МАХН дотор ойрын өдрүүдэд маш сонирхолтой үйл явдлууд өрнөж байна. Эхлээд О.Баасанхүү нарын хориод хүн У.Барсболд баарандаа сууж байхад нь видео камер барьж ороод баривчлах шахсаныхаа дараа намаасаа хөөж орхив. О.Баасанхүүгийн буруутгал нь “Та нар Н.Энхбаяр даргыг ажлаас нь чөлөөлж оронд нь У.Барсболдыг сонгох хуйвалдаан зохион байгуулж байна.”

   МАХН-ын Гадаад харилцаа, сургалт судалгаа хариуцсан нарийн бичгийн дарга У.Барсболдыг сонгуульт ажил ч үгүй, гишүүнчлэл ч үгүй болгосон тухайгаа Ерөнхий нарийн бичгийн дарга Г.Шийлэгдамба Хөшөөтийн уурхайтай холбоотой асуудлаар гэв. Түүнийг хөөсөн шалтгаанаа “Намын эвлэрэн нэгдэхэд тодорхой зорилгоор саад учруулахад бид бүхэн тэр хүмүүстэй хариуцлага хүлээлгэдэг байх хэрэгтэй” гэж тайлбарлажээ.

   Яг үүнтэй давхцуулаад уржигдар орой ТВ9 телевиз хөтөлбөртөө өөрчлөлт оруулан нэгэн нэвтрүүлэг цацлаа. Нэр нь “Хүн чанарын унаган төрх”. Энэ бол УИХ-ын дэд дарга бөгөөд МАХН-аас ерөнхийлөгчийн сонгуульд нэр дэвших боломжтой гэгдсэн таван хүний нэг болох Логийн Цогийн магтуу байлаа. Түүнийг “Хаврын чуулганы нээлтийн хамгийн чухал алхам хийсэн хүн”, “улс төрд хүн чанарын хөшөө босгож яваа нэгэн” гэхчлэн тодорхойлоод өөрөөр нь өөрийг нь багагүй магтуулав. Л.Цог “Би хүн чанар гаргаж Н.Энхбаяр даргыгаа баривчлагдах эцсийн мөч хүртэл нь хамт байлцсан” гэж ярьсан байна. ТВ9-ийн нэвтрүүлгийн бодлого, эзэмшил зэргийг нь харгалзан үзээд Л.Цогийн тухай магтуу нэвтрүүлгийг МАХН-ын дарга Н.Энхбаярын хүсэл сонирхлоос зөрж, зөвшөөрөлгүйгээр орон даяар гэнэт цацсан байх ямар ч үндэсгүй гэж үзэж буй ажиглагчид ч байна. Тэр тусмаа ерөнхийлөгчийн сонгуульд нэр дэвшигчээ тодруулах Бага чуулганаасаа хоёрхон өдрийн өмнө.

   Үүнийг батлах мэт өнөөдрийн хэвлэлүүд “Гүйцэтгэх товчоо, Бага чуулганаас дэмжлэг хүлээж Ерөнхийлөгчийн сонгуульд өрсөлдөж мэдэх нэр дэвшигчээр УИХ-ын дэд дарга Л.Цог тодрохыг үгүйсгэхгүй байна” гэсэн мэдээллийг цацаж эхэллээ. Ц.Элбэгдоржтой өрсөлдөх хүнээр хаврын чуулганы нээлт дээр үгийг нь эсэргүүцэн гарч явсан “гавьяа”-тай Л.Цог, нам байгуулан салж яваад МАХН-тай эвссэн М.Энхсайхан нарыг дэмжин дэвшүүлэх санаа хаанаас гарч байгааг ч удаан бодох хэрэггүй мэт. Өнгөрсөн оны 4 дүгээр сарын 12-ны шөнө “Аа, Бат-Эрдэнэ аварга залгаж байна. Дуудчих” гэж хэлүүлж байсан хүн МАН-аас дэвшиж байгааг тооцвол энэ сонгуульд Ц.Элбэгдоржийн эсрэг өрсөлдөгчид нь нэг баг болон зохион байгуулагдсан мэт харагдаж байна. Ерөнхийдөө нэр дурдагдсан эрхмүүд нэр дэвшсэн ч, эсвэл энэ жагсаалтад өөрчлөлт орсон ч Ц.Элбэгдорж болон бусад нь гэсэн ялгарал хуваагдал, талцал өрсөлдөөн дунд энэ зуны сонгууль болох нь нэгэнт тодорхой болжээ. Л.Цогийн “Хүн чанарын унаган төрх” нэвтрүүлгийн тал нь өнөөгийн ерөнхийлөгч рүү хийсэн довтолгоо байв. Одоо бусад нэр дэвшигчид түүн рүү хэр сайн довтолсоноороо оноо нэмдэг цаг.

  24цаг.мн-ий тодруулга: Л.Цог 1977 онд ЗХУ-ын Эрхүүгийн Улсын Их Сургуулийн хуулийн факультет, 1988 онд ЗХУ-ын Коммунист намын төв хорооны дэргэдэх Нийгмийн ухааны академи төгссөн. 1977-1986 онд Улсын Прокурорын газарт хэлтсийн прокурор, хэлтсийн дарга, 1988-1990 онд Монгол Ардын Хувьсгалт Намын төв хорооны дэргэдэх намын хянан шалгах хороонд байцаагч, 1990-1992 онд Улсын Бага Хурлын Хууль зүйн байнгын хорооны дарга, 1996-1999 онд УИХ-ын Тамгын газрын Ерөнхий нарийн бичгийн дарга, улмаар  1999 онд Хууль зүйн сайдын албыг хашиж байв.
   Л.Цог 2012 оны сонгуулиар УИХ-ын гишүүнээр сонгогдож, улмаар МАХН-МҮАН-ын "Шударга ёс" эвслээс УИХ-ын дэд даргаар сонгогдон ажиллаж байна. Орос хэлтэй.