МАН-ын лидер, намын бодлогыг зангиддаг дарга нь биш хэзээ нэгэн цагт намын үүрт ажиллаж байгаагүй Б.Бат-Эрдэнэ гишүүн Ерөнхийлөгчийн сонгуульд Монголын хоёр том намын нэгийг төлөөлөх болоод байгаа. Улс төрийн туршлага гэхээсээ илүү олны танил, нэр цэвэр гэсэн шалгуураар Б.Бат-Эрдэнийг сонгосон нь МАН-ынхан нэр дэвшигчээ билэгдлийн чанартай дэвшүүлэв үү?  гэсэн асуулт гаргаж ирээд байна.

   Тэгвэл МАН-ын зуу гаруй Бага хурлын гишүүд яагаад Ө.Энхтүвшинг биш даян аварга Б.Бат-Эрдэнийг сонгосон бэ гэдэг зарим гишүүд нь хариулт өгч эхэллээ. МАН-ын Бага хурлын гишүүд бол тийм ч яадгаа алдсан хүмүүс биш. УИХ-ын гишүүн байсан, төрийн өндөр албан тушаалд ажиллаж үзсэн эсвэл том компанийг нуруун дээрээ үүрч яваа юм үзэж, нүд тайлсан хүмүүс байж таарна. Гэтэл яагаад улс төрийн халуун тогоонд олон жил чанагдсан Ө.Энхтүвшинг биш, бөхийн барилдаанаар олны итгэлийг олсон хүнийг сонгосон нь учиртай байжээ.

   Ө.Энхтүвшин сонгуульд хэн нэр дэвших вэ гэдэг асуулт ид яригдаж байх үед нэг жижиг хэрнээ ихээхэн шуугиан тарьсан алдаа гаргасан. Тэрбээр сэтгүүлчдэд мэдээлэл хийж байх үедээ “Өнөөдөр махны үнэ 1200 төгрөг болсон” гэж мэдэгдсэн нь сэтгүүлчдийн төдийгүй  иргэдийн дургүйцлийг хүргэсэн. Ийм алдаа гаргадаа гээд шуугиад эхэлмэгц дахин хэвлэлийн хурал хийж 12 мянган төгрөг гэж залруулсан ч нэмэр болсонгүй. Намын дарга нь ингэж зарим нэгний инээдийг хүргэсэнд Бага хурлын гишүүд, ялангуяа хөдөөний дэмжигчид нь ихэд дургүйцжээ. Махны үнэ өсч бага, дунд орлоготой иргэдийн амьдралд дарамт болж байхад том намын дарга нь махны үнээ мэдэхгүй байна гэдэг дэндсэн хэрэг гэж бухимдацгаажээ. Тиймээс Ерөнхийлөгчийн сонгуульд нэр дэвшигчид санал өгөхөд орон нутгийн гишүүд нь Ө.Энхтүвшинд биш Б.Бат-Эрдэнэд саналаа өгч дэмжжээ.

   Өмнө нь Сангийн дэд сайд байсан Ч.Ганхуяг “Талх 300 төгрөг” гэж хэлээд карьер нь навс унаж байсан түүхтэй. Мөн Ерөнхий сайд Н.Алтанхуяг “Манай Турк” гэж хэлээд нэлээд шүүмжлүүлсэн. Энэ мэтээр улс төрчдийн амнаас унасан үг ямар чухал, алдаа гаргавал тэр нь балардаггүйг улс төрчдийн жишээ нотолсоор байна. МАН-ынхан сөрөг хүчин болсноосоо хойш эрх баригч намын үйл ажиллагааг байнга шүүмжлэх болсон. Гэхдээ бас учиртай шүүмжилж, учиртай ярихгүй бол болохгүй нь. Тэр шүүмжлэх асуудал дотор өөрсдийнх нь эхлүүлсэн “сайн” ажил бас явж л байдаг...