Өчигдөр Монголын даамчид Азид, жүдочид гранприд, аварга Б.Бат-эрдэнэ сунгаанд түрүүлээд одтой байлаа. Хүмүүс МАН-ын бага хурлын сонин хачинг ойрын хэдэн өдөртөө ярих юмтай боллоо. Манай 24tsag.mn өдөр бас шөнө дамнан хуралдсан МАН-ын бага хурлаар юу болсон, үйл явц хэрхэн өрнөсөн талаар тоймлон бичлээ.

    МАН-ын бага хурал эхлээд зохион байгуулалтын асуудал хэлэлцэж одоогийн удирдлагаа ихээхэн шүүмжилсэн байна. Энэ явцдаа УИХ болон орон нутгийн сонгуульд ялагдал хүлээсэн аймаг, дүүргийн намын хорооныхоо дарга нартай хариуцлага тооцжээ. Тооцжээ ч гэж дээ, өмнө нь өөрчилчихсөн байсан. Харин халагдсан дарга нараа Бага хурлаас чөлөөлж шинэ дарга нарыг нөхөн оруулсан хэрэг. Ингээд харвал ялагдал хүлээсэн газартаа хариуцлага тооцож байгаа юм шиг боловч өөр нэгэн зүйл анхаарал татна. Хариуцлагыг аймаг, дүүргийн намын хорооны дарга гэсэн жижиг "гарууд" л хүлээж байна. Төв аппаратын жинхэнэ том дарга нар суудалдаа суугаад үлдэв. Энэ шударга ариун явдал гэж үү? Тиймээс энэ намын хувьд хариуцлага гэдэг ойлголт жинхэнэ дарга нарт үйлчилдэггүй бага "гарууд"-ад хүртээлтэй бололтой юм. Ийм байхад намын доторх шударга ёс ярих ч хэцүү л дээ.

   Энэ намын Удирдах зөвлөл хуралдаад нэр дэвших хүсэлтэй олон амбицтай хүмүүсийнхээ сонирхолыг эхлээд дарж чадаагүй. Тиймээс нэр дэвших хүсэлтэй бүх хүнийг Бага хуралаараа шийдвэрлэх нь зөв. Тэгээд ч өрсөлдөөнтэй ардчилсан харагдана гэж шийджээ. Ингээд Бага хуралдаа Ө.Энхтүвшин, Б.Бат-Эрдэнэ, Д.Оюунхорол,  Д.Лүндээжанцан гэсэн дөрвөн нэрийг оруулсан аж. Эхний санал хураалтаар Б.Бат-Эрдэнэ 92, намын дарга Ө.Энхтүвшин 92, Д.Оюунхорол 28, Д.Лүндээжанцан 17 хүний санал авлаа. Аль ч нэр дэвшигч нь Бага хурлын гишүүний 51 хувь буюу олонхийн санлыг авч чадсангүй. Өөрөөр хэлбэл МАН-ын өчигдрийн Бага хурлын эхний санал хураалтад 228 гишүүн оролцсон гэсэн үг.

  Ингээд дахин санал хураалтыг олонхийн санал авсан хоёр дээрээ явуулж. Гэтэл Ө.Энхтүвшин 113, Б.Бат-Эрдэнэ 113 хүний санал авч нэг хүчингүй санал гарснаар дахин тэнцжээ. Хоёр дахь удаагийн тэнцсэн дүн шөнийн турш нойрмоглож байсан Бага хурлын гишүүдийг багагүй хөгжөөгөөд дахин санал хураалтыг явуулжээ.
  Гурав дахь санал хураалтаар дархан аварга Б.Бат-Эрдэнэ 117, намын дарга Ө.Энхтүвшин 109 гишүүний саналыг авсанаар Ерөнхийлөгчид нэр дэвшигч шөнийн хоёр цагт тодорчээ. Ийнхүү МАН-аас тун сонирхолтой хүн Ерөнхийлөгчид өрсөлдөх нь тодорхой болов. Энэ хүний талаар илүү тайлбар хэрэггүй бөгөөд ирэх өдрүүдэд бүх юмыг нь дурайтал гаргаад улс даяараа ярилцана.

  Хурлын дараа МАН-ынхан тэгш шударга өрсөлдсөн дөрвөн нэр дэвшигчиддээ мөнгөн аягатай хадаг өргөн барьж үйл явдлыг сонирхолтой болгосонд талархал илэрхийлж ажилд нь амжилт хүсчээ. Бас урлагийнханаар ая дуу өргүүлэхээ ч мартсангүй. Харин хурлын төгсгөлд МАН-ын дарга Ө.Энхтүвшин “Арслан Д.Мөнх-Эрдэнэ аварга Б.Бат-Эрдэнэтэй хоёр удаа харанхуй болтол барилдсан. Би аваргатай хоёр удаа хайнцлаа” гэсэн даруухан үг хэлж, найздаа, гишүүндээ, өрсөлдөгчидөө амжилт хүсээд арын өрөөндөө орж зуу татацгаасан байна.
  
  Ийнхүү МАН далай даян, дархан аварга, Хөдөлмөрийн баатар, гавьяат тамирчин, УИХ-ын гишүүн Б.Бат-Эрдэнийн ард зогсож ханцуйг нь мушгихаар боллоо.