Сүүлийн үед улс төрийн нэгэн “шинэ залуу од” гарч ирлээ. Түүнийг хүмүүс ерөнхий сайд Н.Алтанхуягийн хүн гэдгээр нь төвөггүй мэддэг болов. Ингэж алдаршихад эхнэртэйгээ нийлэн төрийн 17 тэрбумын тендерт ялалт байгуулсан явдал нь ихээхэн нөлөөлсөн билээ. Энэ хүн бол ЗГХЭГ-ын дэд дарга Г.Дэнзэн юм. Хүмүүс түүнийг Ерөнхий сайдтай холбоод болохгүй байгаа учир Н.Алтанхуяг УИХ-ын чуулганы танхимын индэр дээрээс Г.Дэнзэнг ихээхэн магтсан юм. Тухайлбал “Би Г.Дэнзэнг УБИС-д багшилж байхад нь авчирсан. Гол нь Оюутолгой болоод Тавантолгойн ТЭЗҮ-г хийлгэх гэж авчирсан” гэсэн утгатай юм ярьсан. Н.Алтанхуягийн тайлбараар бол тэрээр Оюутолгой, Тавантолгойн ТЭЗҮ-г хийсэн залуу юм. Гэтэл учир мэдэх хүмүүсийн тайлбараар бол Оюутолгой, Тавантолгойн ТЭЗҮ-г Г.Дэнзэн шиг хүүхэд хийдэггүй гэнэ. Удахгүй Оюутолгой, Тавантолгойн ТЭЗҮ-г хийсэн багийнхан Г.Дэнзэнгийн талаар мэдээлэл хийнэ гэсэн яриа ч гараад авлаа. Зарим хүмүүсийн тайлбараар бол Оюутолгой, Тавантолгойн ТЭЗҮ-г Монголын урьдаа барьдаг эдийн засагчид хийсэн. Мэдээж тэдэн дээр муу хэлүүлдэг С.Баярцогт, сайд асан Д.Зоригт нар оролцсон аж. Ийнхүү Н.Алтанхуяг хүргэнээ чуулганы индэр дээрээс магтах гэж байгаад бүүр ч том асуудалд оруулчихсан бололтой.

    Хамгийн сүүлд ЗГХЭГ-ын дэд дарга Г.Дэнзэнгийн үйлдсэн нэгэн шинэ хэрэг дуулиан тарьж эхэллээ. Тэрээр төрд ажилладаггүй хүмүүсийг ажилладаг болгож тодорхойлоод өнгөрсөн сард гадаадад зугаалж яваад ирсэн гэж яригдаж байна. Тухайлбал ЗГХЭГТ-т ажилладаггүй О.Чинхүсэлийг,  өөрийн ТУЗ-ийн даргаар ажилладаг “Эрдэнэс-Тавантолгой” ХХK-д ажилладаггүй Ц.Мөнхтогтох, Д.Лхагвадорж нарыг ажилладаг хэмээн хуурамчаар тодорхойлоод ХБНГУ-ын ЭСЯ-ыг хуурсан гэж хардагдах болов. Удахгүй энэ асуудал өндөрөө авч шалгагдах нь гарцаагүй.

    Г.Дэнзэнгийн хувьд хуурамч тодорхойлолт хийсэн нь баримтаар харагдаж батлагджээ. Харин визээ авсан уу, аяласан уу гэдэг нь тодорхойгүй аж. Хэрэв явсан бол хэд хэдэн асуудал урган гарч ирнэ. Нэгд Швейцари болоод ХБНГУ-ын ЭСЯ-ыг хуурахад нь Монголын ГХЯ оролцсон шинж харагдаж байгаа. Гадныханыг хуурсан бол МУ-ын ГХЯ-ыг европын орнууд буруутгана. Харилцаагаа чангатгана. Дээр нь хуурамч бичиг баримт үйлдсэн Г.Дэнзэн тэргүүтэй хүмүүст дахиж Шенгений орнуудын виз олгохгүй байх магадлал өндөр гэнэ. Мөн эдгээр хүмүүс аяласан бол зардал нь хаанаас гарсан бэ гэдэг бас нэг асуудал үүснэ. Эх сурвалжийн мэдээлж байгаагаар бол Г.Дэнзэн эрх мэдлээ урвуулан “Эрдэнэс-Тавантолгой” ХХK-иас гаргуулсан байх магадлал өндөр гэнэ.  
    Бас дээр нь ЗГХЭГ-ын дэд дарга гадаад дахь байнгын төлөөлчгийн газрыг шалгах эрхгүй юм байна. Мөн Швейцарийн Лугано хотод манай байнгын төлөөлөгчийн газар байдаггүй аж.

    Ингэж Монгол Улсын Засгийн газарт ажилладаггүй хүнийг ажилладаг гэсэн тодорхойлолт хийж байхад манай Засгийн газрын мундаг хуульчид яагаад анзаардаггүй байна вэ? ЗГХЭГ-ын тэргүүн дэд дарга Ж.Солонго гэж мундаг хуульч бий. Тэр яагаад хамар доогуураа ийм юмнуудыг өнгөрөөх болов гэдэг асуудал ч анхаарал татна. Ийнхүү Г.Дэнзэнгийн ээлжит баримт шинэ дуулианыг үүсгэхээр боллоо. Баримтыг бүрэн эхээр нь хүргэж байна.