УИХ-ын өнөөдрийн чуулганаар Мөнгө угаах, терроризмыг санхүүжүүлэхтэй тэмцэх тухай хуулийн шинэчилсэн найруулгын анхны хэлэлцүүлгийг хийлээ. Хэлэлцүүлгийн эцэст олон санал, шүүмжлэл гарсны дараа гишүүдийн олонхи нь дэмжиж дараагийн хэлэлцүүлэгт бэлтгэхээр боллоо.

УИХ-ын гишүүн Ц.Оюунгэрэл "Энэ хууль гарснаар манай улсыг хар дансанд оруулахаас хамгаалж чадна. Хэрэв хар дансанд орчихвол Монгол Улсын аль ч банк, аль ч хэрэглэгч олон улсын хувьд сэжигтэн болж хувирна. Гадаад гүйлгээ бүрийг сэжигтэй гүйлгээ гэж үзэн хэдэн ч хоногоор саатуулдаг болно. Тиймээс яаралтай энэ хуулийг эхний ээлжинд батлах хэрэгтэй" гэв.

   Ц.Даваасүрэн гишүүн "Энэ заалт далд эдийн засгийг бий болгоно. 20 сая төгрөг гээд тогтчихвол дансаар биш гар дээрээс гүйлгээ хийж, вальютийн орлого багасна. Энийг засч амьдралд нийцүүлэх хэрэгтэй" гэлээ.

УИХ-ын гишүүн Ц.Нямдорж "Энэ төсөлд хэд хэдэн анхаарах ёстой асуудал байна. Гадныхан танайхыг хар дансанд оруулна гэж шахдаг нь үнэн. Гадаадын дарамтыг дамжуулагч нь Монгол банк байна. Энэ хуулийг батлаад хэрэгжүүлвэл банкны нууц гэж байхгүй болох нь. Мэдээллийг мөрдөн албаны шаардлагаар гаргаж өгнө, Санхүүгийн мэдээллийн албаны дарга гүйлгээг 45 хүртэлх хоногоор шууд зогсооно гэсэн байна. Хууль зүйн асуудал эрхэлсэн прокурор, тагнууль, гааль гээд 10 гаруй байгууллагаас бүрдсэн зөвлөл байх юм байна. 20 саяаас дээш хэмжээний төгрөг шилжүүлэх тоолонд ийм олон газраар дамжих нь байна. Тиймээс эхний хэлэлцүүлгийн дараа эдийн засагт хортой заалтуудыг авч хаях хэрэгтэй" гэсэн юм.