Энэ жилийн хамгийн сонирхолтой “халуун” үйл явдал болох Ерөнхийлөгчийн сонгуулийн нэр дэвшигчид тодорч эхлээд байгаа. Харин нэр дэвшигчдийн хувьд намууд нэлээд сонин хувилбар гаргаж ирж байна. МАН “нэр цэвэр” гэх шалгуураар УИХ-ын гишүүн, даян аварга Б.Бат-Эрдэнийг нэр дэвшүүлсэн бол МҮАН-аас М.Энхсайханыг өрсөлдүүлэхээр болсноо мэдэгдэж олныг ангайлгаад авлаа. “Шударга ёс эвсэл” АН-тай хамтрах уу, МАХН эвслээс тусгаарлах уу, эсвэл тус тусдаа өрсөлдөх үү гэсэн олон асуултын эхлэл болж МҮАН нэр дэвшигчээ тодрууллаа. МҮАН-ын нэр дэвшигч М.Энхсайхан гэж хэн бэ?, ямар түүхтэй хүн бэ гэдгийг монголчууд мартаагүй. Ерөнхий сайд, АН-ын дарга, УИХ-ын гишүүн байсан. Гэсэн ч М.Энхсайхан өчигдөр биш өнөөдөр ямар рейтингтэй яваа вэ гэдэг илүү сонин.

  Тэр бол унасан бөх. М.Энхсайхан 2005 оны Ерөнхийлөгчийн сонгуульд нэр дэвшсэн ч Н.Энхбаярт ялагдсан. Тухайн үед Н.Энхбаярыг “но”-г дэлгэнэ гэж хонь, чоно бололцож байв. 2008 оны УИХ-ын сонгуульд нэр дэвшсэн ч М.Энхсайханы тэргүүлсэн нам нэг ч суудал аваагүйгээр барахгүй далаараа цэвэр тавиулсан түүхтэй. Ингэж иргэдийн итгэлийг хүлээж, санал авч чадаагүй улс төрч яагаад дахин нэр дэвших болов гэдэг асуултад зарим эх сурвалж хариулж байна.

    Жилийн өмнө МАХН-ын дарга Н.Энхбаярыг АТГ-аас сүр дуулиантайгаар баривчлахад М.Энхсайхан андын журмаар байлцаж байсан ч удалгүй сураг тасарсан. Эмчилгээ хийлгэж байгаа гэх мэдээлэл тарсан ч тэрбээр Засгийн газар “бялуу” хуваах сургаар сонин, телевизээр үзэгдэх болсон нь үнэн. М.Энхсайхан “Шударга ёс” эвслийг хамтран байгуулсан хуучны найз бас өрсөлдөгч Н.Энхбаярыгаа “хэлмэгдүүлсэн гэж хэлэхгүй” гэж цаашаа түлхээд авсныг хэвлэлийн хуудсууд өгүүлдэг. Тэглээ гээд М.Энхсайхан, Н.Энхбаяр нарын нөхөрлөл дуусаагүй аж.

   М.Энхсайханы ойрын эх сурвалжуудын мэдээлж байгаагаар МҮАН-аас М.Энхсайхан нэр дэвших болсон нь Н.Энхбаярын цаад бодлогтой холбоотой гэж намынхан нь үзэж байгаа бололтой. МАХН нь энэ сонгуулиар МАН-тай эвсч эсвэл дэмжиж ажиллаж магадгүй байгаа. Тиймээс М.Энхсайхан МҮАН-аас нэр дэвшсэн нь гол өрсөлдөгч МҮАН-ын саналыг хуваах бодлоготой холбоотой байж болзошгүй. Угтаа М.Энхсайхан ардчиллын хүн, АН-ыг нэг хэсэг толгойлж явсны хувьд АН-д саналаа өгдөг хүмүүсийн саналыг бага ч гэсэн авна. Өөрөөр хэлбэл одоогийн Ерөнхийлөгч Ц.Элбэгдоржийн саналыг хувааж, МАН-ын нэр дэвшигч Б.Бат-Эрдэнийг дэмжих юм. Бүр тодруулбал Н.Энхбаяр МАН-ыг дэмжихийн тулд М.Энхсайханы нэр дэвших хэрэгтэй гэж зөвлөсөн бололтой.

  МАХН-ын хувьд Д.Тэрбишдагва, Ч.Улаан нарыг дэвшүүлэхээр ярьж байгаа ч МАН-ыг дэмжээд "арын фронт"-оор ажиллах магадлал өндөр байгааг ажиглагчид хэлж байна.