МАХН-ын нарийн бичигийн дарга У.Барсболдыг ажлаас чөлөөлсөн нь жинхэнэ дуулиан болж байна. Ажлаас нь чөлөөлөөд зогсохгүй намаасаа бүр мөсөн хөөх тухай ярилцах боллоо. МАН-аасаа гарч МАХН-д ороод эцэстээ хөөгдөх тээрээ тулаад байгаа У.Барсболд гэж хэн бэ?

Энэ эрхэм цагтаа цалгиж явлаа. Н.Энхбаярын баруун гар болж МАН-ынханыг айлгаж ичээж явсан цаг саяхан. Тэр эхлээд Н.Энхбаярын эхнэр О.Цолмонгийн хамгийн итгэлтэй хүн болсон. Тиймдээ ч Байгаль орчны сайд байхдаа Н.Энхбаярын ээж Бүдхандыг зөвлөхөөрөө томилох вэ дээ. Ерөнхийлөгчийн ээжийг зөвлөхөө болгож тал тохой татсан хүн түүнээс өөр байхгүй. Н.Энхбаяр намын дарга байхдаа залуучуудынхаа байгууллагадаа итгэдэггүй байсан уу эсвэл тэд нь элдэв хов жив зөөж үнэнийг будилуулдаг байсан уу хэмээх эргэлзээтэй нэгэн асуудал бий. Учир нь Н.Энхбаяр МАХН-ын дарга байхдаа У.Хүрэлсүхийн тэргүүлдэг МАСЗХ-ны эсрэг У.Барсболдыг сөргүүлэн тавьсан юм. У.Барсболд “Улаан сарнай-Хөгжил хөдөлгөөн” хэмээх залуучуудын байгууллагыг тэргүүлнэ. Үндсэндээ тухайн үеийн МАХН дотроо залуучуудын хоёр байгууллагатай байв. Н.Энхбаяр муур багш шиг нэгийг нь нөгөөгөөр нь цохилдуулж ажил явуулна. Тиймээс хүссэн хүсээгүй энэ хоёр залуучуудын байгууллага бие биеэ үзэхгүй. У.Хүрэлсүх, У.Барсболд хоёрын зам ингэж салсан юм. Тэр үед У.Барсболд аймаг болгонд автомашин бэлэглээд сүртэй байсан даа. Н.Энхбаяр үүнийг нь дэмжээд л У.Хүрэлсүхийн шарыг малтаад л. Залуучуудаа хүртэл ингэж хоёр хуваасан хорлонтой улс төрч юм. Үүний хор уршиг нь хадгалагдсаар. Энэ хоёр байгууллагын угшилтай залуус өнөөг хүртэл бие биеэ үзэхгүй хэвээрээ.

У.Хүрэлсүхтэй ингэж түнжин хагарсан У.Барсболд дараа нь Н.Энхбаярыг тусдаа нам байгуулаад явахад МАН-д үлджээ. Учир нь тэгхэд У.Барсболд МАН-ын нарийн бичгийн дарга байсан. С.Батболд түүнийг энэ албанаас нь буулгасны дараа Н.Энхбаяр ахынхаа намд очиж даргын суудалд суусан юм. Удалгүй У.Барсболд намын дарга  Н.Энхбаярыгаа эмнэлэгт эргэж очихоо байж. Бас О.Цолмон эгчийн үгэнд ч орохоо болиж том толгой гаргаж эхэлжээ. Бас Г.Шийлэгдамбатай хэд хэдэн асуудлаас болж ам мурийцгааж. Үүнд нь эгдүүцсэн О.Цолмон түүнийг МАХН-ын нарийн бичгийн даргын албан тушаалаас нь буулгах санаачилга анх гаргажээ. Мэдээж даргын эхнэр санаачилга гаргасан болохоор Хөшөөтөөр шалтаг хийн амархаан чөлөөлж орхисон байна. Ингээд У.Барсболд эртний даргынхаа гэр бүлтэй түнжин хагарсан учраас албан тушаалгүй үлдлээ. Даргын суудал ч яахав. Бүр намаасаа хөөгдөх дээрээ тулна гэдэг тун хэцүү юм. Хэрэв тэр намаасаа хөөгдвөл улс төрчийн хувьд хэн ч биш болж байгаа гэсэн үг. Түүний улс төрийн гялалзсан тавилтууд өндөрлөж байж мэднэ.
Улс төрөө орхиод алдарт Хөшөөтөө хөөх л гарц харагдаж байх шиг байна. Явж, явж Хөшөөтийн уурхай түүнийг дуусгалаа. У.Барсболдыг дагаад түүний дүү П.Хангалын байр суурь МАХН дотор ихээхэн ганхаж эхэлсэн гэж эх сурвалж мэдээллээ. Ийнхүү Н.Энхбаярыг бараадсан ах, дүүсийн улс төрийн ирээдүй бүрхэг боллоо. Өмнө Н.Энхбаярыг бараадсан эдийн засагч Н.Дашзэвэг уугуул намдаа эргэн ирсэн. Д.Арвин Ардчилсан намд элссэн. Ц.Оюунбаатар тэргүүтэй гомдсон улс төрчдийн тоо тоймгүй олон. Ингээд Н.Энхбаярыг дагасан улс төрчид сэм сэмхэн цуварч түүнээс холдсоор байна.  Тэд муу ч, сайн ч МАН-даа байсан бол ядаж хүний нүүр бардам харах царайтай байсан даа.