Намын дарга хүн жирийн гишүүнтэйгээ өрсөлдөөд ялагдсан тохиолдол Монголын улс төрд бүртгэгдлээ. Урьд өмнө ийм үзэгдэл байсангүй. Намынхаа гишүүнийг ялж чадахгүй дарга яаж ерөнхийлөгч Ц.Элбэгдоржийг ялах вэ дээ гэсэн яриа ч гарлаа. Үнэхээр Ө.Энхтүвшин намын дарга байж нам доторхи сунгаа биш Бага хурлынхаа гишүүдийн саналыг авч чадахгүй байна гэдэг олон зүйлийг өгүүлнэ. Юуны өмнө энэ хүн нам дотроо дэмжлэггүй байна. Бас хүлээн зөвшөөрөгдөж чадахгүй байна гэсэн үг юм. Бас түүнийг одоогийнх нь ажил албанаас чөлөөлөх хүсэлтэй хэсэг бүлэг байгааг ч саяны бага хурал сайхан ойлгуулж өгөв.
    Уг нь Ө.Энхтүвшин улс төрд ялалт хийгээд ялагдлыг үзэж туулсан хүний хувьд Б.Бат-Эрдэнээс хамаагүй хол явна л даа. Их улс төрд илүүрхэх л хүн. Гэвч МАН Бага хурал дээрээ даргыгаа муухай унагаж өглөө. Өөрөө унасан хүүхэд уйлдаггүй гэдэг шиг одоо яая гэхэв.
Ө.Энхтүвшинг хэн унагасан бэ? Яагаад унагах болов гэдэгт дүгнэлт хийж үзэхэд сонирхолтой өнцөгүүд гарч байна. Уг нь Ө.Энхтүвшин энэ удаагийн сонгуульд өрсөлдөөд ялсан ч, ялагдсан ч намаа өгөх байсан. Үе солигдох боломж бүрдсэн юм.
Ө.Энхтүвшингийн тэргүүлж буй намын УЗ, ерөнхий болоод бусад нарийн бичгийн дарга нар, газар хэлтэсийнх нь хүртэл түүний эсрэг ажилласан бололтой. Ө.Энхтүвшингийн бодлогоор санал болгон дэвшүүлсэн намын Нарийн бичгийн дарга Т.Гантулгыг Бага хурал дээр унагав. Энэ үйлдэл нь намынхаа даргын бодлогыг гишүүд нь дэмжихгүй байгаагийн нэг илрэл. Нөгөө нэг илрэл нь ерөнхийлөгчид хэнийгээ нэр дэвшүүлэх вэ гэсэн онцгой чухал асуудал хэлэлцэж байхад С.Баяр, У.Хүрэлсүх тэргүүтнүүд ирэхгүй байгаа явдал юм. Тэд намаа ерөнхийлөгчид ялна гэдэгт итгэлгүй байгаа болоод эсвэл үл тоож буй учраас ирэхгүй байгаа хэрэг.
   Уг нь бол Ө.Энхтүвшин Бага хуралдаа ирсэн 228 хүний 51 хувийн саналыг инээж байгаад л авах ёстой. Тэр намынхандаа хэтэрхий итгэснээс бас өөрөө тулж ажиллаагүйгээс болоод аваргад шидүүлчихлээ.
   Дархан аварга Б.Бат-Эрдэнэтэй хамгийн сүүлд тунахдаа ердөө 109 хүний санал авсан юм. Гэтэл тэрээр энэ хурлаараа 60 орчим хүнийг бага хурлын гишүүн болгосон. Тэр 60 хүн нь түүний төлөө саналаа өгсөн гэж үзвэл цаана нь 50 хүн үлдэж байна. Энэ 50 хүний ихэнх нь Сү.Батболдын хүмүүс. Бас үе солигдохыг хүссэн залуус дэмжсэн байх магадлалтай. Ө.Энхтүвшинг энэ хурал дээр хамгийн сайн дэмжсэн хүн бол Сү.Батболд гэж эх сурвалж мэдээлэв. Ингэж дэмжих хоёр шалтгаан байгаа гэнэ. Нэгд, тэрээр Ө.Энхтүвшинг санал болгож дарга болгосон. Хоёрт, дархан аварга Б.Бат-Эрдэнэтэй таагүй харилцаатай. Учир нь Сү.Батболдыг ерөнхий сайд байхад нь Б.Бат-Эрдэнэ тэргүүтэй намынх нь нөхдүүд огцруулах гэж гүйснийг олон түмэн мартаагүй. Ийм шалтгаануудаар Ө.Энхтүвшинг дэмжжээ.

