Манай улс төрийнхөн оройн цагаар л шийдвэрээ гаргадаг шинэ жишигтэй болов. Хоёр өдөр хойшилж өчигдөр арай гэж хуралдсан МАХН-ынхан нилээд сүр болж шийдвэрээ гаргав. Тэдний хөзөр ЭМ-ийн сайд Н.Удвал байлаа.

Саяхан УИХ-ын гишүүн Д.Оюунхоролыг Ерөнхийлөгчийн сонгуульд нэр дэвшүүлнэ. Анх удаа эмэгтэй хүнийг Ерөнхийлөгчид дэвшүүлэх гэж байна гэсэн мессеж нийгэмд нилээд сайн хүрсэн. Тэгээд ч эмэгтэй хүн нэр дэвшвэл дэмжинэ гэсэн хандлага түгээмэл байсан. Энэ орон зай дээр МАХН тоглох гэж хичээж байх шиг.

Эх сурвалжийн мэдээлж байгаагаар бол Н.Удвалаас илүү мөнгөтэй, нэр хүндтэй байсан Д.Тэрбишдагва, Ч.Улаан тэргүүтнүүд өөрсдөө сайн дураараа татгалзсан. Тэд эртний сайн анд, угшил гарал нэгтэй нэг намын Б.Бат-Эрдэнийгээ хүндэтгэж байгаагаа хэлсэн гэдэг. Тэгвэл эмэгтэй хүн тэгж боддоггүй аж. Боломж л олдвол нэр дэвшинэ гэж Н.Удвал зүтгэсээр гараад иржээ. Зарим хүмүүсийн тайлбараар бол Н.Энхбаяр Ерөнхийлөгчийн сонгуульд хүн дэвшүүлээд хэрэггүй. Б.Бат-Эрдэнийг дэмжих хэрэгтэй гэсэн аж. Гэвч намынх нь гишүүд түүний үгэнд орсонгүй. Хэрэв үнэн бол МАХН Н.Энхбаярын нам биш болж байгаа бололтой. Түүний гэр бүлийн хүнийг тоохоо болисон гэдэг шиг өөрийнх нь үгийг ч гэсэн авахаа байсан аж. Тэгэхээр МАХН өөр удирдлагатай болсон бололтой.

АН-ынхан М.Энхсайханыг нэрийг нь дэвшүүлэхгүй бүр дэмжүүлэх шийдвэр гаргуулж чадсан. Гэтэл МАН-ынхан угшил гарал нэгтэй МАХН-ынхаа бодлогод нөлөөлж чадахгүй байна. Эсвэл нөлөөлөх гэж оролдоогүй гэвэл одоогийн удирдлагын буруу юм. Ямар ч гэсэн МАХН дахин МАН-даа “шавар” хаахаар болов.

МАХН-аас ЭМ-ийн сайд Н.Удвалыг нэр дэвшүүлж байгааг зарим хуульчид хууль бус гэж тайлбарлаж байна. Учир нь УИХ-ын сонгуульд МАХН дангаараа суудал аваагүй. МҮАН-тэй эвсэж “Шударга ёс эвсэл” нэрээр гарч ирсэн. Тиймээс МАХН дангаараа нэр дэвшүүлэх субьект болохгүй. Харин “Шударга ёс” эвсэл нэр дэвшүүлэх эрхтэй гэж байна. Үнэхээр өмнө ч ийм жишиг байсан. Энэ асуудал дахин шинэ маргааныг дэгдээх бололтой. Шийдвэр яаж гарах вэ гэдэг нэгэн шинэ асуудлыг нийгэмд гаргаж тавилаа.