Гадаад харилцааны яамны Төрийн нарийн бичгийн дарга Г.Цогтсайхан Австралийн Холбооны Улсад ажлын айлчлал хийв.Тэрээр Австралийн Гадаад хэрэг, худалдааны яамны Нарийн бичгийн дарга Питер Варгиз, Нэгдүгээр орлогч нарийн бичгийн дарга Питер Роүи нартай санал солилцож Монгол Улс Австрали Улсыг Ази, Номхон далайн бүс нутаг дахь чухал түнш гэж үздэгээ нотолж, хоёр талын харилцаа, хамтын ажиллагааг “өргөтгөсөн түншлэл”-ийн түвшинд хүртэл хөгжүүлэх эрмэлзэлтэйгээ тэмдэглэв.
Айлчлалын үеэр хоёр талын ГХЯ-дын хооронд зөвлөлдөх уулзалт тогтмол хийж байх, монгол залуусыг Австралийн “Ажиллах, Амрах” визийн зэрэглэлд хамруулах саналыг тус тус тавьсаныг Авсралийн тал судалж үзэхээ илэрхийлэв.
Г.Цогтсайхан Австралийн Сүүдрийн Гадаад хэргийн сайд хатагтай Бишоптой мөн уулзсан ба Австралийн Олон улсын Хөгжлийн агентлагийн захирал Питер Бакстер, Орлогч захирал Жэймс Батли, Австралийн Эрдэс баялаг, эрчим хүч, аялал жуулчлалын Яамны нарийн бичгийн дарга Комли нартай албан ажлын уулзалтууд хийхдээ Австралийн Засгийн газраас Монгол Улстай хөгжлийн хамтын ажиллагааны салбарт 2012-2016 онд харилцах таван жилийн стратегийн хөтөлбөрөө баталсанд Монгол Улсын Засгийн газрын нэрийн өмнөөс талархал илэрхийлэв.
Төрийн нарийн бичгийн дарга Г.Цогтсайхан Австралийн Сэргээгдэх эрчим хүчний агентлаг, Австралийн Гадаадын хөрөнгө оруулалтыг зохицуулах зөвлөл, Австралийн Эрчим хүчний бодлогын хүрээлэн, Австралийн Аялал жуулчлалын агентлаг, Канберрагийн Их сургуулийн удирдлагуудтай тус тус уулзаж хамтран ажиллах талаар санал харилцан солилцов.
