Өнгөрсөн УИХ-ын сонгуулийн будлиан дуусаагүй байхад дараагийнх нь сонгууль эхэллээ. Жил дамнан үргэлжилсэн сонгуулийн маргаан төгсөх битгий хэл харин ч хүчээ авах шинжтэй болов. Учир нь МАН-ынхан удтал ярилцсаны эцэст Өвөрхангайн сонгуулийг будилиантуулсан гэх хоёр охиныг дахин цагдаад өгч шалгуулахаар тохиролцжээ. Дахин гэдгийн хувьд сонгууль будлиантуулсан гэх хоёр охиныг өмнө Өвөрхангай аймгийн МАН-ын хороо цагдаад шалгуулахаар ханджээ. Гэхдээ “Манай аймгийн сонгуулийг будлиантуулсан гэх маргаанд ийм хоёр охин холбогдсон байна. Эдгээр охидыг сонгуулийн сурталчилгаанд ажиллуулаагүй. Гэтэл ажилласан гээд хоёр охиныг зураг гаргаад ирлээ. Энэ асуудлыг шалгаж, эдгээр охидоос тодруулга авч асуудлыг шийдвэрлэж өгнө үү” гэсэн хүсэлтийг гаргасан байдаг. Сонирхолтой нь Өвөрхангай аймгийн цагдаа нэгдүгээрт эдгээр охид насанд хүрээгүй байна, хоёрдугаарт уг маргааны асуудлаар шүүхийн шийдвэр гарсан учир шалгах шаардлага байхгүй гэсэн тайлбар хийгээд хэргийг хаачихжээ.     Ингээд Өвөрхангайн сонгуулийг будлиантуулсан гэх хоёр охин өнөөг хүртэл хуулийн байгууллагад ямар нэгэн тайлбар өгөөгүй явж иржээ. Энэ хоёр охиныг МАН сонгуулийн сурталчилгаандаа яг оролцуулсан уу? Хэрэв оролцуулсан бол ямар хэлбэрээр оролцуулсан бэ гэдгийг хэн ч тогтоогоогүй аж. Бас тэдгээр охидтой байгуулсан гэрээ байхгүй, мөнгө өгсөн баримт нотолгоо байдаггүй аж. Ганцхан МАН-ын футболкийг өмссөн нь буруудах шалтгаан болжээ. Тэгвэл энэ футболкийг хаанаас авч өмссөн, хэн өгсөн, ингэж өмсөөд сурталчилгаа хийж явсан уу гэдэг ч тогтоогдоогүй юм байна.   
     Тэр хоёр охиноос шүүх хийгээд цагдаа нэг ч удаа мэдүүлэг тайлбар аваагүй аж.
МАН-ынхан хэлэхдээ “Бид ийм хүүхдүүд ажиллуулаагүй” гэдэг АН-ынхан болохоор баримттай гэдэг аж. Тэгсэн мөртлөө маргааны бай болсон охидууд тайлбар хийлгүй өнөөг хүрэв. Эх сурвалжийн мэдээлж байгаагаар бол маргааны бай болсон хоёр охин 18 нас хүрээгүй оюутнууд аж. Өвөрхангай аймгийн тойргийн хорооноос шүүхэд өгсөн бичигт энэ хоёр хүүхэд насанд хүрээгүй нь үнэн. Гэхдээ МАН-аас ухуулагч болон шадар туслахаар ажиллахаар тойргийн хороонд бүртгүүлж үнэмлэх авсан ухуулагч, шадар туслагч нарын дотор нэр нь байхгүй гэсэн бичигийг хийж өгсөн байдаг гэнэ.
Өвөрхангайд ард түмний сонголтоор ялсан атлаа шүүхийн шийдвэрээр ялагдал хүлээсэн С.Чинзориг нэгэнтээ “Би тэр хоёр охины нүүр царайг нь ч хараагүй. Энэ асуудал шүүх дээр очоод Хан-Уул дүүргийн болон Өвөрхангай аймгийн шүүхийн шийдвэр гарсны дараа есдүгээр сард анх удаа царайг нь харсан” гэж өгүүлсэн байдаг.
 Тиймээс УИХ дахь хоёр суудлын хувь заяанд нөлөөлсөн хоёр охины царайг харах хүсэлтэй хүмүүс их байх нь гарцаагүй. Хэний хүүхэд ийм хэл аманд өртөв? Үнэхээр сурталчилгаанд оролцсон уу? Эсвэл улс төрийн золиос болсон уу? Цаашид залууст сургамж болгох үүднээс сонгуулийн тойргийн асуудал шийдэгдсэн ч маргаан дуусаагүй асуудлыг шалгуулах ёстой. Хожим хойно ч гэсэн ард түмэн үнэнийг мэдэх хэрэгтэй гэдэг үүднээс сөрөг хүчин Өвөрхангайн асуудлыг орхихгүй байхаар шийджээ. Ядаж л тэр хоёр охиноос тайлбар авах ёстой, сонгуулийн сурталчилгаанд оролцсоно уу гэдэг талаар байр сууриа илэрхийлэх боломжийг нь олгоё гэх асуудлыг сөхөн тавих гэнэ. Нэр дэвшигч С.Чинзориг энэ асуудлыг орхих хүсэлтэй байгаа бол МАН нь орхих хүсэлтгүй байгаа аж. Тэд “Үнэн хэзээд ялна. Үнэнийг тогтоолгох хүртлээ явна” гэж байгаа аж. Тиймээс Өвөрхангайн гишүүд тодорсон ч гэсэн маргаан нь үргэлжилсээр байх нь.