Баасан гариг буюу өчигдөр оройн ажил тарахын үест олон түмний анхаарал сарниасан цагаар АН-ынхан гэнэт л УИХ-ын хоёр гишүүний тангаргийг өргөхөөр болоод явчихаж. МАН уг хурлаас завсарлага авах гээд өгсөнгүй. Асуудлыг хойшлуулья гэтэл бас зөвшөөрсөнгүй. Ингээд Өвөрхангай аймагт С.Чинзориг гэдэг хүнээс 6500 орчим саналаар дутуу байсан Д.Зоригт тангарагаа өргөөд бүрэн эрхээ баталгаажуулаад авав. Ардчилал хийгээд ард түмний сонголтыг үгүйсгэсэн энэ шийдвэр нэг хэсэгтээ амны зугаа болох нь гарцаагүй. Дандаа эрх барьж байсан МАН өөрсдийнх нь төлөө өгсөн ард түмний сонголтыг баталгаажуулан хамгаалж чадсангүй. Тэдний сул дорой байдлыг эрх баригчид чадварлаг ашиглав. Уг нь У.Хүрэлсүх байсан бол толгойгоо намынхаа далбаагаар боочихоод, залуучуудаа дагуулж ирээд сүгсэлзсээр ядаж хойшлуулах байсан даа. Ингэж тэмцэх удирдагч энэ намд хэрэгтэй байна гэж ард түмэн хэдий болтол хүлээх юм бол доо. Сүүлийн үед С.Бямбацогт, Ж.Энхбаяр хоёр овоо дуугарч эхэлсэн. Парламентын гаднаас Ж.Сүхбаатар овоо орилж байгаа. Тэгсэн ч гэсэн илүү хүчтэй санаачилга, шахалт, идэхитэй ажиллагаа хэрэгтэйг үйл явдлууд харуулсаар байна. 

Өчигдөр орой чуулганаар Д.Зоригтын асуудлыг хэлэлцээд эхлэнгүүт нь УИХ-дахь МАН-ын бүлгийн ахлагч Н.Энхболд СЕХ-ны даргад хандан Өвөрхангай аймагт хэн хэдэн санал авсныг хэлэхийг хүссэн юм. Хариуд нь СЕХ-ны дарга Ч.Содномцэрэн “Тэрнийг шүүх хүчингүй болгосон” хэмээн хэнэг ч үгүй хариулсан. Ингээд ард түмний өгсөн саналыг шүүх дураараа хүчингүй болгодог болов. Хэрэв ийм жишиг тогтох юм бол цаашид санал өгөөд ч нэмэргүй нь. Шүүхийн шийдвэрээр л дуртайгаан гишүүн болгож болдогийг харлаа. Тиймээс дараагийн парламентын 3/1-ийг шүүхийн шийдвэрээр, 3/1-ийг нь СЕХ-ны үзэмжээр, тэгээд үлдсэнийг нь намууд дур мэдэн бүрдүүлдэг байвал дээр болоод явчихлаа. Ядаж сонгуульд зарцуулах төсвийн мөнгө хэмнэгдэнэ.

Г.Батхүүгээс 3500, Д.Зоригтоос 6500 хүний санал илүү авсан С.Чинзоригийн тангарагийг өргүүлэхгүй байгаа шалтгаан маш энгийн. Насанд хүрээгүй хоёр хүүхдийг сонгуулийн сурталчилгаандаа оруулсан гэдэг үндэслэлээр. Гэтэл ийм шийдвэр гаргасан шүүх хуралд С.Чинзоригийг оруулаагүй байдаг. Нөгөө хүүхдүүдтэй нь уулзуулаагүй хэрэг. Хүчээр л шийдсэн гэсэн үг. Бүр арга барагдаад хүүхдүүдийг сурталчилгаанд оруулсан гэж үзвэл эргүүлэн татах тухай заалт УИХ-ын сонгуулийн тухай хуульд байхгүй. Зүгээр л торгоно гэсэн байдаг аж. Гэтэл мандатаа авсан байсан С.Чинзоригийг эргүүлэн татаж Өвөрхангайчуудын эрхийг зөрчлөө.
Ийнхүү АН-ын түрэмгийлэл ард түмнийг сонголтоо хамгаалах аргагүй байдалд оруулж байна. Энэ талаар УИХ дахь намуудын төлөөлөл ямар байр суурьтай байгааг хүргэе.  

