Нэмэгдсэн өртгийн албан татвараас чөлөөлөх тухай, Гаалийн албан татвараас чөлөөлөх тухай хуулийн төслүүдийг хэлэлцлээ. Импортоор оруулж байгаа бүрэн ба хагас боловсруулалт хийсэн модон эд анги, бэлдэц, төрөл бүрийн модлог хавтан, модон хуулга, хуудсан материалыг гаалийн болон нэмэгдсэн өртгийн албан татвараас чөлөөлөх тухай эл хуулийг 38 гишүүн хэлэлцэх нь зүйтэй гэж үзэж Төсвийн байнгын хорооруу шилжүүлсэн юм. Энэ үеэр Ц.Оюунбаатар гишүүн "Монголд модон материал, ой модны хомсдол их байгаа. Тиймээс мод модон материал монголд хямдрах, зах зээлийг хангана гэсэн ойлголтгүй болж байна. ОХУ-иар явж байхад модон материалууд нь манайхаас 50-100 долларын өндөр үнэтэй байдаг. Дээр нь тээврийн зардал, бусад зардлууд орж ирэхээр манай зах зээл дээр борлогдох боломж бараг байхгүй. Тиймээс ой мод, модон материалын чиглэлд татварын хөнгөлөлт үзүүлэх нь маш зөв. Энэ бол татварыг хавтгайруулж аль нэг бизнесийн үйл ажиллагаанд тавьж байгаа асуудал биш гэж би ойлгож байна. Мөн манай Байгаль орчны яамны С.Оюун сайд бодлогоо өөрчлөх хэрэгтэй байна. Төрөөс очоод ой мод, байгаль, усыг хамгаална гэж байхгүй. Нутгийн ард түмэн, иргэд нь хамгаалдаг. Түүнчлэн төрийн бус байгууллагууд, иргэний нийгмүүд хамгаалдаг. Тэгэхээр иргэний нийгэмд нь буюу сэтгэл зүрхээрээ байгалиа хамгаалж байгаа иргэдэд хөрөнгө мөнгө гаргаж өгч, дэмжих хэрэгтэй шүү дээ. Энэ бол үнэхээр шинэчилэл болно" гэв.