МАХН-ын Гүйцэтгэх товчоо өчигдөр үдээс хойш яаравчлан хуралдаж, хэд хэдэн асуудлыг хэлэлцсэний дотор зарим хүнийг ажлын хариуцлага алдсан гэсэн шалтгаанаар үүрэгт ажлаас нь чөлөөлсөн байна. Тухайлбал тус намын гадаад харилцаа, сургалт судалгаа хариуцсан нарийн бичгийн даргаар ажиллаж байсан У.Барсболдыг уг албан тушаалаас нь чөлөөлөх шийдвэр гаргажээ.  Ажлаас чөлөөлсөн гол шалтгаан нь МАХН дотроо байгаа олигархиудаасаа салах бодлоготой холбоотой гэнэ. У.Барсболдын нэр сүүлийн үед Хөшөөтийн уурхайтай холбоотой хүчтэй яригдаж байгаа нь түүнийг чөлөөлөх гол үндэслэл болжээ. Мөн нийслэл хотноо хуралдахаар товлосон Ард түмний их хуралдайн үеэр орон нутгаас ирсэн зарим төлөөлөгчдийг нэг дор цуглуулан, намын эсрэг суртал ухуулга явуулсан нь МАХН ын даргын биеийн байдал сайнгүй байгаа  өнөөгийн нөхцөлд намын хамт олны эв нэгдлийг улам бэхжүүлэхийн оронд ийнхүү болчимгүй алхам хийж, ёс зүйгүй авирлалаа хэмээн түүнийг буруутгасан хэмээн албан бус эх сурвалж хэлэв. У.Барсболд нь МАХН-ын дарга Н.Энхбаярыг 2000-2004 онд Ерөнхий сайдаар ажиллаж байх үед Байгаль орчны сайдаар ажиллаж, түүний улс төрийн багт зүтгэж явсан туршлагатай улс төрч бөгөөд өмнө нь хоёр нам салаагүй байхад МАХН-ын мэдээлэл сурталчилгаа хариуцсан нарийн бичгийн даргаар ажиллаж байгаад нам нэрээ солих үеэр түүнийг албан тушаалаас нь чөлөөлж байсан юм.