Өмнөх Засгийн газрын үед ажиллаж байсан сайд, дарга нартай холбоотой их хэмжээний мөнгө идэж, уусан гэх хэргүүд ар, араасаа ил болсоор байна. Эрүүл мэндийн сайдын суудалд сар гаруй суусан Н.Хүрэлбаатар нууц хүүдээ тухайн үеийн ханшаар 419 сая төгрөгтэй тэнцэх юань болон 6000 ам.доллар хадгалуулж байсан гэх. Мөнгөтэй сэйф нь илэрмэгц тэрбээр хил даван одсон нь бүр илүү ноцтой болж ирлээ.

    Харин өчигдөр УИХ-ын гишүүн, БСШУ-ны сайд асан Ё.Отгонбаярын эхнэрийн дансанд 2009- 2013 оны хооронд их хэмжээний мөнгө байршсан байсныг цагдаагийнхан илрүүлж шуугиан тарилаа. Эхнэр О.Эрдэнэсолонгынх нь “Зоос”, “Голомт”, “Худалдаа хөгжлийн банк” дахь дансаар 2009-2013 оны хооронд нийтдээ 452 тэрбум гаруй төгрөгтэй тэнцэх хэмжээний ам.доллар , 13.9 тэрбум төгрөг байршсан болохыг ЦЕГ-аас мэдээлэв.

   Харин Ё.Отгонбаяр гишүүн энэ мөнгөний тухай огт мэдэхгүй гэдгээ яаран мэдэгдсэн юм. МАН-ын томчуудын нэг, улс төрд бас ч гэж өөрийн гэсэн орон зайтай болсон энэ хүнийг мөнгө угаасан уу, ийм хэмжээний мөнгийг идэж, уусан уу гэх асуулт эргэлдэж эхэллээ. Иргэд энэ мэдээлэлд шууд итгэхгүй байгаа нь мөнгөний тоотой холбоотой юм. Учир нь “Форбес” сэтгүүлийн тооцоолсноор ийм хагас тэрбум долларын хөрөнгөтэй хүн дэлхийд 750 байдаг гэх мэдээлэл бий. Мөн Монголд тэр бум долларын эргэлттэй гуравхан банк байдаг гэх бөгөөд ийм их хэмжээний мөнгийг шалгаагүй хадгалсаар байсан гэдэг нь эргэлзэхэд хүргэж  байгаа аж. Сонирхуулахад Монгол улсын нийт төсөв 1999 онд 280 сая доллар байсан бөгөөд Ё.Отгонбаяр гишүүний эхнэрийн дансан дахь мөнгө үүнээс хоёр дахин их гэж байгаа. Тиймээс иргэд Ё.Отгонбаяр их хэмжээний мөнгө угаасан хэрэгт холбогдсон байлаа ч мөнгөний тоо нь зөрүүтэй гэж эргэлзэж байна.

   Энэ жилийн хөрөнгө орлогын мэдүүлэгтээ Ё.Отгонбаяр гишүүн жилийн нийт орлогоо 10978.26 мянган төгрөг бол гэр бүлийн нийт орлого нь  561721.93 мянган гэж мэдүүлсэн байдаг. “Скай” их дэлгүүрийн дөрвөн хувийг эзэмшдэг гэжээ. Гэсэн ч ЦЕГ-аас О.Эрдэнэсолонгыг зүгээр байхад нь цагдан хориогүй гэдэг нь тодорхой.

   Ийнхүү МАН-ын төрийн эрхэнд байхад дарга, сайд нарын идэж, уусан, авлига авсан хэргүүд нэг нэгээрээ илэрч байна. МИАТ, АМГ-ын дарга асан Ц.Батхуяг, Эрүүл мэндийн сайд асан Н.Хүрэлбаатар, одоо УИХ-д олон жил суусан Ё.Отгонбаяр. МАХН-ын гишүүд дээрх хэргүүд гарч байх үед Хууль зүйн сайдаар ажиллаж байсан Ц.Нямдоржийг мэдээгүй байна гэж байхгүй хэмээн АТГ-т шалгуулахаар болсон. Монгол банк хэдэн жилийн өмнөөс л 20 саяаас дээш төгрөгийн гүйлгээг сэжигтэйд тооцон шалгадаг байсан. Гэтэл 20 байтугай сая, тэрбумыг шалгаагүй байна гэж үү? гэсэн асуулт эргээд Ц.Нямдорж дээр бууж байна. Тэрбээр Н.Энхбаярыг АТГ-аас баривчлах үед “унтаж байсан” гэж хэлээд онигоонд орж байсан удаатай. Энэ удаа ямар хариу хэлэх бол?