Төрийн ордны Их танхимд “Хуулийн засаглал ба шударга ёс” үндэсний хоёрдугаар чуулган болж байна. Чуулганд Ерөнхий сайд Н.Алтанхуяг оролцож үг хэллээ. Тэрбээр чуулганд оролцогчдод хандаж зөвхөн дэд бүтцийн асуудал сайжирч, шатахуун, нүүрсний үнэ буурсан зэрэг ажил хийж байгаа ч хуулийн засаглалгүйгээр, шударга ёсгүйгээр үр дүнд хүрч чадахгүйг хэлсэн юм.

    Ерөнхий сайд Н.Алтанхуяг "Хүнд суртал, авлигыг утсгахгүйгээр бид цаашаа явахгүй байна. 1111 төвд ирсэн хүсэлтийн ихэнхи нь шударга ёс асуусан иргэд байна. Иргэд хүсч, найдахын хэрээр бидэнд ирэх ачаа маш их нэмэгддэг. Хуулийн салбарынхны ачаа хэдэн мянган тонн.
    Засгийн газар гурван зарчим  баримталж байгаа. Нэгд, асуудлыг шийдэхийн тулд иргэдийн оролцоог хангах. Хоёрт, ил тод байх. Ялангуяа тендерийн асуудлыг ил тод байлгах хэрэгтэй. Гуравт, усанд хаясан чулуу шиг алга болохгүй ажлаа буцаж тайлагнах. Гэхдээ бид нэг өдөр, найман сарын хугацаанд бүх зүйлийг өөрчилж чадахгүй. Зарим нь давраад алтан загасны эмгэн шиг хүсэлт тавьж байна. Гэхдээ энэ бол муу зүйл биш. Иргэд төр засагтаа итгэж, өөрчлөгдөх гэж оролдож байна. Найман сард бий болсон итгэлийн жоохон галыг өрдөхөд хуульчдийн хүч хэрэгтэй. Зөвхөн энэ салбартаа биш иргэдийн эрхийг хамгаалахад хуульчид гол үүрэгтэй байна. Бизнесийн салбарт ажлаа явуулах, эрх чөлөөт Монгол оронд амьдрах орчинг сайжруулъя" гэлээ. 
 
   Яг одоо Хууль зүйн сайд Х.Тэмүүжин шүүхийн шинэчлэлийн талаар илтгэл тавьж байна.