Ардчилал, шударга ёс гэж ярьдаг Ардчилсан нам хамгийн ардчилалгүй, шударга бус шийдвэрүүдийг гаргадаг боллоо. Тэд Сонгинохайрхан дүүргээс сонгогдсон Д.Сумьяабазарын тангарагийг өргүүлэхээс олон янзын арга хэлбэрээр татгалзаж байна. Нэгэнт ард түмний саналыг авсан хүний бүрэн эрхийг хуулийн дагуу хугацаанд нь хүлээн зөвшөөрөх ёстой. Гэтэл АН-д хууль үйлчлэхгүй байна. Тэд Д.Сумьяабазарын тангарагийг өргүүлж болно. Татгалзахгүй. Харин "манай Д.Зоригтын тангарагийг бас хамтад өргүүлчихье. Асуудлыг ингээд шийдчихье" гэжээ. Хэрэв ингэхгүй бол Д.Сумьяабазарын тангарагийг ч гэсэн өргүүлэхгүй хэмээх шийдвэрийг гаргаснаа зарлалаа.   
     Энэ тухай АН-ын бүлгийн дарга Д.Эрдэнэбат “Д.Сумъяабазарын тангараг өргөх асуудал, Өвөрхангайн тойргийн тангараг өргүүлэх асуудлыг шийдээд УИХ элэг бүтэн болъё гэдэг дээр байр суурь нэгдлээ. Үүнийг хэлэлцээд шийдвэрлэсэн нь дээр. Бид маргалдаад байвал УИХ-ын үйл ажиллагаа удааширч, хийрхсэн улс төр ч газар авна. Үнэндээ бол Сонгинохайрхан дүүргийн дахин санал хураалт Сонгуулийн тухай хуулийг зөрчсөн. Юу гэхээр сонгуулийг 22.00 цагт хаах байсныг  08.00 цагт хаасан. Үндсэн хуулийн Цэцийн дүгнэлт гарсан болохоор бид хэлсэндээ хүрч, ямар нэгэн асуудал үүсгэхгүйгээр Цэцийн дүгнэлтийг хүлээн зөвшөөрч байна. Улс төр өөрөө тогтвортой байх ёстой. Цэцийн дээр хөх тэнгэр л байдаг нь үнэн бол үүнтэй маргаад яах вэ. Маргаан үүсгэх нөхцөл бололцоо байна уу гэвэл тийм. УИХ элэг бүтэн болох тэргүүн шаардлага байгаа болохоор ийм шийдвэр гаргасан” гэсэн хачирхалтай тайлбарыг хийсэн юм.

   Яг үнэндээ бол Сонгинохайрханы санал хураалтыг МАН шийдээгүй. АН-аас томилогдсон хүмүүс шийдсэн. СЕХ-ны дарга АН-ын хүн гэдгийг бүгд мэднэ. Яах гэж өөрсдөө тэгж хууль зөрчсөн юм. Тэгээд өрсөлдөгч хүчиндээ бурууг өгөөд бид заргалдвал заргалдана, асуудал байгаа юу гэвэл байгаа гэх мэт эвтэйхэн дарамталсан АН-ын бүлгийн даргын яриа бол АН-ын байр суурь. Эрх баригчид нь ингээд хууль зөрчөөд сөрөг хүчнээ басамжилаад байхаар ард түмний итгэл, хүндлэл улам л алдарч байна.
   Сүүлийн үед хүмүүс “Сонгууль явуулаад хэрэг байна уу даа” гэдэг боллоо. Нэгэнт хуулийн дагуух санал хураалтыг хүлээн зөвшөөрөхгүй бас ялсан хүнийг хүлээн зөвшөөрөхгүй элдэв гүтгэлэг тарааж байгаад ялагдсан хүн нь гишүүн болчихдог болохоор ард түмэн ийм байр суурьтай болж. МАН-ыг элдэвээр муулдаг ч гэсэн тэднийг засаглах үед олон түмний санал ийм байгаагүй. Хэрэв МАН засаг барьж байгаад ийм шийдвэр гаргасан бол өдийд АН сүйд болж сүгсэлзэж байгаа даа. Жагсаал цуглаан нь одоо бүр гаарсан.  
     Ардчилсан нам эрх барьж байхад төрийн ажлыг хуулийн хүрээнд биш аман яриа тохиролцооны хэлбэрээр асуудлыг шийддэг шинэ жишигийг тогтоолоо. Нэгийг нөгөөгөөр барьцаалан зэрэгцүүж шийдвэрлэдэг энэ аргаа өмнө ч хэрэглэсэн. Одоо ч бас хэрэглэж байна. АН үргэлж олонхиороо байх юм шиг хүч түрэмгийлэн шийдвэрлэх гэсэн аргачлал нь Монголын нийгэмд хүчирхийллийг төрүүлэх жишигийг ч бас бий болголоо.      
     АН-ынхан бас ард түмний сонголт эцсийн сонголт гэж ярих дуртай. Харин одоо эцсийн сонголтыг хуулийнхан, АН-ынхан өөрсдөө хийдэг боллоо. Нөгөөх "хаан" гэж өргөмжлөгддөг ард түмэн хаана байна вэ? Тэдний сонголтыг хүлээн зөвшөөрдөггүй ээ.