МАХН-ын удирдлагууд өнөөдөр 2013 оны Ерөнхийлөгчийн сонгуульд хэрхэн оролцох болсон талаараа мэдэгдлээ. Хурлын эхэнд МАХН-ны Ерөнхий нарийн бичгийн дарга Г.Шийлэгдамба өчигдөр болж өнгөрсөн намын бага чуулганыг ардчилалтай, нээлттэй, ил тод явагдсан гэж хэлсэн юм. Тэрээ ярихдаа "Бид чуулганы эхэнд Ерөнхийлөгчийн сонгуульд хэрхэн оролцох эсэх талаар ярилцсан. Учир нь Бага чуулганы гишүүдийн зарим хэсэг нь улс төрийн өнөөгийн нөхцөл байдал, намын даргынхаа нөхцөл байдлыг харгалзаж үзээд энэ жилийн Ерөнхийлөгчийн сонгуульд оролцох шаардлагагүй хэмээн үзэж байсан. Мөн Шинэчлэлийн Засгийн газарт орохдоо хийсэн гэрээний дагуу АН-ыг дэмжих, эсвэл угшил нэгт МАН-ын нэр дэвшигч Б.Бат-Эрдэнийг дэмжих талаар нэлээдгүй яриа өрнөсөн. Энэ мэтээр асуудлаа удтал хэлэлцсэний эцэст шударга ёсыг сахиулахын тулд МАХН өөрийн хүнээ Монгол Улсын Ерөнхийлөгчид  нэр дэвшүүлэхээр" болсон гэсэн юм.  Мөн Бага чуулганаа хэд хэдэн удаа хойшлуулсан шалтгааныг Ерөнхий нарийн бичгийн дарга Г.Шийлэгдамба тайлбарлахдаа Шинэчлэлийн Засгийн газартай хийсэн гэрээ зэргийг нягталж үзэх шаардлагатай байсан гэв. Орон нутгийн сонгуульд оролцохдоо тус тусдаа оролцож болсон юм чинь энэ удаагийн Ерөнхийлөгчийн сонгуульд ч мөн тус тусдаа  оролцох хэрэгтэй гэлээ.