УИХ дахь МАН-ын бүлгээс Ерөнхий сайдыг огцруулах эсэх асуудлыг хэлэлцэх явцад гарсан зарим мэдээллийг шалгуулахаар өнгөрсөн сард АТГ болон Хууль зүйн сайдад хандсан билээ. Тодруулбал, “Эрдэнэс Тавантолгой” ТӨХК-ийн ачиж зөөвөрлөх хяналтын бүсийн 17 тэрбум төгрөгийн тендерт Ерөнхий сайд Н.Алтанхуягийн төрсөн дүүгийн охин Г.Уянгын компани шалгарсан нь хууль зөрчсөн эсэх, үүнд ямар албан тушаалтнууд холбогдсон болохыг шалгуулахаар АТГ-т хандсан. АТГ “Эрдэнэс Тавантолгой“ ТӨХК-ийн тендерийн үнэлгээний хорооны дарга, гишүүдэд холбогдуулан эрүүгийн хэрэг үүсгэхээр материалыг Нийслэлийн прокурорын газарт хүргүүлсэн байна. Өөрөөр хэлбэл АТГ-ынхан Ерөнхий сайд Н.Алтанхуягийг эрх мэдлээ хэтрүүлэн эрүүгийн шинжтэй хэрэг үйлдсэн гэж үзжээ.


Дээрх албан бичиг дээр эрүү үүсгэхээр прокурорт хүргүүллээ гэдгийг тусгаж өгсөн байгаа. Тэгвэл АТГ-аас Ерөнхий сайдыг шалгах эсэхийг шийдвэрлэж өгөхийг Прокурорт өгсөн ч прокурор шалгахаас татгалзлаа. Адилхан хуулийн байгууллагууд байж өөр, өөр зөрчил гаргасныг хүмүүс янз бүрээр л ойлгож байна. Н.Алтанхуягийг хуулийн байгууллагуудыг ийн зөрчилдөхөд хүргэж байна гэдгийн нэн түрүүнд хэлж байгаа ч  УЕП Д.Дорлигжав Ерөнхий сайд хоёр нэг нутгийн хүмүүс төдийгүй нэлээн дотно найзууд. Тиймээс прокурор шалгахаас татгалзсан гэж үзэх хүмүүс ч цөөнгүй байгаа юм.



1. 17 тэрбумын тендерт сайдын дүүгийн компани шалгарсан нь хууль зөрчсөн

Эрдэнэс Тавантолгой” компанийн 17 тэрбумын тендерт Ерөнхий сайд Н.Алтанхуягийн төрсөн дүүгийн охин Г.Уянгын “Gobi power” компани ялсан юм. Дөнгөж ганц сая төгрөгийн дүрмийн санатай байсан энэ компани нь нэг л өдөр тэрбум төгрөгийн дүрмийн сантай болж долоо хоногийн дараа 17 тэрбумын ялагчаар тодорсон. “Эрдэнэс-Тавантолгойн” тендерт ялагч Г.Уянга нь ЗГХЭГ-ын дэд дарга Г.Дэнзэнгийн эхнэр. Г.Дэнзэн нь “Эрдэнэс-Тавантолгойн” ТУЗ-ийн дарга гээд ойлгоход бэрх холбоо сүлбээтэй юм.

2.Г.Дэнзэнгийн ЗГХЭГ-ын дэд даргаар томилсон нь хууль бус гэж үзсэн

Тэрбээр Засгийн тэргүүн болохдоо УИХ-ын танхимаас төрийн албыг төрлийн алба болгохгүй хэмээн мэдэгдэж байсан.  Гэвч ЗГХЭГ-ын дэд даргаар эгчийнхээ охины нөхөр болох Г.Дэнзэнг томилж, төрийн албыг төрлийн болгох ажлыг өөрөөсөө эхлүүлсэн байдаг. Түүнчлэн Г.Дэнзэн хүчтэй ахын нөмөр нөөлгийн хүчээр “Эрдэнэс Тавантолгой” компани, Төрийн банкны ТУЗ-ийн гишүүн болсон төдийгүй албан тушаалаа ашиглан эхнэрийнхээ компанийг Хятад руу нүүрс экспортлох тендерт ялуулсан асуудалд нэр холбогдоод байгаа.

3. УБЕГ-ынхан хуурамч бичиг баримт үйлдэн Г.Уянгыг, Ч.Уянга болгож өөрчилсөн явдал

Г.Уянгын бичиг баримтыг хуурамчаар үйлдсэн гэж УБЕГ-ынханыг давхар шалгуулахаар хандсан асуудал. Тодруубал, Н.Алтанхуягийн холбоотой гэх тендерийн ШУМ дэгдэнгүүт УБЕГ-ынхан нэг өдрийн дотор Г.Уянгыг Ч.Уянга болгон сольсон мэдээллийг МАН-ынханд өгсөн юм. Үүнийг нь МАН-ынхан илрүүлж бас л асуудал болгосон.

4. УИХ-ын гишүүн Н.Номтойбаяр энэ хэргийг дуустал нь явна гэдгээ мэдэгдэж хэд хэдэн баримт сөхсөн.  Эл баримтад нь АТГ-аас прокурорт хүргүүлсэн албан тоот, Хууль зүйн сайд Х.Тэмүүжингийн тухайн асуудлыг Мөрдөн байцаах газар шалгаж байгаа гэсэн баримт ч орох юм.

5. Н.Энхболд: МАН-ын бүлэг үндэслэлтэй асуудал тавьж байсан

Н.Энхболд хэлэхдээ "АТГ “Эрдэнэс Тавантолгой“ ТӨХК-ийн тендерийн үнэлгээний хорооны дарга, гишүүдэд холбогдуулан эрүүгийн хэрэг үүсгэхээр материалыг Нийслэлийн прокурорын газарт хүргүүлсэн байна. Харин Хууль зүйн сайд Х.Тэмүүжин бүртгэлийн бичиг баримттай холбоотой асуудлыг Улсын мөрдөн байцаах газар шалгаж байгаа бөгөөд хууль тогтоомжийн хүрээнд шийдвэрлэх болно гэсэн хариу өгчээ. Дээрх хоёр албан бичгээс үзэхэд МАН-ын бүлэг үндэслэлтэй асуудал тавьж байсан нь харагдаж байна" гэв.

 Прокурорын шалгахаас татгалзсан хариуд олон түмэн хийгээд сөрөг хүчнийхэн ихэд шүүмжлэлтэй хандаж байгаа юм.  Ямартаа ч Хууль зүйн сайд Х.Тэмүүжин бүртгэлийн бичиг баримттай холбоотой асуудлыг Улсын мөрдөн байцаах газар шалгаж байгаа бөгөөд хууль тогтоомжийн хүрээнд тун удахгүй шийдвэрлэж өгөх биз ээ.