ИЗНН-ын дотоод ажил хариуцсан дэд дарга Х.Бат-Ялалт тэргүүтэй хэдэн гишүүн ИЗНН-аас гарч байгаагаа мэдэгдэж хэвлэлийн бага хурал хийсэн юм. "Иргэдийн шударга шүүх" төрийн бус байгууллагын тэргүүн Х.Бат-Ялалтыг хэлэхдээ "Өнөөдөр сэтгүүлчид ИЗНН-ын хэдэн гишүүн намаасаа гарч байгаа юм гэж асуугаад байна. Үнэндээ энэ намын төв офисст ИЗНН-ыг хэдэн гишүүнтэйг мэдэх хүн нэг ч байхгүй шүү. ИЗНН Монголд шаардлагагүй улс төрийн хүчин гэдгээ харуулж байна. Өнгөрсөн найман сарын хугацаанд бид энэ намыг шинэчлэх гэж жигүүр байгуулан ажиллаж үзлээ. Гэвч ИЗНН бол нам биш. Үзэл баримтлал итгэл үнэмшилгүй хуйвалдааны зарчмаар ажлаа явуулдаг бүлэглэл юм байна. Нэг хүний сайд, гишүүн байлгахын төлөө гишүүд нь төрийн албанд ажилд хуваарилагддаг ийм бүтцийг  нам гэдэггүй юм" хэмээв.   Түүнтэй хамт Орхон аймгийн ИЗНН-ын гишүүд, мөн тус намын ерөнхий нарийн бичгийн дарга байсан Жаргал нар хэвлэлийн хуралд оролцсон юм.  Тэд "Нэг Монголын төлөө" хөдөлгөөн өрнүүлэхээр шийдсэн гэдгээ энэ үеэр сэтгүүлчдэд мэдэгдэв.