МАХН-ын бага чуулганы дуулиан тасрахгүй байна. Өмнө нь энэ чуулганы үеэр УИХ-ын гишүүн О.Баасанхүү зодоон хийсэн, У.Барсболд арав гаруй бөхчүүд дагуулж ирсэн гээд сонирхолтой мэдээлэлүүд хөвөрч байсан юм. Хамгийн сүүлийн байдлаар энэ намынхан Ерөнхийлөгчийн сонгуульд нэр дэвшсэн Н.Удвалынхаа эсрэг зарга хийж СЕХ-нд хандахаар болжээ. Тэд МАХН-ын Бага чуулган 224 гишүүнтэй. Гэхдээ хуралд 117 гишүүн хүрэлцэн ирсэн гэж мэдээлсэн учир хурлаа эхлүүлсэн. Тоолоод үзэхэд 95 хүн байсан аж. Тэдний дунд урилгаар суусан МАХН-ын гишүүн бус хүмүүс нилээд хэд харагдсан. Ингээд тоолвол хуралд 90 хүрэхгүй хүмүүс суусан болж таарсан. Тиймээс Н.Удвалыг нэр дэвшүүлсэн энэ хурал хууль бус, намын дүрмийн дагуу явагдаагүй учир бүртгэхгүй байна уу хэмээн СЕХ-нд хандахаар болжээ.
 
    Сонирхолтой нь намын ийм дотоод маргааны асуудлыг зохицуулсан заалт хуульд байхгүй гэнэ. Тухайн нам парламентад суудалтай л бол хэнийг ч дэвшүүлж болно.  Түүнээс биш аль нэгэн хурлынх нь олонхийн ирц бүрдээгүй учир бүтгэхгүй гэж СЕХ татгалзах эрхгүй бололтой. Тэгэхээр Н.Удвалыг татуулна гэж хичээж буй МАХН-ын Бага чуулганы гишүүдийн мөрөөдөл биелэхгүй аж.
    Гэхдээ Н.Удвалын нэрийг татуулах гэсэн санаачилгыг хэн гаргав? Яагаад энэ асуудлыг хөндөх болов? гэдэг тун сонирхолтой юм. Энэ асуудлыг хөндөж гаргаж ирсэн хүн нь НМХГ-ын дарга асан Г.Баярсайхан. Түүнийг Д.Тэрбишдагвын хүн гэж ярьдаг.  Эндээс хэргийн учир тайлагдаж мэднэ. Д.Тэрбишдагва МАН-аас нэр дэвшигч Б.Бат-Эрдэнийн ганц сайн найз. Өөрөөр хэлбэл Н.Удвалыг татуулах ажлыг найзыгаа дэмжсэн Д.Тэрбишдагва зохион байгуулсан болж харагдаж эхэллээ.

   Уг нь МАХН-ынхан анхнаасаа Б.Бат-Эрдэнийг дэмжихээр удаа дараа ярилцаж байв. Энэ намын хурал гурван өдөр дамнан хойшилж байхад МАН-ын дарга Ө.Энхтүвшин, нэр дэвшигч Б.Бат-Эрдэнэ нар Д.Тэрбишдагва, Ч.Улаан нартай удаа дараа уулзаж байсан гэнэ. Тэдний яриа хэлцэл ч амархан ойлголцож байж. Гэхдээ энэ ярианд аавынд байгаа Н.Энхбаяр гол үүрэгтэй оролцоогүй аж. Оролцоогүй ч гэж оролцуулаагүй бололтой. Үүнд бухимдсан, өөрөөс нь гадуур тоглолт хийх гэсэнд дургүйцсэн Н.Энхбаяр Г.Шийлэгдамба, Н.Удвал тэргүүтнийг дуудаж зөвлөлджээ. Ингээд МАХН-аас Н.Удвал гэсэн нэр дэвшигч Бага хурал болохоос хоёрхон цагийн өмнө сойгджээ. Дараа нь Н.Энхбаярын санаачилга дэмжлэгээр гэж цолуулсан Н.Удвал ирц хүрээгүй гэгдэх дуулиант хурлынхаа 95 хувийн саналыг аваад эрхээ өвөртөлжээ. Д.Тэрбишдагва, Ч.Улаан нар дэмий л бүлтгэнэсэн бололтой. Тэгээд гарц хайж Н.Удвал дүрэм бусаар нэр дэвшлээ гэж гоншигнож байгаа аж. Ийнхүү МАХН-ын дотоод зөрчил туйлдаа хүрч байна.

    Хэрэв дархан аварга Б.Бат-Эрдэнэ, Ө.Энхтүвшин хоёр нарсанд суугаа Н.Энхбаяртай сайтар ойлголцож чадвал Н.Удвалыг сонгуулийн дундаас нь татуулж болох өөр нэг хувилбар нь бодит байдалд илүү нийцнэ гэж эх сурвалж тайлбарлаа.