Монгол Үндэсний Ардчилсан намын Бүгд их  хуралдаанаар Ерөнхийлөгчийн сонгуульд хэнийг дэмжиж оролцохоо хэлэлцсэн юм.  Ингээд тэд Ерөнхийлөгчийн сонгуульд Ардчилсан намаас нэр дэвшигч Ц.Элбэгдоржийг дэмжиж оролцохоор шийдвэрлэлээ. МҮАН-ыг бие даан сонгуульд оролцох нь зүйтэй, МАХН гэх улс төрийн хүчнээс тусгаар үйл ажиллагаагаа сэргээх хэрэгтэй гэх саналуудыг зарим нэг нь  хэлж байсан ч эцсийн санал хураалтаар М.Энхсайханы шийдвэрийг дэмжсэн тогтоол гаргахаар болсон юм.

МҮАН-ын дарга М.Энхсайхан илтгэлийнхээ эхэнд “Өмнө нь Монголын ардчиллын түүхэнд төрийн дээд өндөрлөгүүд ганц улс төрийн хүчний гарт төвлөрч байгаагүй. АН-аас Ерөнхийлөгч сонгогдсон бол МАН-ын Засгийн газартай, МАН-аас Ерөнхийлөгч сонгогдсон бол АН-ын засгийн газартай болж явсан. Энэ нь Засгийн газраа  эсвэл огцруулдаг, эсвэл хийх ажлыг нь гацаадаг байдалд хүргэж байсан. Өөрөөр хэлбэл Монголын төрийн салаа мөчир болгон өөр хоорондоо тэмцэлддэг, нэгэн эрдэмтний хэлснээр Монголчууд “төрөө шатаадаг” тоглоомоор тоглож ирсэн байдаг. 2012 оны УИХ-ын сонгууль Монголын ардчиллын түүхэнд анх удаагаа АН-д төрөө мэдэж, эдийн засгаа засах эрхийг төвлөрүүлж өгсөн" гэсэн юм.

 Харин илтгэлийн төгсгөлд "Ховорхон энэ боломжийг үр дүнтэй ашиглах явдал ганц АН-ын хэрэг биш нийт монголчуудын эрх ашиг. 2013 оны Ерөнхийлөгчийн сонгуульд АН-аас Ц.Элбэгдорж ерөнхийлөгчийг дэвшүүлэхдээ өнөөдрийн Монголд бий болсон гадаад болон дотоод нөхцөл байдлыг бодолцож шийдвэрлэсэн гэж бодож байна. Цагаан морин жилийн ардчиллын галыг хамтран асаалцаж явсан Ц.Элбэгдорж алдаа оноогоо мэднэ, хийх ажлаа ч мэднэ, түүнд улс төрийн эрмэлзлэл байгаа. Тэгээд ч Ерөнхийлөгч гэдэг хүнийг ард түмэн өөрсдөө сонгож бойжуулдаг асар үнэ цэнээр бий болдог хүмүүн биет их хөрөнгө. Түүнийг Монголын төрд, олон түмний эрх ашигт ахин ашиглах нь зүйтэй хэмээн бодож байна” гэв. Ийн МҮАН Ерөнхийлөгчийн сонгуульд Ц.Элбэгдоржийг дэмжихээ мэдэгдсэн юм.