Ерөнхий сайд Н.Алтанхуягийн оролцоотойгоор "Эрдэнэс Тавантолгой"-н 17 тэрбум төгрөгийн тендерийг авсан гэж яригдаад байгаа ЗГХЭГ-ын дэд дарга Г.Дэнзэн өнөөдөр хэвлэлийн хурал зарлалаа. Тэрбээр хэвлэл, мэдээллийн хэрэгслээр гараад байгаа түүний талаарх мэдээлэл нь худал бөгөөд гүтгэлэг гэж үзсэн байна. Ялангуяа Тавантолгойн тендерийн асуудалтай ямар ч холбоогүй гэдгээ мэдэгдлээ. Тиймээс хуулийн байгууллагуудад хандаж, нэр төрөө сэргээлгэхээр болжээ.

   Г.Дэнзэн "Би ямар ч хуулийн байгууллагад шалгуулахад бэлэн. Би ажил үүргийнхээ хуваарийн дагуу “Эрдэнэс Тавантолгой” компанийн дотоод үйл ажиллагаанд оролцох ямар ч эрх байхгүй. Гэтэл сүүлийн үед намайг Тавантолгойн тендертэй холбоотой мэтээр гүтгэх боллоо. Үүнийг би ор үндэсгүй гүтгэлэг гэдгийг хариуцлагатайгаар мэдэгдэж байна" гэсэн юм.