Монгол, Германы Засгийн газар хоорондын Ажлын хэсгийн хоёрдугаар хуралдаан маргааш Улаанбаатар хотод болно. Уг ажлын хэсэг нь “Ашигт малтмал, аж үйлдвэр, технологийн салбарт хамтран ажиллах тухай Монгол Улсын Засгийн газар, ХБНГУ-ын Засгийн газар хоорондын хэлэлцээр”-ийн хэрэгжилтийг зохион байгуулах, хяналт тавих чиг үүрэгтэй юм.


  Ашигт малтмал, аж үйлдвэр, технологийн салбарт хамтран ажиллах Монгол, Германы Засгийн газар хоорондын Ажлын хэсгийг монголын талаас ҮХАА-н сайд Х.Баттулга, германы талаас Холбооны Эдийн засаг, технологийн яам /ХЭЗТЯ/-ны ТНБД Др.Б.Хайцер нар тэргүүлэн тус хуралдааныг удирдан явуулна.  

  Монгол, Германы Засгийн газар хоорондын Ажлын хэсгийн хуралдаанд монголын талаас Гадаад харилцааны яам, Үйлдвэр, хөдөө аж ахуйн яам, Сангийн яам, Эдийн засгийн хөгжлийн яам, Боловсрол, шинжлэх ухааны яам, Зам тээврийн яам, Уул, уурхайн яам, Хөдөлмөрийн яам, Эрчим хүчний яамны төлөөлөгчид, германы талаас Холбооны Эдийн засаг, технологийн яам /ХЭЗТЯ/, Холбооны Эдийн засгийн хамтын ажиллагаа, хөгжлийн яам /ХЭЗХАХЯ/-ны төлөөлөгчид болон Монгол-Германы Эдийн засгийн хорооны төлөөлөгчид тус тус оролцоно.     

   Ажлын хэсгийн хуралдаанаар 2011 оны 10 дугаар сард гарын үсэг зурсан “Ашигт малтмал, аж үйлдвэр, технологийн салбарт хамтран ажиллах тухай Монгол Улсын Засгийн газар, ХБНГУ-ын Засгийн газар хоорондын хэлэлцээр”-ийн хэрэгжилтийг хангах чиглэлээр авч хэрэгжүүлсэн болон хэрэгжүүлж буй арга хэмжээ, хамтарсан төслүүд болон хөрөнгө оруулалтын орчны талаар харилцан мэдээлэл солилцон, хамтын ажиллагааны цаашдын зорилт, хийх алхмуудын талаар ярилцаж хэлэлцэх юм.  

   Засгийн газар хооронд байгуулсан дээрх хэлэлцээрт тусгагдсан нүүрснээс шингэн түлш үйлдвэрлэх, коксжих үйлдвэр байгуулах, газрын ховор элементийг хайх, олборлох, боловсруулах тодорхой төслүүдийг хэрэгжүүлэх зорилго бүхий хоёр орны хувийн хэвшлийн Монгол-Германы Эдийн засгийн хорооны 3 дугаар хурлын тайланг тус хуралдаанаар сонсон, тэдний санал санаачилгад хоёр улсын Засгийн газрын зүгээс дэмжлэг үзүүлэх бодлого, боломжийн талаар санал солилцоно.

   Энэхүү хуралдааны үеэр “Цахим дипломат паспорт эзэмшигчдийг виз авах шаардлагаас чөлөөлөх тухай Монгол Улс, ХБНГУ-ын Засгийн газар хоорондын хэлэлцээр”-т гарын үсэг зурна. Мөн Монгол-Германы хамтарсан Технологийн дээд сургууль байгуулахтай холбогдуулан БШУЯ болон ЭЗХЯ нь Холбооны Эдийн засгийн хамтын ажиллагаа, хөгжлийн яамтай Хамтарсан мэдэгдэлд гарын үсэг зурахаар төлөвлөж байна.