   Ийм гаргалгаа хийж үзвэл МАН-ын Бага хурлын олонхийг бүрдүүлдэг У.Хүрэлсүхийн фракци, М.Энхболдын хотын бүлэглэл хаана байв аа? Тэд үндсэндээ Б.Бат-Эрдэнэ аваргыг дэмжжээ. Хэрэв энэ хоёрын хэн нэгэн нь л Ө.Энхтүвшинг дэмж гэж цэргүүддээ мессеж нисгэсэн байхад бүх асуудал шийдэгдэх байв. Гэвч тэгсэнгүй. Ингээд дүгнэж үзэхэд М.Энхболд, У.Хүрэлсүх хоёр үндсэндээ намынхаа даргын эсрэг ажиллачихжээ.

   Б.Бат-Эрдэнэ аваргын хувьд бол нам дотроо ямар ч бүлэг фракц байхгүй. Элсний хийгээд эсэргүү бас хөдөөний гэсэн нөхдүүдтэй л холбоотой. Тэдний ихэнх нь Н.Энхбаярын намыг бараадаад явчихсан. Нам дотроо ийм дэмжлэггүй хүн гараад ирнэ гэдэг үнэхээр сонин юм. Энэ намын дотор маш олон асуудал бугшиж байгаагийн нотолгоо. Тэр олон асуудлынх нь дундуур тохиолдолоор л гараад ирлээ дээ. Түүнийг гарсан гэдгийг сонссон улс төр судлаачид удахгүй маш сонирхолтой дүгнэлтүүдийг хийх нь гарцаагүй.
   Эртнээс нэр дэвшинэ гэж мэдэгдсэн Д.Оюунхорол ердөө л 30 орчим хүний саналыг авав. Энэ намын Бага хурлын эмэгтэйчүүдийн тоо 30-аас хамаагүй илүү гарна. Түүний төлөө Завханыхан найдвартай өгсөн байж таарна. Ингээд бодоод үзвэл МАН-ын эмэгтэйчүүдийн ихэнх нь холбооны тэргүүн Д.Оюунхоролдоо санал өгөөгүй хэрэг.
   Гэнэтхэн урьд өдөр нь шийдсэн гэж ярьсан Д.Лүндээжанцан 17-хон хүний санал авсан. Өвөрхангай аймгийн Бага хурлын төлөөлөгчид 20 хүрнэ. Мэдээж үй зайгүй ганц нэг найз нар нь түүнийг дугуйлсан байж таарна. Бас л аймгийнхан нь саналаа өгөөгүйн нотолгоо.

   Ийнхүү МАН-ын дуулиант Бага хурлыг дүгнээд үзвэл гишүүд нь өөрсдийн өгөх ёстой хүмүүстээ саналаа өгөөгүй байна. Бүх түвшний удирдлагууддаа итгэхгүй байна. Бага хурлын гишүүд нь одоогийн намынхаа аппаратыг их шүүмжилсэн мэдээлэл түгж эхэллээ. Түүхэндээ байгаагүй сул удирдлагтайгаа харууллаа. Сул удирдлага нь найз нөхдийнхөө шахаас, нөхөөсний хүмүүсийг тойруулж суулгасан учраас ажил нь явахгүй байна. Намынх нь нэр хүнд өсөхгүй байна. Даргынхаа бодлогыг гишүүд нь шууд унагаж байна. Сөрөг хүчний үүргээ гүйцэтгэж чадахгүй байна. Хамгийн гол нь өөрийнх нь удирдлагад ажиллаж байгаа дарга нар нь, Бага хурлынх нь гишүүдийн олонх дэмжихгүй байна гэдэг бол Ө.Энхтүвшингийн хувьд том дохиолол боллоо. Энэ дохиолол олон юмны эхлэл байж мэднэ.