нь очихгүй байгаа нь үнэн бол Д.Тэрбишдагва, Ч.Улаан хоёр нэг мөсөн Н.Энхбаяраас салахаар шийдсэн бололтой.

Энэ хоёр эрхэмийг саяхан Н.Алтанхуягийг огцруулах асуудлыг хөндсөн МАН-ынхан уулзах гэхэд өмнөөс нь тавласан шинжтэй үг хэлээд хөдөлж өгөөгүй гэдэг. Төрийн өндөр албан тушаалд хүрсэн энэ хоёр сайд эхлээд уугуул намаасаа урвасан, дараа нь албан тушаалд томилуулсан даргынхаа эхнэрээс урвасан. Хамгийн сүүлд даргаасаа урваж байгаа сурагтай. Тэдний энэ “эрхэм үйдэл”-ийг зөв шийдвэр гэж хэлэх хүн олон л гарахгүй болов уу даа.

Н.Энхбаяр даргыг ухаан алдсан явдлыг бас өргөдөлийг нь ээлжит шоу гэж олон хүн дүгнэсэн байна. Ухаан алдсан явдал нь тэр хүнээс өөрөөс нь хамаарахгүй болсон явдал. Харин түүний ялаас чөлөөлөгдөхийг хүссэн өргөдөл нь бодож бичсэн гэхээсээ илүү ардчилсан орнуудын анхаарлыг татах гэсэн үйлдэл гэж ойлгож болох юм.

Ийнхүү ардчилсан орнуудын хурлын үеэр гадныханы анхаарлыг Н.Энхбаяр ээлжит хэлбэрээрээ татаж чадлаа. Үр дүн нь ямар байхыг урьдчилан хэлэх боломгүй. Зарим хүмүүс улсаа муухай харагдууллаа гэж дүгнэж байх шиг байна. Харин түүний намын зарим төлөөлөл улсаа сайхан харагдуулах гээд хэлмэгдүүлэлтийг газар авахуулаад байж болохгүй гэсэн тайлбарыг гаргалаа.