Ирэх сонгуулийн хамгийн содон явдал нь бөх хүн Ерөнхийлөгчид нэр дэвшсэн явдал. Түүний дэргэд Н.Удвал эмэгтэй хүн гэдгээрээ анхдагч хэдий ч төрд мэргэшиж, улс төрийн тогоонд он удаан жил чанагдсан, өндөр боловсролтой гэдгээрээ гайхал төрүүлэхгүй байгаа юм. Монголчууд үеийн үед хүчит бөхчүүдээ дээдэлсээр ирсэн. Ноёны бөх гэж байсан болохоос ноён бөх гэж байсангүй. Цаг эргэнээ гэж сайхан юм. Хаан бөхтэй болох эсэхийгзургадугаар сарын сүүлчээр шийднэ. Азийн орнуудаас эмэгтэй Ерөнхийлөгч төрж жендерийн асуудалд алхам урагшлаад байгаа энэ үед Н.Удвал нэр дэвшсэн нь уг нь анхаарал татах асуудлын нэг. Гэвч МАН-ын зүгээс Н.Удвалыг гутаан доромжлох ажлыг цаг наргүй хийж байна. За энэ ч яахав. Олигархиудын ганц чаддаг ажил. Харин монголчуудын хайр хүндэтгэлийг хүлээсэн дархан аварга энэ сонгуульд ямар тактикаар оролцох бол гэдэг нь анхаарал татах асуудлын нэг. Мэдээж хэрэг эхний ээлжинд өөрийн халаасны хүн гэгддэг үндэсний бөхийн холбооны тэргүүн Р.Нямдоржтой хамтран бөхчүүдийг сурталчилгаандаа ашиглах нь ойлгомжтой. Энэ ч утгаараа 21 аймагт байдаг үндэсний бөхийн холбооны салбар зөвлөлүүдийг сонгуулийн штаб болгож хувиргалаа. Мөн энэ хоёр эрхэм “Монголын үндэсний эмэгтэй бөхчүүдийн холбоо” гэгчийг байгуулан балайрах болов. Нэг үгээр хэлбэл ариун дагшин гэгдэж байсан үндэсний бөхийг эмс хүүхнүүдээр өргөжүүлэн тэлж хаан суудалд суух ужид хүсэлдээ ашиглаж байна. Хөх дэлэн нь сэрийсэн, үс нь сэгсийсэн баахан авгай нар наадмаар ноцолдох юмдаг уу даа. Эрх мэдэл гэдэг ийм л хорт хавдар шиг аж.

Б.Бат-Эрдэнэ аварга энэ сонгуульд гурван үндсэн PR-аар оролцох аж. Эхнийх нь Оюу толгойн асуудлыг хурцаар гаргаж тавих. Мань эр эхэндээ Оюу толгойд бараа шахах санаатай шантааж хийж байсан гэдэг. Монголын цорын ганц томоохон бүтээн байгуулалтыг эсэргүүцэн сонгуульд оролцсоноор хөрөнгө оруулагчдыг үргээж, барууныг биднээс холдуулж, эцэст нь хамаг баялгаа хятадуудад найр тавьж өгөх асуудалд оруулна.

Хоёрдугаарт: Монгол дээлийг рекламдана. Энэ нь жинхэнэ монгол, ард түмэнтэйгээ ойр хөдөөх цөлх нэгэн гэдгийг харуулж ард түмний хайрыг булаах арга аж. Уг ажлын хүрээнд хэдэн зуун дээлтэй бөх, мөн тооны дээлтэй бүсгүйчүүлийг сонгуулийнхаа сурталчилгаанд оролцуулах бололтой. Тэр өөрийгөө дэлхийн бүх хүмүүсээс шал өөр монгол хэмээн сурталчилснаар амжилтанд хүрнэ хэмээн ухаж ойлгожээ. Эцсийн эцэст бид бусад хүн төрөлхтөнгүйгээр оршин тогтноно гэж үгүйг гадарлаа болов уу, үгүй болов уу.

Гуравдугаарт: Үйлийн үртэй, зовж шаналж яваа Н.Энхбаярыг сурталчилгаандаа ашиглахаар төлөвлөжээ. Мань эр өргөст торны цаана өвчин зовлондоо шаналаж буй Н.Энхбаярыг эргэн очиж Ерөнхийлөгч болохоороо цагаатгах ам өгөх гэнэ. Уг ажлын хүрээнд их аварга уяхан сэтгэл гаргаж нулимс унагахаар бэлтгэл ажлаа хангаж байгаа сурагтай. Ингэснээрээ хүдэр бадар эрийн нүднээс уярал, өрөвдлийн нулимс урсахыг харсан ард түмэн хайраар цалгиж, саналаа давалгаалан өгнө гэдгийг тооцжээ.

Магадгүй зовж шаналж яваа Н.Энхбаярын нэрийг Н.Удвал ашиглах л байх. Гэхдээ арай ч зовлон гачлангаар нь тоглож, матрын нулимсаар ард түмнээ хуурах ухаан чагнуур барьсан эмч бүсгүйд заяахгүй нь ойлгомжтой. Цагаан нөмрөгтэй эмч хүн бусдад дандаа сайн сайхныг бэлэглэдэг. Тэр ч утгаараа өөрийг нь гутаан доромжилж буй МАН-ын эсрэг Н.Удвал сайд өнөөдрийг хүртэл ер дуугарсангүй. Хэн нь хэн бэ гэдгийг цаг хугацаа харуулах учраас эмзэглэл шингэсэн бичил нийтлэлээ ингээд өндөрлөе.