МАН-ын гишүүд Ерөнхийлөгчийн сонгуульд хэнийг нэр дэвшүүлэх вэ гэж бужигнаж байх зуур намын дарга асан С.Баяр Монголдоо ирсэн гэдгээ мэдэгдээд авсан. АНУ-д биеэ эмчлүүлж байсан тэрбээр улс төрөөс холдоогүй гэдгээ илтгэн хэвлэлд ярилцлага өгсөн. С.Баярыг МАН-аас энэ сонгуульд нэр дэвших боломжгүй ч /хуульд заасан хугацаагаар Монгол Улсад байгаагүй тул/  намынхаа хуралд сууж, оролцох байх гэж хүлээсэн хүн цөөнгүй байв. УИХ болон орон нутгийн сонгуульд нэгэнтээ удирдаж байсан нам нь ялагдсан тул энэ удаа "сайн стратегич" гэгддэг түүнийг Бага хуралд ирэх байх гэж таамаглаж байсан юм. Гэсэн ч тэрбээр өчигдөр ирсэнгүй, МАН-ынхан С.Баяргүйгээр Ерөнхийлөгчийн сонгуульд нэр дэвшигчээ тодрууллаа.