Ерөнхий сайд Н.Алтанхуягийг хууль зөрчсөн гэдэг үндэслэлээр огцруулах саналыг УИХ дахь МАН-ын бүлэг гаргаж байсан. Ингэхдээ түүний хууль зөрчсөн гэх үйлдлүүдэд зарим аймгийн Засаг даргыг томилохоос татгалзсан тохиолдлыг нэрлэж байлаа. Нээрээ Н.Алтанхуяг улс төр хийж, МАН-аас сонгогдсон Засаг дарга нарыг ажиллуулахгүй гэхдээ хууль зөрчсөн  үү гэх асуулт эндээс үүдсэн юм.

Өнгөрсөн хугацаанд Дорнод аймгийн Засаг даргын томилгоотой холбоотой Ерөнхий сайдын шийдвэр хууль зөрчсэн эсэхийг шүүхээр нэг бус удаа хэлэлцсэн ч энэ талаарх мэдээлэл нэг их өндөр авалгүй чимээгүйхэн өнгөрсөн. Шүүхийн шийдвэр эхлээд “Ерөнхий сайдыг хууль зөрчсөн” гэж гарсан бол дараа нь давж заалдах шатны шүүх хурлаас “хууль зөрчөөгүй” болохыг тогтоожээ. Энэхүү сүүлчийн шийдвэр нь түрүү долоо хоногийн пүрэв гаригт гарсан байна.

Дорнод аймгийн Засаг даргаар иргэн М.Бадамсүрэнг томилох тухай аймгийн ИТХ-ын шийдвэрийг хууль зөрчсөн гэж Ерөнхий сайд үзэж, дээрх томилгоог батламжлаагүй аж. Давж заалдах шатны шүүх хурлаас М.Бадамсүрэнг Засаг даргаар томилоогүй нь хуульд нийцсэн бөгөөд хууль зөрчөөгүй гэж үзжээ. Түүнчлэн, иргэн М.Бадамсүрэнг Монгол Улсын засаг захиргаа, нутаг дэвсгэрийн нэгж, түүний удирдлагын тухай хуульд заасан шаардлагыг хангаагүй гэж шүүх бүрэлдэхүүн дүгнэсэн байна.

Харин чухам ямар учраас М.Бадамсүрэн Засаг дарга болох хуулийн шаардлага хангаагүй вэ гэдэг сонирхолтой. Эх сурвалжийн хэлж байгаагаар М.Бадамсүрэн нь “МАК” буюу “Монгол алт” компанид ажиллаж байсан бөгөөд энэ утгаараа Дорнод аймгаас УИХ-д сонгогдсон гишүүн Н.Номтойбаярын гарын хүн гэгддэг аж. Харин “МАК” компани нь Дорнодод алтны хайгуул, ашиглалтын чамгүй олон лицензтэй юм байна. Тэгэхээр тус компани өөрийнхөө нэг ажилтныг Дорнод аймгийн Засаг даргаар томилуулахаар ИТХ-ыг шахсан нь ашиг сонирхлын зөрчилтэй алхам гэж үзэж болох юм. Бизнесийн салбараас улс төрд орж ирсэн хөрөнгөтнүүд эрх мэдлээ ашиглан баялгийн хуваарилалтад ойртох, давуу байдалд хүрэхийг илт улайрч байгааг анзаарсан Ерөнхий сайдын хувьд МАК компанийн ажилтан М.Бадамсүрэнг Засаг даргаар батламжлахаас татгалзах шалтгаан бас байсан бололтой.

Харин давж заалдах шатны шүүх хурал өмнөх шатныхаас зөрүүтэй гарахад нөлөөлсөн бас нэг хүчин зүйл нь Засгийн газрын Хэрэг эрхлэх газарт өрнөсөн сүүлийн үеийн халаа, сэлгээ гэх. Шүүх хуралд Ерөнхий сайдыг төлөөлөн оролцож, түүний шийдвэрийн хууль зүйн үндэслэлийг тайлбарлах, хамгаалах үүргийг гүйцэтгэдэг Хууль, эрхзүйн хэлтсийн дарга нь хоёр шүүх хурлын хооронд өөрчлөгджээ. Өөрөөр хэлбэл, шинэ дарга болох Энхтуяа давж заалдах шатны шүүх хуралд амжилттай оролцсон байна. Өмнөх дарга нь тайлбар, үндэслэлээ хангалттай мэдүүлж чаддаггүй байсан бололтой.

Гэхдээ энд нэг зүйлийг онцлоход уг халаа, сэлгээг Ерөнхий сайд санаачилга гарган шүүх хуралдаа зориулж хийгээгүй аж. Засгийн газрын Хэрэг эрхлэх газрын дэд даргаар ажиллаж байсан Ш.Солонго ажлаас халагдахдаа өөрийн хамтран ажиллагсадаа ажлаас нь давхар чөлөөлчихсөн аж. Өөрөөр хэлбэл, ЗГХЭГ-ын Хууль, эрхзүйн хэлтсийн дарга Д.Мөнх-Эрдэнэ нарын долоон хүнийг Ш.Солонго өөрөө тушаал гарган халсан юм байна. Тэдний дунд тэтгэврийн насны хоёр ч хүн багтаж байгаа бөгөөд тэдэнд нөхөн олговор болгож, нийтдээ 30 гаруй сая төгрөгийг төсвөөс өгөх болчихоод байгаа гэх мэдээлэл байна.