Хоёр зуу гаруй гишүүнтэй МАХН-ын Бага чуулган өчигдөр тун ширүүн болж, 2013 оны сонгуульд нэр дэвшигчээ тодрууллаа. Оройн 12 цагт өндөрлөсөн хурлын гишүүдийн олонхи нь Эрүүл мэндийн сайд Н.Удвалд саналаа өгч, Ерөнхийлөгчийн сонгуульд нэр дэвшүүлэх болжээ. Өөрөөр хэлбэл МАХН энэ удаа аль нэг намтай эвсэхгүй, дангаараа сонгуульд оролцоно гэсэн үг. Өмнө нь нэр дэвшиж магадгүй гэж байсан Ч.Улаан, Д.Тэрбишдагва нар нэрээ татсан бол сүүлийн санал хураалтанд Л.Цог, Н.Удвал нар тунасан юм. Цорын ганц эмэгтэй нэр дэвшигч Н.Удвалыг намын бодлогоор дэмжсэн тул хурлын гишүүд гараа өргөн дэмжжээ. Гэхдээ хуралд оролцогсод нэгэн дуугаар зөвшөөрч, ярайтал гараа өргөсөнгүй. Өдөржин, оройжин үргэлжилсэн хуралд сонирхолтой үйл явдал цөөнгүй болсон юм.

     Хамгийн сонирхолтой нь МАХН-н Гүйцэтгэх товчооноос хөөгдөх болсон хуучны сайд У.Барсболд хуралд 10 гаруй лагс биетэй бөх дагуулж иржээ. Учир нь тэрбээр намын удирдлагуудтай муудалцан тул хуралд оруулахгүй байж магадгүй гэж бие хамгаалагчид дагуулсан нь энэ аж. Харин намын удирдлагууд түүнийг Гүйцэтгэх товчооноос хөөснөөс биш намын Бага чуулганы гишүүн хэвээрээ гэж үзэн хуралд суухыг нь хориглосонгүй. Хэрэв хорьсон бол баахан бөхчүүд У.Барсболдыг өмөөрч хурлыг түйвээх байж  л дээ. Бөхчүүд байдлыг ажин хурлын гадаа цаг гаруй микро автобусанд сууж байгаад явжээ.

      Бас нэгэн үймээнийг УИХ-ын гишүүн О.Баасанхүү дэгдээжээ. Тэрбээр Нийслэлийн Мэргэжлийн Хяналтын Газраас халагдаж нэг хэсэг шуугиан тарьсан Г.Баярсайхантай барьцалдаж авчээ. Г.Баярсайхан нь намын удирдлагуудыг байнга шүүмжилдэг бөгөөд намын бодлогыг дэмжихгүй гэж О.Баасанхүү гишүүний ундууцлыг хүргэсэн бололтой.

     Харин саяхан МАН-аас орсон П.Хангал нарын нөхөд тун чимээгүй суусан бөгөөд УИХ-ын гишүүн Б.Бат-Эрдэнийг дэмжье гэсэн саналыг чихнийхээ хажуугаар өнгөрөөгөөд сууж байсан гэнэ. Уг нь хурлын жирийн гишүүд дунд “МАН-тай хамтарч, Б.Бат-Эрдэнийг дэмжье” гэсэн саналтай хүн цөөнгүй байжээ. Гэсэн ч намын бодлогыг дагъяа гэж Н.Удвалыг дэмжсэн байна. Ийнхүү 2013 оны Ерөнхийлөгчийн сонгуульд оролцох сүүлийн нам нэр дэвшигчээ тодруулж, эмэгтэй нэр дэвшигтэй боллоо. Сунгаа ойртож байна.
                                                                                                                                                                                         Т.Гэрэл