УИХ-дахь МАН-ын бүлгийн ахлагч Н.Энхболд: Хэлэх үг олдохгүй байна. Олонх маань хэтэрхий жудаггүй. Хуульгүйгээр хандаж байна. Шүүхийн шийдвэр яаж гарсныг бид бүгд мэдэж байна. Өөрсдийг нь оролцуулахгүйгээр, хуулийн буруу заалтыг хэрэглэсэн шүүгчдийн асуудлыг яагаад олж харахгүй байгаа юм бэ. Бид өнөөдрийн хуралдаанд аргагүй орж байна.

МАН-ын гишүүн Д.Лүндээжанцан: Хоёр хүүхдийг сонгуулийн сурталчилгааны самбарт зургаа авахуулсан нэрээр олон мянган сонгогчдын саналыг байхгүй болгох гэж байна. Монгол Улсад сонгуулийн ардчиллыг булшилж байна. С.Чинзоригийг өөрөө үнэхээр бага насны хүүхдийг сонгуульдаа ашигласан бол би өмөөрөхгүй.  

УИХ-ын гишүүн Г.Уянга: АН-ынхаан, та нарт нэг л эвгүй биш байна уу? Сэтгэлдээ гэмшиж ичиж байгаа АН-ын гишүүд байна уу? Тэгвэл сэтгэгдлээ бичээч, нүглээ наминчлаач. Та нар бусад хүмүүсээс нь асуугаач. АН-ынхнаас, Д.Зоригтоос ичиж байна уу гэж асуугаач. Би лав АН-ынх биш боловч ичлээ. Энэ арай бишээ. Сонгуулийн систем, ардчиллын сүйрэл бодит байдал боллоо. Одоо Үндсэн хуулийн өөрчлөлт! Өөр арга үгүй!

УИХ-ын гишүүн Ц.Даваасүрэн:  Ардчилалын амин сүнс нь ардчилсан сонгууль, саналаа өгөх. Гэтэл манайд иргэдийн саналыг өөрчилдөг шүүх бий болжээ.

УИХ-ын гишүүн Н.Номтойбаяр: МАН-тай хамт Н.Төмөрхүү, С.Чинзориг нарыг дэмжсэн Өвөрхангайчуудаас АН-ын өмнөөс хүлцэл өчье.

УИХ-ын гишүүн Х.Баттулга: Манай ангид бас Өвөрхангайн хоёр атаман хүүхэд шилжиж ирлээ. Дайраад л ороод ирсэн. Ингээд бид 76-уулаа боллоо.

УИХ-ын гишүүн Л.Энх-Амгалан: Монголын ардчиллын түүхэнд хар толбо үлдээсэн өдөр боллоо доо хөөрхий.

МАН-ын Ерөнхий нарийн бичгийн дарга Г.Занданшатар: Чоно борооноор, Д.Зоригт хулгайгаар Их хуралд орлоо. Ардчилалын Хар толбыг арилгахын төлөө нэгдэж тэмцье. Монголын түүхэн дэх хар Баасан гариг 2013.05.10 Ард түмний сонголт шүүхээр арчуулав. Дүр эсгэсэн ардчилал аюултай юмаа. 

МАН-ын нарийн бичгийн дарга Ж.Сүхбаатар: Насанд хүрээгүй 2 хүүхэдтэй холбон С.Чинзоригийн саналыг хүчингүйд тооцсон гээд хасч байгаа УИХ-ын сонгуулийн хуулийн заалтыг үзүүлээсэй. Ийм тохиолдолд торгох шийтгэл ногдуулахаар хуульчилсан. Насанд хүрээгүй хүүхдийг сонгуулийн сурталчилгаанд татан оролцуулбал хасна гэсэн заалт хуульд байхгүй. Хуулийг гууль болгож тайлбарлан хэрэглэж байгаа нь гутамшиг. Аливаа хэрэг зөрчилд тохирсон хариуцлага байхаас бус хориглосон зүйл бүрт түүнээс давсан шийтгэл ногдуулбал шударга бус, илтэд хууль бус болно.

ИЗНН-ын Г.Ганбат: Ингэж луйварчдаар УИХ-ыг "элэг бүтэн" болгосноос дутуу байсан нь дээр. Д.Зоригт луйварчинд иргэдийг төлөөлж санал өгөх эрхийг хэн ч өгөөгүй. Өнөөдрийн ёс бус явдлын ард бидний сонгох эрхийг үгүй хийчихлээ. Хамгийн аймаар нь энэ. Бид эрх, эрх чөлөөгөө хамгаалах чадваргүй байна.