Ойрын өдрүүдэд Ерөнхий сайд Н.Алтанхуягтай холбоотой хэл ам, хэрүүл шуугиан тасрахгүй байна. Н.Алтанхуяг сайдын ажлаас нь чөлөөлсөн ТЕГ-ын тэргүүн дэд дарга Ч.Чулуунбаатар болон Төрийн өмчийн хорооны дарга Ц.Нанзаддорж нар эхнээсээ шүүхдээд ялаад байна. Өөрөөр хэлбэл Ерөнхий сайд Н.Алтанхуягийг хууль бусаар томилгоо хийсэн хэмээн шүүх дүгнэж, үндэслэлгүйгээр халагдсан хүмүүсийг ажилд нь эргүүлэн томилж байна.

   Тэгвэл хэл амтай томилогдсон ТЕГ-ын дарга Б.Ариунсанд ажлаа өгөөд байгаа Д.Гэрэлийг ямар шалтгаанаар ажлаас  чөлөөлсөн нь мөн тодорхойгүй байна. Б.Ариунсанг анх энэ газрын дэд даргаар томилсон ч мэргэжлийн бус хүн гэж Үндсэн хуулийн цэц үзсэн учир болиулсан. Гэтэл туршлагатай дипломатч Д.Гэрэлийн оронд дарга болоод эргээд ирсэн. Түүнийг энэ албанд томилсноо Ерөнхий сайд Н.Алтанхуяг "Би ганц агентлагийн дарга томилж болохгүй юу?" гэж толгойгоороо даана гэдгээ мэдэгдсэн. Тэгвэл яагаад Д.Гэрэлийг халах болсон шалтгаанаа хуулийн дагуу гэдгийг нотлох хэрэгтэй болоод байна.

  Учир нь Тагнуулын байгууллагын тухай хуулиар газрын даргыг чөлөөлөхдөө өөрөө хүсэлт гаргасан, биеийн эрүүл мэндийн байдлаас шалтгаалж үүрэгт ажлаа гүйцэтгэх боломжгүй болсон, бүрэн эрхийн хугацаа нь дууссан, эсвэл гэмт хэрэг үйлдсэнийг шүүхээр нотолсон бол ажлаас нь чөлөөлдөг гэж заажээ. Харин бусад тохиолдолд чөлөөлөхийг энэ хуулийн 14.5 дахь заалтаар хоригложээ. Гэтэл зургаан жилийн хугацаагаар томилогдсон Д.Гэрэлийн бүрэн эрхийн хугацаа талдаа ч ороогүй байхад ажлаас нь чөлөөлсөн байна. Тэрбээр энэ шийдвэрийг эмнэлэгт байхдаа сонссон бөгөөд урьдчилан ямар нэгэн мэдэгдэл аваагүй аж.

 Энэ талаар Д.Гэрэл ярихдаа “Намайг ямар үндэслэлээр ажлаас халсаныг мэдэхгүй байна. Засгийн газар хуралдах үед би эмнэлэгт байсан. Одоо ч эмнэлэгт хэвтэж байна. Эмнэлэгээс гараад тушаалтай танилцана. Би ажлаа өгөх хүсэлт гаргаагүй” гэлээ.

 Ерөнхий сайд энэ талаар “ТЕГ-ын дарга бол Монгол улсын нүд чих болж зөв шийдвэр гаргахад мэдээллээр хангах байгууллага. Гэтэл үүргээ биелүүлж ажиллахгүй байсан. Тухайлбал, Якунины захидал надад ирэхээс өмнө сонин дээр гарсан. Яагаад тэгэв. Захидлыг задалсан хүнийг олоод ир гэхэд биелүүлээгүй. Солонгосоос шатахуун оруулж ирье гэхэд хэдэн авлигач нь нийлж байгаад Солонгосын компаниас 30 мянган ам.доллар идчихсэн байсан. Мөнгө хүлээж авсан хүнийх нь гарын үсэгтэй баримтыг олж өгөөд энэ хэргийг тодруул гэхэд тэгээгүй. “Роснефть” дээр очоод шатахууны үнээ битгийн буулга. Нэмээд бай гэж хэлсэн хүн бий. Тэр хүнийг мөн олоод ир гэсэн ирээгүй. Ийм байхад нь даргыг нь өөрчлөхгүй яах юм бэ” гэж хариулж байгаа. Гэсэн ч Тагнуулын байгууллагын тухай хуульд удирдлагыг нь ажлын хариуцлага алдсан  гэсэн үндэслэлээр чөлөөлөх заалт байдаггүй гэдгийг хуульчид хэлж байна. Тиймээс Ерөнхий сайд Д.Гэрэлийг ажлаас халсан тухайгаа өөр үндэслэл хэлэх хэрэгтэй болжээ.