Өнгөрсөн УИХ-ын сонгуульд ялалт байгуулсан АН сүрийг үзүүлж байгаа. Тэд нийгмийн бүхий л салбарт өөрсдийн хүмүүсийг томилсон. Бас энэ хирээрээ нийгмийн салбар болгонд цэвэрлэгээ хийхийн зэрэгцээ өргөн хэмжээний шалгалт шүүлгийг өрнүүлж байгаа. Тэдний гол стратеги бол УИХ дахь цөөнхийн гишүүдийг нэг нэгээр нь эргүүлэн татахад чиглэгджээ. Өмнө нь сөрөг хүчин олонхийн Засгийн газрын гишүүдээс “шүд сугалах” хэмээх аргыг хэрэглэн нэг нэгээр нь огцоруулдаг байсан. Тэгвэл одоо эрх баригчид сөрөг хүчнийхээ гишүүдийн тоог улам цөөрүүлэх стратегийг хэрэгжүүлж эхэлсэн. Энэ стратеги ч амжилттай хэрэгжиж байгаа.

Ийм зорилгоор МАН-аас сонгогдсон Д.Арвинг намдаа элсүүлж авсан. Өвөрхангайн хоёр тойрогт ялалт байгуулсан МАН-ын нэр дэвшигчийг хууль зөрчсөн гэдэг үндэслэлээр эргүүлэн татаж өөрсдийнхөө хүмүүсийг тангараг өргүүлсэн. Увсын Ч.Хүрэлбаатар, Ч.Чойжилсүрэн хоёрыг эргүүлэн татах асуудлыг өрнүүлээд өнөө хүртэл шийдэгдээгүй байна. Дээр нь нэмэгдээд Завхан аймгаас сонгогдсон Д.Оюунхоролыг төсвийн мөнгийг буруу зарцуулсан, Дорнод аймгаас сонгогдсон Н.Номтойбаяр, Дархан-Уул аймгаас сонгогдсон Д.Хаянхирваа нарыг эрх мэдлээ урвуулан ашиглаж ялалт байгуулсан гэдэг үндэслэлээр шалгуулахаар болсон. Эдгээр эрхэмүүд дээр нэмэгдэн Говь-Алтай аймгаас сонгогдсон Ц.Дашдорж, жагсаалтаар орж ирсэн Ж.Энхбаяр нарыг ч гэсэн төсвийн мөнгийг буруу зарцуулсан гэсэн аудитын дүгнэлтийг гаргуулаад АТГ-т өгсөнийг олон нийт мэднэ. Ийнхүү АН-ынхан МАН-ынхны авсан гурван суудлын нэгийг урвуулж, нөгөө хоёрт нь өөрийн намын гишүүдийн тангарагийг өргүүлсэн. Одоо МАН-аас сонгогдсон дээрх 7 гишүүний асуудлыг хөндөж тавиад байна. Эдгээрээс эхний ээлжинд Увсын хоёрын асуудлыг шуурхайлахаас гадна Говь-Алтайн хоёрыг эргүүлэн татах арга замыг хайж байгаа аж. Өөрөөр хэлбэл АН-ын дараагийн стратеги нь Ц.Дашдорж, Ж.Энхбаярыг эргүүлэн татахад чиглэгджээ. Энэ чиглэлээр хуулийн гарц ч хайж байгаа бололтой. Гэхдээ Ц.Дашдоржийг эргүүлэн татах магадлал өндөр аж. Харин намын жагсаалтаар орж ирсэн Ж.Энхбаярыг эргүүлэн татах эрх зүйн орчин хомс байгаа гэж эх сурвалж мэдээллээ.

Хамгийн сонирхолтой нь Увсын хоёрт ялагдсан эрхэмүүд гомдол мэдүүлэн түүнээсээ буцахгүй байгаа аж. Тэд өрсөлдөгчидөө хууль зөрчсөн гэж Өвөрхангайхантай адилхан тангараг өргөх ёстой гэж үзсэн хэвээр байгаа гэнэ.

АН-ын энэхүү стратегиуд хэрэгжвэл Говь-Алтайн нэг суудал, Увсын хоёр суудлын өөрийн болгох гарц харагдаж байна. Ингэж зүтгэхийн цаана өөр нэг зорилго бий. Хэрэв МАН-ын гишүүдийн тоог цөөрүүлбэл Засгийн газрыг огцруулах гишүүдийн kноп цөөрч бараг боломжгүй болох юм.

Ийнхүү Монголын парламентын түүхэнд эрх баригч нь цөөнхийнхөө эсрэг гомдол гарган шалгуулж нэг нэгээр нь эргүүлэн татдаг шинэ жишиг бий болж байна.