Энэ долоо хоногт МАН-ын бага хурал болох гэж байна. Уг хурлаар Ерөнхийлөгчийн сонгуульд нэр дэвших хүний нэр тодорно. Олон жил улс төрд босоо явсан энэ нам жаахан гундуухан байгаа. Тиймээс энэ удаа Ц.Элбэгдоржтой халз үзчих улс төрч ховор гэж шүүмжлүүлэх болсон. Харин өөрсдөө Ө.Энхтүвшин, Б.Бат-Эрдэнэ Д.Оюунхорол гэсэн гурван нэр дээр тунаж үлдсэн гэж зарлаад байгаа.

Эдгээрээс Д.Оюунхорол нэр дэвшихэд бэлэн гэдгээ ил тодоор зарлаж, намын даргадаа холбооныхоо эмэгтэйчүүдээр өргөх бичиг бариулчихсан. Харин нөгөө хоёр нь эр хүний ноён нуруу, зангараг заагаад огт чимээгүй сууж байна. Өөр нэгэн эх сурвалжийн хэлж буйгаар Б.Бат-Эрдэнэ аварга нэр дэвших гээд их л тэвдүү яваа сурагтай. Харин Ө.Энхтүвшин намын дарга учраас хамаагүй сэвээд байж болохгүй байгаа бололтой.

Ийнхүү МАН-аас нэр дэвших сайн дурынхан энэ хагас сайн өдөр болох бага хурлаа хүлээгээд догдолж байхад өөр нэгэн хүнийг хөндлөнгөөс оруулж ирнэ  гэж эх сурвалж мэдээллээ.

МАН-ын гол стратегич гэдгээрээ алдарсан бас сонгуулийн менежер хийсэн болгондоо ялалт авч залардаг хүн бол С.Баяр юм. Энэ эрхэмийг нэр дэвшихээр хөдөлгөөнд орж эхэлсэн гэж хаваржингаа л шуугисан. Гэжтэл чулуу хөөлгөж байжээ. Тэр гартаа тас атгасан хөзрийн тамгаа дэлгэж эхэлсэн байна. Түүний Ерөнхийлөгчид дэвшүүлэхээр битүү сойсон нууцлаг морь бол УИХ-дахь МАН-ын бүлгийн дарга Н.Энхболд гэнэ. Тун магадалтай хувилбар. Ноён нуруутай, тулхтай гэгддэг нэг бус удаа Ерөнхий сайдад яригдаж байсан эрхэм. С.Баяртай хэзээнээсээ андын сайн харилцаатай гэж МАН-ынхан ярилцаж байна.

С.Баяр андыгаа дэвшүүлэхийн тулд У.Хүрэлсүх, C.Батболд хоёртой үндсэндээ ойлголцсон гэж эх сурвалж мэдээллээ. Дээр нь МАН-ын бага хуралд ихээхэн нөлөөтэй Н.Багабанди ч гэсэн Н.Энхболдыг дэмжих магадал тун өндөр юм. Гэхдээ тэрээр ихээхэн хүнд байдал байгаад сурагтай. Учир нь түүний улс төрд дэмждэг Д.Оюунхорол нь нэр дэвшинэ гэж зүтгээд эхэлсэн. Н.Энхболд ч Завхан аймгийнх. Үндсэндээ Ерөнхийлөгч төрүүлдэг гэгддэг Завханыхан хоёр хуваагдах нь гарцаагүй болж. Энэ байдлаас авч үзвэл Н.Энхболд нэр дэвших тун их магадлалтай юм. Учир нь МАН-ын Бага хурал дахь 200 гаруй гишүүдийн тал хувь буюу С.Батболд, У.Хүрэлсүхийн фракцийн дэмжлэгийг авна. Дээр нь С.Баярын цөөн хүн нэмэгдэнэ. Бараг л аваад заларч дээ.

Харин Н.Энхболдын эсрэг үзэх хүчтэй хүн бол намын дарга Ө.Энхтүвшин. Түүнийг өөрийнх нь баг дэмжинэ. Бас жигүүр хөдөлгөөнд харьяалагдаж явсан нөхөд хүчээ өгнө. Хамгийн гол тулгуур болж саналыг нь хайрцаглаж өгөх хүн бол М.Энхболд гэнэ. М.Энхболд бага хуралдаа олон гишүүдтэй. Ингээд харьцааг харвал Н.Энхболдод тун дөхөж очно.

Энэхүү хоёр эрхэмийн том өрсөлдөөн дунд Б.Бат-Эрдэнэ аварга, Д.Оюунхорол гишүүн хоёр цөөхөн санал авч эхний шатны санал асуулгаар өрсөлдөөнөө өндөрлөх магадлалтай юм. Хэрэв байдал ингэж эргэвэл Д.Оюунхоролын дэмжигчид Н.Энхболдыг, Б.Бат-Эрдэнэ аваргын фенүүд Ө.Энхтүвшинийг дэмжих магадлал өндөртэй гэж яригдаж байна.

Ийнхүү МАН-ын бага хурал намуухан биш халуухан болох бололтой. Нэр дэвших өрсөлдөөнд шинэ хүмүүс орж ирж байна. Нэр дэвших нь бараг гарцаагүй гэгдэж байгаа Н.Энхболд, Ө.Энхтүвшин хоёрыг олон нийт тулхтай ноён нуруутай, туршлагатай парламентчид, өндөр албан тушаал хашиж байсан гэдгээр нь илүү сайн мэднэ. МАН-ын Ерөнхийлөгчийн сонгуульд нэр дэвшигчдийн зураг ингэж зурагдаж байна.