УИХ-ын чуулганы өнөөдрийн үдээс өмнөх хуралдаанаар “Тогтоолын хавсралтад нэмэлт оруулах тухай” Улсын Их Хурлын тогтоолын төслийн эцсийн хэлэлцүүлгийг хийлээ. Төсвийн байнгын хороо өчигдөр үдээс хойш хуралдаж тогтоолын төслийн эцсийн хэлэлцүүлгийг хийсэн юм. Энэ талаарх байнгын хорооны санал, дүгнэлтийг гишүүн Л.Эрдэнэчимэг танилцуулав.
Тогтоолын төслийн анхны хэлэлцүүлгийг чуулганы нэгдсэн хуралдаанаар хийх үед төсөлд хөндөгдөж орж ирсэн барааны кодыг шинэчилсэн кодын дагуу өөрчлөх, мөн тогтоолын хэрэгжих хугацааг 2014 оны нэгдүгээр сарын 1-ний өдрөөс тогтоох саналууд олонхийн дэмжлэг авсныг төсөлд нэмж тусган эцсийн хэлэлцүүлэгт бэлтгэжээ.
Ингээд тогтоолын төслийг батлах санал хураалт явуулахад чуулганы нэгдсэн хуралдаанд оролцсон гишүүдийн 65.3 хувь дэмжлээ.
Дараа нь Монгол Улсын 2014-2016 оны төсвийн хүрээний мэдэгдлийн тухай хуулийн төслийн эцсийн хэлэлцүүлгийг хийж, энэ талаар Төсвийн байнгын хорооны санал, дүгнэлтийг гишүүн Д.Хаянхярваа танилцуулсан юм. Тус байнгын хороо өчигдөр үдээс хойш хуулийн төслийн эцсийн хэлэлцүүлгийг хийж, чуулганы нэгдсэн хуралдаанаар төслийн анхны хэлэлцүүлгийг хийх үеэр олонхийн дэмжлэг авсан саналуудыг төсөлд нэмж тусган эцсийн хувилбарыг бэлтгэжээ. Хуулийн нэрийг “Монгол Улсын нэгдсэн төсвийн 2014 оны төсвийн хүрээний мэдэгдэл, 2015-2016 оны төсвийн төсөөллийн тухай” гэж, эдийн засгийн үндсэн үзүүлэлт дэх “Хэрэглээний үнийн индексийн түвшин” гэснийг “Хэрэглээний үнийн индексийн дундаж түвшин” гэж тус тус өөрчлөхөөр төсөлд тусгасан байна.
Байнгын хорооны санал, дүгнэлттэй холбогдуулан гишүүн С.Бямбацогт, Ц.Нямдорж, Л.Энх-Амгалан нар байнгын хорооны дарга, төсөл санаачлагч болон ажлын хэсгээс зарим зүйл тодруулав. Тухайлахад гишүүн Ц.Нямдорж зэс, нүүрс, төмрийн хүдэр, жонш, бензин шатахууны үнийг хэрхэн тооцож төсөлд тусгасныг тодруулахад Сангийн сайд Ч.Улаан хуулиараа зэс, нүүрсийг тэнцвэржүүлсэн үнийн зарчмаар, бусад бүтээгдэхүүний үнийг зах зээлийн зарчмаар тооцох учиртай гэдгийг хэлэв. Зөвхөн ирэх оны тухайд гэхэд зэсийг үнийг 6423.9, боловсруулсан нүүрсийг 120.2, төмрийн хүдрийг 125, жоншийг 200 ам.доллар байхаар, харин бензин шатахууны үнийг энэ оны түвшинд байхаар тооцож тусгасан юм байна.
Чуулганы нэгдсэн хуралдаанд оролцсон гишүүдийн 59.2 хувь нь дэмжсэнээр Монгол Улсын 2014-2016 оны төсвийн хүрээний мэдэгдлийн тухай хуулийн төсөл батлагдлаа.
Үүний дараа нь Засгийн газрын тусгай сангийн тухай хуульд нэмэлт оруулах тухай хуулийн төслийн эцсийн хэлэлцүүлгийг хийлээ. Энэ талаарх Төсвийн байнгын хорооны санал, дүгнэлтийг гишүүн Ц.Оюунбаатар танилцуулав.
Тус байнгын хороо өчигдөр үдээс хойш хуралдаж, хуулийн төслийн эцсийн хэлэлцүүлгийг хийсэн юм. Энэ үеэр гишүүн Л.Эрдэнэчимэг, Д.Батчимэг нар Монгол судлалыг дэмжих сангийн хөрөнгийг монгол судлалын номын сан, мэдээллийн нэгдсэн сан байгуулж баяжуулах, монгол судлаач бэлтгэх, давтан сургах зорилгоор тэтгэлэг олгох, гадаад дахь монгол судлалын төвүүдийг хөгжүүлэх, сэргээх, шинээр байгуулахад дэмжлэг үзүүлэх, гишүүн С.Дэмбэрэл сангийн хөрөнгийг монголч эрдэмтдийн шилдэг бүтээлийг хэвлүүлэхэд санхүүгийн дэмжлэг үзүүлэх зориулалтаар зарцуулах зэрэг санал гаргасныг байнгын хорооны гишүүд дэмжжээ.
Ингээд байнгын хорооноос гаргасан саналын томъёоллоор санал хураалгахад чуулганы нэгдсэн хуралдаанд оролцсон гишүүдийн 80.9 хувь нь хуулийн төслийг батлахыг дэмжлээ гэж УИХ-ын Хэвлэл мэдээлэл, олон нийттэй харилцах хэлтэс мэдээлэв.
