Монгол Улсын Ерөнхийлөгчийн сонгуульд Ардчилсан намаас нэр дэвшигч Ц.Элбэгдорж өнөөдөр нэр дэвшигчийнхээ үнэмлэхийг авсан билээ. Тэрээр Дорнод аймгаас сонгуулийн сурталчилгаагаа эхлэхээр гарч, замдаа Яармаг дахь Шунхлайн бензин колонкоос "Мон 93" бинзенээр  машинаа цэнэглэн хөдөллөө.

Эх орны газрын тосоор үйлдвэрлэсэн шатахуун авах болсон талаараа тэрээр “Монгол нутгийн газрын тос шингэсэн бензинээр машинаа цэнэглээд гарч байна. Энэ бол бэлгэшээлтэй зүйл юм. Манай анхны Ерөнхийлөгч П.Очирбат гуай анх Монголын газраас газрын тос гарахад дээлээ мялааж угтаж байсныг хүн бүхэн санаж байгаа. Одоо бидэнд хийдэг цаг, хийж бүтээх боломж байна. Монголчуудын хувьд, Монгол орны хувьд улирлаасаа шалтгаалаад хийдэг цаг бага байдаг. Монголчууд одоо нэгдэж хийх зүйлээ хийх хэрэгтэй. Яг энэ шатахуун шиг Монгол Улс цаашаа гал алдахгүй байх ёстой. Монгол цаашдаа нутаг дээрээ газрын тосоо боловсруулж шатахуун үйлдвэрлэдэг болъё. Цахилгаанаар өөрийгөө хангадаг болгоё. Төмөр замын асуудлаа маш хурдан шийдвэрлэе. Үйлдвэрлэлээ босгоё. Уул уурхайн бүтээгдэхүүн, хөдөө аж ахуйн бүтээгдэхүүнээ эцсийн бүтээгдэхүүн болгож хийе. Энэ чиглэлд бүх хүч чадлаа зориулж ажиллах шаардлагатай. Үүн дээр бүгдээрээ нэгдье. Нэг улс, нэг багийн гаргах амжилт нэг л байх ёстой. Энэ бидний хийсэн бүтээснээр гарч ирнэ. Хийж бүтээсэн бүхнийг дэмжинэ. Үүнийг бэлгэдэж Монголын газрын тосоор үйлдвэрлэсэн шатахууныг унаандаа хийж байна” гэж байв.