Монгол улсын Ерөнхийлөгчид нэр дэвшигчид сурталчилгааны ажлаа эхлүүлж иргэд, олон нийт, бизнесийнхэнтэй уулзалт зохион байгуулж мөрийн хөтөлбөрөө сурталчлах ажлаа эхлүүлээд байна.

  Нэр дэвшигчдийн багийнхнаас тавьсан хүсэлтийн дагуу нэр дэвшигчдийн бизнес эрхлэгчид, үндэсний томоохон аж ахуйн нэгжүүдтэй хийх уулзалт, ярилцлагыг МҮХАҮТ, бусад мэргэжлийн холбоод хамтран ээлж дараалан зохион байгуулахаар боллоо.

  Эхний уулзалтыг  Монгол улсын Ерөнхийлөгчид нэр дэвшигч, одоогийн Ерөнхийлөгч Ц.Элбэгдоржтой 2013 оны 5 сарын 29, 30-ны өдрүүдэд МҮХАҮТ дээр зохион байгуулах гэж байна. Бусад нэр дэвшигчидтэй хийх уулзалтуудыг тохиролцсон хуваарийн дагуу хийнэ.

  2013 оны 5 сарын 29-нд Монгол улсын Ерөнхийлөгчид нэр дэвшигч Ц.Элбэгдорж уул уурхайн салбарын бизнесийнхэнтэй уулзалт зохион байгуулна. Уулзалтаар Ерөнхийлөгчид нэр дэвшигч Ц.Элбэгдорж уул уурхайн салбарын талаар баримтлах бодлого, авч хэрэгжүүлэх арга хэмжээ, хийж хэрэгжүүлэхээр төлөвлөж буй зүйлүүдээ бизнесийнхэнд танилцуулж тэдний санал бодлыг сонсож мөрийн хөтөлбөртөө тусгах, хэрэгжүүлэх, бодит ажил хэрэг болгох чиглэлд анхаарах талаар ярилцах болно.

Уулзалт: 2013-05-29-ны 15.00 цагт МҮХАҮТ-ын 507 тоотод болно

Мөн 2013 оны 5 сарын 30-нд Ерөнхийлөгчид нэр дэвшигч Ц.Элбэгдорж монголын ТОП-150 аж ахуйн нэгжийн захирлуудтай уулзалт зохион байгуулна. Уулзалтаар бизнесийн орчинг сайжруулах, хууль эрх зүйн таатай нөхцөл бүрдүүлэх, үндэснийц томоохон аж ахуйн нэгжүүдээ хэрхэн дэмжиж туслах, хамтран ажиллах чиглэлд мөрийн хөтөлбөртөө тусгасан үзэл баримтлал, үйл ажиллагааны талаар танилцуулж тэдний санал бодлыг сонсож харилцан ярилцах болно. Уулзалтын үеэр МҮХАҮТ-аас бизнесийнхний санал бодлыг аван боловсруулсан Үндэсний Манлай ААНэгжүүдийг дэмжих хөтөлбөрөө Ерөнхийлөгчид нэр дэвшигчид гардуулж түүнийг хэрэгжүүлэх талаар санал санаачлагатай ажиллах талаар захиа даалгавар өгөх болно.

Уулзалт: 2013-05-30-ны 10.00 цагт МҮХАҮТ-ын 507 тоотод болно