Ерөнхий сайд Н.Алтанхуяг эрх мэдлээ хэтрүүлэн өөрийнхөө төрсөн дүүгийн 23 настай охиныг 17 тэрбумын тендерт шалгаруулсан яриа ихээхэн дуулиан дэгдээсэн. Энэ нь зөвхөн яриа болоод зогсоогүй асуудал боллоо. Уг асуудлаас нь үүдэн сөрөг хүчин Засгийн тэргүүнийг огцруулах гэж үзсэн ч олонхийн хүчээр албандаа үлдсэн. Арга ядсан сөрөг хүчин АТГ энэ асуудлаар нь хандсан юм. Тэгвэл өнгөрсөн долоо хоногийн сүүлээр УИХ-дахь цөөнхийн бүлэгт АТГ-аас албан ёсоор хариу ирүүлжээ.

    Уг албан тоотод дурдсанаар бол АТГ та бүгдийн хөндөж тавьсан асуудлыг хуулийн хүрээнд судаллаа. “Эрдэнэс Тавантолгой” компанийн тендер хуулийн дагуу явагдсан эсэхийг хянаад, эрүүгийн хэрэг үүсгэн шалгах үндэслэл байна хэмээн манай байгууллага үзлээ. Тиймээс уг хэргийг үргэлжлүүлэн шалгах зөвшөөрлийг прокурорын байгууллагаас авахаар хүсэлт хүргүүлсэн талаараа бичсэн байна. Өөрөөр хэлбэл АТГ-ынхан Ерөнхий сайд Н.Алтанхуягийг эрх мэдлээ хэтрүүлэн эрүүгийн шинжтэй хэрэг үйлдсэн гэж үзжээ. Энэ шийдвэрийг сонссон олон нийт АТГ-ыг шударга сайн ажиллаж байна хэмээн ярилцаж эхэллээ. Учир нь өмнө энэ хэргийг хэрхэн шийдэхээс уг байгууллагыг шударга хийгээд шударга бус ажилладагийг мэдэж болно гэсэн мэдээлэлүүд хөвөрч байсан юм.

    Харин одоо УЕПГ уг хэргийг шалгах зөвшөөрлийг өгөх эсэх нь ихээхэн эргэлзээ төрүүлж мэднэ гэж эх сурвалж тайлбарлав. Зарчим хийгээд хуулиараа бол нэгэнт АТГ ингэж үзсэн тохиолдолд прокурорын байгууллага шууд зөвшөөрөл өгөх ёстой аж. Харин эх сурвалжийн хардаж байгаагаар бол УЕП Д.Дорлигжав Ерөнхий сайд Н.Алтанхуяг хоёр өмнө нь нэг нам байсан бас нэг нутгийн сайн найзууд гэнэ. Энэ холбоо харилцаа нь Н.Алтанхуягийг шалгахгүй өнгөрөөх үндэслэл байж болох талаар саарал ордныхон ярилцаж эхэлжээ. Хэрэв ийм үйл явдал болбол МАН-ынхан бас л улс төржих нь гарцаагүй. Харин зөвшөөрөл өгвөл АТГ Ерөнхий сайд Н.Алтанхуяг болоод түүний төрсөн дүүгийн 23 настай охин Г.Уянга, ЗГХЭГ-ын дэд дарга Г.Дэнзэн зэрэг хамаатнуудынх нь сүлжээг шалгах юм. Учир нь “Эрдэнэс Тавантолгой” компанийн 17 тэрбумын тендерт Ерөнхий сайд Н.Алтанхуягийн төрсөн дүүгийн охин Г.Уянгын “Gobi power” компани ялсан юм. Дөнгөж ганц сая төгрөгийн дүрмийн санатай байсан энэ компани нь нэг л өдөр тэрбум төгрөгийн дүрмийн сантай болж долоо хоногийн дараа 17 тэрбумын ялагчаар тодорсон. “Эрдэнэс-Тавантолгойн” тендерт ялагч Г.Уянга нь ЗГХЭГ-ын дэд дарга Г.Дэнзэнгийн эхнэр. Г.Дэнзэн нь “Эрдэнэс-Тавантолгойн” ТУЗ-ийн дарга гээд ойлгоход бэрх холбоо сүлбээтэй.

    Сонирхолтой нь АТГ-ынхан МАН-ын өөр нэг хүсэлтэд ямар нэгэн хариу өгөөгүй үлдээжээ. Тэр нь иргэний бичиг баримтыг хуурамчаар үйлдсэн гэж УБЕГ-ынханыг давхар шалгуулахаар хандсан асуудал юм. Учир нь Н.Алтанхуягийн холбоотой гэх тендерийн будилан дэгдэнгүүт УБЕГ-ынхан нэг өдрийн дотор Г.Уянгыг Ч.Уянга болгон сольсон мэдээллийг МАН-ынханд өгсөн юм. Үүнийг нь МАН-ынхан илрүүлж бас л асуудал болгосон. Энэ талаараа тодорхой хариу аваагүй МАН-ынхан өнгөрсөн долоо хоногт ХЗДХ-ийн сайд Х.Тэмүүжинд албан тоот илгээжээ. Уг албан тоотод “УБЕГ-т иргэний бүртгэлийн хууль бус өөрчлөлт хийгдсэн ноцтой хэрэгт анхаарал хандуулж, харьяаллын дагуу цагдаагийн байгууллагаар шалгаж өгнө үү” гэжээ. Тэгээд ч энэ асуудлыг АТГ гэхээсээ илүү ЦЕГ шалгах ёстой.

    Ийнхүү МАН-ын эхний зарга амжилттай боллоо. Одоо тэд ЦЕГ, УЕПГ-ын хариуг хүлээж эхэллээ. Харин Н.Алтанхуяг эрүү үүсгэх гэсэн АТГ-ынхантай хэл амаа ололцох хэцүүхэн ажилтай золгочихлоо. Улс төрийн хоёр гол намын энэхүү зөрчил хийгээд хуулийн байгууллагын шийдвэрүүдийг олон түмэн анхааралтай ажиглаж байна.