МАН-ынханы ялагдал яг дөрвөн жилийн босгон дээрээ эргэн ирлээ. Өөрөөр хэлбэл дөрвөн жилийн өмнөх Ерөнхийлөгчийн сонгуульд МАН ялагдал хүлээснээс хойш өнөөг хүртэл уруудан доройтсоор байна. Мэдээж энэ хугацаанд нэг ч удаа ялалт байгуулсангүй. Дараалсан олон ялагдал хүмүүсийг сэхэл авахуулдаг бол МАН-д тийм шинж тэмдэгийг харуулахгүй байна.
   Уг нь оны өмнөөс эхлээд л МАН Сүүдрийн Засгийн газар байгуулахаар санал нэгдээд байгаагаа сүртэй нь аргагүй зарласан. Гэтэл ийм шийдвэр гарснаас хойш багагүй хугацаа өнгөрсөн ч Сүүдрийн Засгийн газрын сураг байдаггүй. Одоо бүр ярихаа ч болив. Сураг сонсоход байгуулаагүй Сүүдрийн Засгийн газрынхаа бодлогоос болоод МАН-ынхан хоёр хуваагдсан байна.

   МАН-ын шинэ үеийнхэн Сүүдрийн Засгийн газрыг хурдхан байгуулаад дан залуучуудаар баг бүрдүүлээд шуурхай ажиллая гэсэн санаа гаргахад ахмадууд нь дэмжээгүй аж. Ахмадууд нь “залуучууд та нар тэгж хамаагүй хөдөлж болохгүй, асуудлыг буурь суурьтай судлах ёстой” гэсэн санал гаргаж. Өөрөөр хэлбэл залуучууд та бүхэн ахмадуудаа асуудлын гадна үлдээгээд өөрсдөө тэгж тодрохгүй шүү гэсэн санааг илэрхийлж. Хэрэв залуучууд нь ингээд тасраад явчихвал олон жил сойгдсон ахмадууд нь анхаарлын гадна үлдээд аяндаа мартагдаж дараагийн сонгуулиар бүр мөсөн улс төрөөс гарах үүд хаалга нь нээгдэнэ гэж үзсэн бололтой. Ийм зөрчлөөс болоод МАН-ын Сүүдрийн Засгийн газрын сураг алдарчээ. Ингээд ахмад, залуу үе хоёрын хоорондын зөрчил Сүүдрийн Засгийн газрыг амьдруулж чадахгүй байна. Уг нь МАН-ыг АН-тай харьцуулбал парламентад хамаагүй олон залуучуудтай. Ж.Энхбаяр, С.Бямбацогт, Я.Содбаатар, Д.Сумьяабазар, Ж.Эрдэнбат, Л.Энх-Амгалан, Б.Чойжилсүрэн Н.Номтойбаяр, О.Содбилэг гээд бүтэн эгнээ хөвөрнө. Эдгээрийг ахмадууд нь хориглон хамгаалснаар Сүүдрийн Засгийн газар байгуулагдаагүй байхдаа “нүд аньсан” бололтой. Тэгээд ч МАН-ын ахмадууд сүүлийн үед залуучуудаа зэмлэж сургамжлахдаа НАМЗХ-гоо идэвхижүүлж чадахгүй байж Сүүдрийн Засгийн газар гэж том юм ярих хэрэг байна уу даа гэж ам асуудаг болсон гэнэ. Энэ ч үнэний ортой тохуурхал л даа. Сонгуулийн өмнөөс эхлээд сонгуулиас хойш өнөөг хүртэл энэ холбоо сүртэй арга хэмжээ нэгийг ч хийгээгүй. Байгуулагдсанаасаа хойш хийсэн хамгийн том ажлуудыг нь түүхэндээ анх удаагаа намынхаа эсрэг жагссан, Н.Энхбаярыг гутаан доромжилсон, Сүхбаатарын талбай дээр авлигалын хана өрж байгаад өшиглөж унагаад дэвссэн зэрэг нь ордог. Сүүлийн үед энэ холбооныхон энэ тэндэхийн шоу арга хэмжээ, хүлээн авалтын ажлаас өөр сүртэй юм хийдэггүй учир ахмадууд нь ам асууж парламентын залуу гишүүдийг ичээх болсон хэрэг. Хамгийн сүүлийн мэдээллээр тус холбооныхон сонгуулийн үеэр “Number one аварга” хэмээх хөдөлгөөнийг өрнүүлэхээр ажиллаж байгаа сурагтай.
   Уг нь өдийд МАН Сүүдрийн Засгийн газараа байгуулчихсан бол дураараа дургих Засгийн газрын гишүүдэд хяналт тавиад нийгмийн анхаарлыг татаж байх цагсан. Ингэснээр нэр дэвшигч Б.Бат-Эрдэнийгээ ялалт байгуулахад нь нөлөөлөх том хүч болж чадах байлаа. Даан ч тэгж чадсангүй.

   Сүүдрийн Засгийн газраас болж түнжин хагарсан МАН-ын залуучууд болоод ахмадын хоорондын харилцаа яаж төгсөхийг удахгүй болох сонгууль яруу тодоор харуулна. Учир нь МАН сонгуульд амжилтгүй оролцвол удирдлагынх нь хүрээнд үе солигдох процесс явагдаж магадгүй гэж эх сурвалж тайлбарлаж байна.