Шинэчлэлийн Засгийн газрын сайд нар долоо хоног бүрийн лхагва гаригт сэтгүүлчидтэй уулзаж, салбарынхаа асуудлаар мэдээлэл хийн сонирхсон асуултуудад хариулт өгдөг уламжлалтай. Энэ уламжлалт уулзалтын хүрээнд Гадаад харилцааны сайд Л.Болд 5 дугаар сарын 8-нд сэтгүүлчидтэй уулзан, Монгол Улсын гадаад бодлогын асуудлаар нээлттэй ярилцлаа.

Л.Болд: Монгол Улсын гадаад харилцаатай холбоотой олон чухал үйл явдал өрнөсөн өдрүүдийн дараа хэвлэл мэдээллийнхэн та бүхэнтэй уулзаж байгаадаа баяртай байна.

Монгол Улс энхийг эрхэмлэсэн, нээлттэй, бие даасан, олон тулгуурт гадаад бодлого хэрэгжүүлж, гадаад бодлогын нэгдмэл байдал, залгамж чанарыг хадгалан, дэлхийн улсуудтай найрсаг харилцаа, улс төр, эдийн засгийн болон бусад салбарын хамтын ажиллагааг хөгжүүлж, олон улсын хамтын нийгэмлэгт байр сууриа бэхжүүлж, бүс нутгийн хамтын ажиллагаанд оновчтой оролцож, хилийн чанадад Монгол Улсын иргэн, хуулийн этгээдийн эрх ашгийг тууштай хамгаалж, иргэд гадаадад зорчих нөхцөлийг хөнгөвчилж, эх орноо гадаадад сурталчлан таниулах ажлыг эрчимжүүлэх зорилт тавин ажиллаж байна.

Монгол Улсын Гадаад бодлогын үзэл баримтлалын дагуу ОХУ, БНХАУ-тай найрсаг харилцаатай байх нь Монгол Улсын гадаад харилцааны бодлогын эн тэргүүний зорилт бөгөөд тэдгээр улстай бүхэлдээ тэнцвэртэй харилцаж, сайн хөршийн ёсоор өргөн хүрээтэй хамтын ажиллагаа хөгжүүлнэ. Түүнчлэн “гуравдагч хөрш”-ийн бодлогын хүрээнд АНУ, Япон, Европын Холбоо, Герман, Франц, Энэтхэг, БНСУ, Түрк зэрэг өрнө, дорнын улстай түншлэлийн харилцааг бататган бэхжүүлж, хөгжүүлэхээр зорьж байна.