Ерөнхий сайд Н.Алтанхуяг “Оросын төмөр зам” нийгэмлэгийн ерөнхийлөгч В.Якуниныг хүлээн авч уулзлаа.
Монгол Улсад хэвтээ тэнхлэгийн дагуу барих шинэ төмөр замын төслийн хамтын ажиллагааг тодорхой болгох яриа хэлцэл хийх боломж олгосон Ерөнхий сайдад ноён В.Якунин талархал илэрхийлсэн.
Уулзалтын үеэр Ерөнхий сайд Н.Алтанхуяг төслийн хөрөнгө оруулалт, менежментийн асуудалд харилцан ашигтай, хоёр талын эрх ашгийг хүндэтгэн ажиллах нь чухал болохыг тэмдэглээд хамтын ажиллагааны механизмаа нарийвчлан тодорхойлж, цаашид илүү хурдтай урагшлах шаардлагатай байгааг тодотголоо. Стратегийн түншлэлийн харилцаатай, мөнхийн хөрш манай хоёр орны харилцан үр ашигтай хамтын ажиллагаанд тээвэр, ложистикийн дэд бүтэц ихээхэн үүрэгтэй тул Ерөнхий сайд шинэ төмөр замын төслийн ажилд онцгой анхаарч ажиллахаа илэрхийлсэн юм.
Харин ноён В.Якунин, бидний хамтын ажиллагаа ахиц дэвшилтэй байгаа ч цаашид төслийн үйл ажиллагааг өргөжүүлж, ашиг орлогыг нь нэмэгдүүлэн хамтран ажиллах хэрэгтэй байгааг хэллээ. Мөн өнгөрсөн хугацаанд дүрмийн сангаа нэмэгдүүлснээр ашигтай ажиллах нөхцөл бүрдээд байгааг хоёр тал тэмдэглэсэн.
Ерөнхий сайд Н.Алтанхуяг Монголын төмөр замыг хөгжүүлэх боломжтой хувилбаруудыг дэмжин хэрэгжүүлэхэд Монгол Улсын Засгийн газрын зүгээс анхаарал тавин ажиллахад бэлэн гэдгээ уулзалтын үеэр онцолсон гэж Засгийн газрын Хэвлэл мэдээлэл, олон нийттэй харилцах албанаас мэдээллээ.
Сэтгэгдэл (4)