Энэ Засгийн газрын буруутай бүхний эхлэл болсон нэг зүйл бий. Тэр нь Сү.Батболдын тэргүүлсэн Засгийн газар. Н.Алтанхуяг муу муухай бүхнээ өмнөх рүүгээ чихдэг болсныг бүгд мэднэ. Өнөөгийн эдийн засгийн уналтын ч, ажилгүйдлийн ч, гадаад худалдааны уналтын ч, хөрөнгө оруулалт бууралтын ч гээд бүх л бурууг өмнөхөөс улбаатай гэдэг. Үүнд нь МАН-ынхан ч их эгдүүцэж байгаа. Тэд эгдүүцэхээс гадна Засгийн тэргүүн асан Сү.Батболдыгоо ч бас багагүй хардаж байгаад ойрноос тайвширч эхэлжээ. Учир нь Н.Алтанхуяг өмнөх Засгийн газрын тэргүүн "Эрдэнэт" үйлдвэрээс 150 гаруй сая ам.долларын зээл авахуулсан тухай мэдээлэлийг гаргасан. Үүнийх нь дараа АН-ын бүлэг хуралдаж Сү.Батболдын хүчээр авахуулсан зээлийн учрыг олох ажлын хэсэг байгуулах болсноо бас зарлав. Харин МАН-ынхан экс даргаа хардаж үзжээ. Ингээд "Эрдэнэт" үйлдвэрийг АН-ынхан албан бусаар шалгаж эхэлсэн байна. Албан ёсны шалгалтын ажлын хэсэг байгуулсан эсэх, тэр нь шалгалтаа хийсэн эсэх, дүгнэлт нь хаа байгаа эсэх нь тодорхойгүй учир албан гэж хэлэх үндэслэлгүй юм. АН-ын ажлын хэсэгийн зэрэгцээ МАН-ынхан ч бас албан бусаар лавлаж үзжээ. Юун мөнгө "Эрдэнэт"-ээр зээлүүлсэн болоод явчихав аа? Тэр мөнгө хаана байна? Юунд зарцуулав гээд ил далд сонирхох нь зөв л дөө. Гэтэл шалгалтын үр дүн өөрөөр гарчээ.

  "Эрдэнэт" үйлдвэрээр шахуулж байгаад зээл авахуулсан нь үнэн аж. Гэхдээ Сү.Батболдын Засгийн газрын үед энэ зээлийг авахуулаагүй байна. Харин өнгөрсөн оны 12 дугаар сард 155 сая ам.долларын зээлийг "Эрдэнэт"-ээр дамжуулан авчихсан нь илэрчээ. Мэдээж зээлийг авахуулсан хүн нь Н.Алтанхуяг болж таарсан учир АН-ын шалгалт утгагүй болчихжээ. АН-ынхан уг нь ийм их хэмжээний зээл авахуулсныг мэдмээр л юм. Гэтэл цөөхөн хүн мэдээд чимээгүй өнгөрч. Харин зээлийг юунд зарцуулсан бэ? Бондын мөнгө байсаар байтал ингэж зэрэг зээл авахуулах хэрэг байсан уу? Зээлийг хаанаас авсан? "Эрдэнэт" үйлдвэр хэзээ төлөх гэрээтэй вэ? Зээлийг авахдаа оросуудад мэдэгдсэн үү? Тэд юу гэсэн бэ? гээд мэдэх ёстой олон асуулт хариугаа хүлээж байна. Нэгэнт дарга нь шахаж байгаад зээл авахуулсан учир АН-ынхан чимээгүй болж. Өөрөө шахаж байгаад зээл авахуулчихаад ам нь халаад ирэхээрээ Сү.Батболдыг буруутгасан удирдлагаа муулаад өнгөрч.

   Харин МАН-ынхан экс дарга нь зээл авахуулаагүй байхад бусдын үгэнд итгэж нууц шалгалт явуулсандаа бантаад бас чимээгүй болсон бололтой. Гэхдээ энэ мөнгөний зарцуулалтын талаар МАН яагаад дуугарахгүй байна вэ гэдэг анхаарал татна. Эх сурвалжийн мэдээлж байгаагаар бол МАН нилээд халуухан юм руу яваад орсон бололтой. Уг мөнгөний зарцуулалтыг нарийвчлан судалж тодорхой болгосныхоо дараа нэг мөсөн том дуугарах гэж бэлтгэж байгаа аж. Н.Алтанхуягийг дэнжигнүүлэх хэмжээний ээлжит барьцаа тэд бараг л атгаад авсан гэж эх сурвалж тайлбарлав.

    МАН-ынхан "Эрдэнэт" үйлдвэрээс Н.Алтанхуяг яах гэж 155 сая ам.долларын зээлийг авахуулчихаад өмнөх хүн авсан гэж зарласны учгийг хайж хужирыг тунгаах шинэ ажлыг эрхэлж байна. Энэхүү ажлын хэсэгийг ерөнхий сайд асан Сү.Батболд ахалж буй сураг гарлаа. Бас УИХ-ын гишүүн Ц.Нямдорж ч голлох үүрэгтэй оролцож байгаа гэнэ. Тиймээс тун удахгүй Засгийн тэргүүний шинэ дуулиан дэгдэж, ээлжит ярианы сэдэв дэлгэгдэх нь тодорхой болов.