Өнөөдөр УИХ дахь намын бүлгүүд хуралдсан. Тэгвэл МАН-ын бүлгээс сэтгүүлчдэд мэдээлэл хийлээ. Тэд өнөөдрийн хуралдаанаараа өнгөрсөн засгийн үед Монгол Улсын нийгэм, эдийн засгийг хэрхэн хөгжүүлж ирсэн, болон Шинэчлэлийн Засгийн газрын найман сарын хугацаанд хийсэн ажлыг танилцуулахаар болжээ.. Энэхүү ажлын хэсгийг ажлыг Сү.Батболд гишүүн ахлаж ажиллах юм. Түүнчлэн МҮОНРТ-ийн 2012 оны болон өнөөдрийг хүртэлх үйл ажиллагаа нь ямар үр дүнтэй байсныг мэдээлэхээр болсон байна. Мөн удахгүй болох Ерөнхийлөгчийн сонгуульд төрийн албан хаагчид оролцоно. Гэтэл хэлтэс, албадын дарга нар түр орлон гүйцэтгэгчид байгаа тул Ерөнхийлөгчийн сонгуульд хариуцлагагүй хандаж байна хэмээн бүлгийн гишүүд үзжээ.

Ерөнхий сайд Н.Алтанхуяг өөрийн мэдэлдээ зарцуулахаар 50 тэрбум төгрөгийг төсөвлөсөн. Тэгвэл үүнийхээ задаргааг тогтоолоор батлахаар оруулж ирж байгааг МАН-ын бүлэг эсэргүүцэж байгаа юм байна. Учир нь төсөвт суулгаж, УИХ-аар батлуулдаг байтал ингэж оруулж ирж байгаа нь Төсвийн хуулийг зөрчсөн үйлдэл болох аж. Нөгөөтэйгүүр МАН-ын гишүүд “Манай улс хоёр хуулийн төсөлтэй болсон. Энэ нь УИХ-ын хяналтгүй үйл ажиллагаанаас нөлөөлж байгаа замбараагүй үйлдэл” гэж үзжээ. Мөн МАН-ын гишүүдийг байнгын хороонд тэнцэртэй хуваарилах ажлыг цаашид хийх болно гэв.