УИХ дахь намуудын бүлэг өнөөдөр хуралдсан. МАН болон "Шударга ёс" эвслийн  бүлгийн хуралдаан дууссан бол  Ардчилсан намын бүлгийн хуралдаан одоог болтол үргэлжилж байна. УИХ-ын гишүүн С.Одонтуяагаас үдээс өмнөх хуралдаанд ямар асуудлыг хэлэлцсэн талаар тодрууллаа.

-АН-ын бүлгийн үдээс өмнөх хуралдаанаар ямар асуудлыг хэлэлцсэн бэ?

Бүлгийн хурал болгоны эхэнд Ерөнхий сайд энэ долоо хоногт засгийн газраар хэлэлцэж шийдвэрлэгдсэн гол асуудлууд, хөдөө орон нутагт хийсэн айчлалын үр дүнгийн талаар мэдээлэл өгдөг. Энэ дагуу мэдээлэл өгсөн. Ерөнхий сайд Орхон, Булган аймагт ажиллаж, хөдөө орон нутагт хувийн хэвшлийг дэмжих чиглэлээр эдийн засгийн форумыг Орхон аймагт зохиосон. Эрдэнэт хотод “Эрдэнэт хивс” үйлдвэрийн үйл ажиллагаатай танилцаж, экспортод амжилттай гаргаж буй, дотоодод нийлүүлэгдэж байгаа 40 гаруй хувийг боловсруулдаг хувийн үйлдвэрүүдийг дэмжих ёстой гэсэн шийдлийг олж харсан. Мөн Чингис бондын хөрөнгийг ажлын байр бүтээж, баялаг бий болгож байгаа үндэсний үйлдвэрүүдээ дэмжихэд чиглүүлэх хэрэгтэйг онцгойлсон. Булган аймагт гэр хорооллыг дэд бүтэцжүүлэх ажил нэлээн бодитой ахицтай байгаа талаар мэдээлсэн.

- "Шударга ёс" эвслийн зүгээс хадгаламж зээлийн хоршооны хохирогчдын хохирлыг барагдуулах асуудлыг барагдуулна гэсэн. Энэ талаар АН-ын бүлэг юу гэж байгаа вэ?

- Өнөөдөр гишүүдийн нэлээн анхаарлыг татсан зүйл бол энэ асуудал. Эргэн төлөгдөх нөхцөлөөр барагдуулах тухай хуульд өөрчлөлт оруулах хуулийн төслийг Засгийн газар өргөн барьсан. Үүн дээр гишүүд тал бүрийн саналтай байгаа. УИХ-ын чуулганаар хадгаламж зээлийн хоршоодын хохирогчдын өр барагдуулах асуудлыг хэлэлцэх явдал байсан. Хохирлыг нөхөн барагдуулах хуулийн төсөл явж байгаа.

- Зарим нь иргэд долоон жил гаруй хугацаанд тэмцэж байгаа хүмүүст туслах хэрэгтэй гэсэн. Энэ ч утгаараа Х.Тэмүүжин сайдаар ахлуулсан ажлын хэсэг гарсан гэсэн?

- Харин зарим гишүүд шүүмжлэлтэй хандаж өмнө нь төрөөс эргэн төлөгдөх нөхцөлтэй шийдсэн ч маш олон иргэдийг зохиомлоор хохироосон, зохиомлоор дампууруулсан, ийм асуудал яригдаж байгаа. Тиймээс энэ асуудлыг хууль өргөн бариад хохирлыг дарагдуулаад өнгөрөх биш, ул суурьтай асуудлыг гаргаж, дахиж ийм байдал үүсгэхгүй байх тал дээр анхаарах хэрэгтэй гэсэн.