Ийм яриа шаргал ордноос эрчимтэй тарж эхэллээ. Гэхдээ албан эх сурвалж үүнийг хүлээн зөвшөөрөөгүй бас үгүйсгээгүй байна. Эх сурвалжийн мэдээлж байгаагаар бол сүүлийн үед Ерөнхий сайд Н.Алтанхуяг, ЗГХЭГ-ын тэргүүн дэд дарга Ш.Солонго хоёрын зөрчил нилээд ширүүсчээ. Уг нь Н.Алтанхуяг Ерөнхий сайд болсныхоо дараа л Ш.Солонгыг чөлөөлөх чиглэл өгсөн байдаг. Гэтэл Ч.Сайханбилэг “Бидэнд ийм туршлагатай, ноён нуруутай хүн хэрэгтэй” гээд аваад үлдчихжээ. Ингээд Ш.Солонго шинэ Ерөнхий сайдтайгаа гар нийлэн ажилласан байна. Харин замын дундаас гэнэт энэ хоёр эрхмийн харилцаа яагаад хүйтрэх болов гэдэг ихээхэн анхаарал татаж эхэллээ.

   Учир мэдэх хүмүүсийн тайлбараар бол Ерөнхий сайд Н.Алтанхуягийн хууль зөрчсөн нэг бус үйлдлийг Ш.Солонго тэвчилгүй хэлдэг болжээ. Энэ нь мэдээж засгийн тэргүүнд таалагдаагүй аж. Ингээд л Засгийн газрын ордны нэг жигүүрт хоёр том дарга хоёр тийшээгээ хараад суучихжээ. Сүүлдээ ч Ш.Солонго дарга хууль бус байна гээд нэг бус юманд хөдлөхөө байж. ЗГХЭГ-ын дэд дарга Г.Дэнзэн энэ байгууллагад ажилладаггүй хүмүүсийг ажилладаг гэж албан тоот хийж явуулсан нь харилцааг бүр хүйтрүүлжээ. Үүнийг мэдсэн Ш.Солонго дарга Г.Дэнзэнг дуудаж төрийн нэрийг барьж хууль бус юм хийлээ, үүнийгээ зогсоо эсвэл яагаад ингэх болсноо тайлбарла гэж шахсан юм уу даа. Мэдээж Г.Дэнзэн хар хурдаараа гүйж очоод Ерөнхий сайд ахдаа алтан хошуу хүргэжээ. Учир нь хөөрхий Г.Дэнзэн ч тэр хүмүүсийг дур мэдэж тодорхойлоогүй бололтой байдаг. Том дарга нар үүрэг өгөөд л хамаатнуудаа аваад яв гэж шахсан сурагтай. Үр дүнд нь гарын үсэг зурснаараа Г.Дэнзэн бурууджээ. Бас нэг томоохон хардлага байна. Ерөнхий сайд Засгийн газрын хөрөнгөнөөс хувийн аж ахуйн нэгж рүү шилжүүлэхийг Ш.Солонго даргад үүрэг болгосон. Үүнийг нь Ш.Солонгос бас л хууль бус гээд шийдвэрлээгүй бололтой. Иймэрхүү хардлагаас болж Ш.Солонго даргыг чөлөөлсөн гэсэн яриа улам газар авах нь.

   Юутай ч гэсэн  Ерөнхий сайдын олон удаагийн шийдвэрийг сөрөн зогссон Ш.Солонго эцэстээ албаа өгснөөр Засгийн газрыг баяртай гэжээ. Гэтэл засгийн урт гар түүнийг зүгээр байлгахгүйгээр шийдсэн бололтой. Зарим тушаал шийдвэртэй нь холбон шалгах шинэ ажлыг эхлүүлсэн сурагтай. Ш.Солонго дарга төрийн өмчийн нилээд олон аж ахуйн нэгжийн ТУЗ-д багтдаг байж. Энэ асуудалтай нь холбон түүнийг шалгах шалтгаан шаардлага урган гарсан аж.
    Ерөнхий сайдыг сөрж, хадам дүү Г.Дэнзэнг нь чадваргүй гэж хамт олныхоо дунд айхгүй тодорхойлсон Ш.Солонго гэж хэн бэ? Учир мэдэх хүмүүсийн тайлбараар бол энэ хатагтай Засгийн газарт хорь гаруй жил ажиллажээ. Анх мэргэжилтнээс нь эхлээд ЗГХЭГ-ын тэргүүн дэд дарга болтлоо дэвшжээ. Бас Ц.Элбэгдоржоос МУ-ын гавьяат хуульч гэсэн цолыг ч авч. Хорь гаруй жил ЗГХЭГ-т ажиллана гэдэг бол МАН, АН-ын сүүлийн бүх Ерөнхий сайдуудтай хамтран ажилласан гэсэн үг юм. Бас Ш.Солонгыг хамтран ажиллагсад нь төдийлөн ил, далд муулаад байдаггүй аж. Хамгийн чадварлаг хууль. Асуудлаа ч, ажилаа ч мэддэг дарга байсан гэх юм. Түүнийг хууль зөрчсөн юм хийх хүн биш гэж ордны эх сурвалжууд тайлбарлаж байна. Учир нь тэр хуулийг маш сайн мэддэг учраас өөрөө ч зөрчихгүй ямар ч дарга нарт хууль зөрчих гэсэн асуудлаар нь эвтэйхэн зөвлөгөө өгөөд болиулчихдаг хүн гэж ам сайтай байх юм. Гэтэл яагаад Н.Алтанхуяг түүнийг халав. Халаад зогсохгүй шалгуулах ямар шалтгаан байна вэ гэдэг нь анхаарал татна. Энэ бүхэнд тэр өөрөө л хариулж чадна.

   Удахгүй Ш.Солонго дарга ам нээж ажлаас чөлөөлөгдөх болсон үндэслэл, Засгийн газрын хууль зөрчсөн шийдвэрүүд бий юу, бусдын яриад, тараагаад байгаа шиг Н.Алтанхуяг түүнийг Засгийн хөрөнгөнөөс мөнгө шилжүүл гэж тулгасан уу гэх мэт тодорхой асуудлаар тайлбар хийвэл олон юмны учиг тайлагдана. Тиймээс хүмүүст Ш.Солонго даргын тайлбар сонин байх нь гарцаагүй боллоо.