Өнөөдөр АН-ын удирдлагууд тус намын сонгуулийн ерөнхий штабын байранд сэтгүүлчдэд мэдээлэл өглөө. АН-ын ерөнхий нарийн бичгийн дарга Ц.Оюундарь, Ерөнхийлөгчийн Тамгын газрын Олон нийттэй харилцах менежер А.Ганбаатар нарын хүмүүс МАН-ын зүгээс сөрөг мэдээлэл цацаж байгаад зарим тайлбар хийсэн юм.

  АН-аас нэр дэвшигч Ц.Элбэгдоржийн хувьд орон нутгаар сонгуулийн сурталчилгаагаа хийж яваа. Харин хойгуур нь түүнийг ном үнэгүй тараасан, "Монгол тулгатны 100 эрхэм" нэвтрүүлэгт мөнгө төлсөн, Сонгуулийн тухай хууль зөрчсөн гэх мэдээллийг МАН-аас хийж байгаа нь үндэслэлгүй гэлээ. Мөн "Оюутны тэтгэлгийн картан дээр бичигдсэн “Цалинтай оюутан бол Хариуцлагатй оюутан” Ц.Элбэгдорж гэсэн үг нь хууль зөрчсөн асуудал биш гэв. Оюутны мөнгийг банкаар биш картаар өгөх шийдвэр аль гуравдугаар сард гарсан бөгөөд тухайн банкны хүмүүс энэ үгнээс оюутнууд нэгийг бодох биз хэмээн сэтгэсний үндсэн дээр бичсэн" гэж Ерөнхийлөгчийн Тамгын газрын Олон нийттэй харилцах менежер А.Ганбаатар тайлбарлалаа.  АН-ын Ерөнхий нарийн бичгийн дарга Ц.Оюундарь “Нийгэмд сөрөг мэдээлэл өгч, нийгмийн сэтгэлзүйд нэг нэр дэвшигчийг хар хэрээ, нөгөөг нь энхийн цагаан тагтаа болгож харагдуулах гэсэн бусад намуудын үйлдэлд харамсч байна" гэлээ.