МИАТ-ын Ч.Хоролсүрэн нарын олон сая доллар угаасан, Татварын албаны Ч.Гансүх нарын олон тэрбум татварын мөнгө зувчуулсан, Эрүүл мэндийн яамны төрийн нарийн бичгийн дарга Н.Түмэндэмбэрэлийн тендерийн будлиан гээд авилгалын олон хэргийн дуулиан намжаагүй байхад л өнгөрсөн Засгийн газарт байсан МАН-ын сайд нарын мөнгө идсэн уусан, угаасан талаар ноцтой мэдээлэлүүд чих халууцуулж байна. Сү.Батболдын Засгийн газрын Эрүүл мэндийн сайд Н.Хүрэлбаатарын хүү Х.Энхбатыг шалгах явцад 500 сая төгрөгтэй тэнцэх юань бүхий сейфээ орцныхоо хогийн бункерт хаячихсан байсан, гэтэл одоо Сү.Батболдын Засгийн газрын Боловсролын сайд байсан МАН-аас 2012 онд сонгогдсон УИХ-бн гишүүн Ё.Отгонбаярын эхнэр О.Эрдэнэсолонгын дансаар 500 тэрбум төгрөгтэй тэнцэх 323 сая ам.доллар орж гарсан мэдээлэл ядарсан Монголчуудын өлөн ходоодыг цатгаж байна. “Айлын эхнэр олон зуун сая доллар угааж байхад, авааль эхнэр минь хувцасаа л угаасаар байна” гэж нэг эр жиргэсэн байна лээ. Эхнэр нь ч тэр, Ё.Отгонбаяр ч тэр энэ их мөнгийг “мэдэхгүй, санахгүй” гэж гүрийхээр шийдсэн мэдээлэл байгаа. Тэгээд ч Ё.Отгонбаярын хувьд Б.Бат-Эрдэнийн сонгуулийн сурталчилгаанд мэнчийтлээ гүйгээд байсны учир тодорхой болж байх шиг. МАН-ын том дарга нарыг авилгын том хэргүүдээс Б.Бат-Эрдэнэ гарч ирж байж аварна гэсэн хүлээлт байгаа нь нууц биш болжээ. Б.Бат-Эрдэнийн ар талд ямар хүмүүс нуугдана вэ?!

    Ерөнхийлөгч Ц.Элбэгдорж, Шинэчлэлийн Засгийн газар, хууль хяналтын байгууллагын зүгээс авилгалтай урд өмнөх удирдлагуудаас илүү эрчтэй зоригтой тэмцэж байгааг талархан сайшааж байна. Монголын нийгмийг аалзны тор мэт бүрхсэн авилгалтай хийх тэмцэл сулрах ёсгүй, улам эрчимжих ёстой. Ерөнхийлөгч Ц.Элбэгдорж хоёр дахь удаагаа Ерөнхий сайд болохдоо авилгалтай дайн зарласан, Ерөнхийлөгч болоод энэ талаар маш их ахиц гаргалаа. Тэрбээр өөрийн нэр дэвшсэн намын С.Баярцогтыг ч гэсэн УИХ-ын гишүүнээсээ чөлөөлөгдөж, асуудлаа шалгуулахыг шаарджээ. Түүний өрсөлдөгч төрийн тэргүүн боллоо гэхэд МАН-ын том дарга нарын оролцоотой авилгалын хэргүүд захаасаа, замаасаа замхарч эхлэх вий гэж санаа зовж байгаагаа “Шударга ёс” бүлгэм ний нуугүй илэрхийлж байна.
    Ерөнхийлөгчийн сонгуулийн ид өрсөлдөөн өрнөж буй энэ цаг үед УИХ дахь МАН-ын бүлгээс дээд сургуулийн сургалтыг үнэ төлбөргүй болгох тухай санал оруулж ирж шоудаж байгаа нь сонгуулийн хуулинд шинээр оруулж ирсэн “Төсөвийн бололцооноос хэтэрсэн зүйлийг амлахыг хориглоно” гэсэн заалтыг бүдүүлгээр зөрчсөн хэрэг боллоо. Өнгөрсөн 23 жилийн 18 жилд нь эрх баригч байхдаа МАН ийм юм санаачилсан бол үнэмшиж болохсон, сөрөг хүчин болчихоод ядарсан ард түмнээрээ ийнхүү даажигнаж байгаа нь МАН-ын улс төрийн тоглоом утга начираа алдсаныг харуулж байна. Дээд сургуулийн сургалтыг төлбөргүй болговол манай төсөв, гадаадын зээл тусламж, Чингис боондын мөнгө нэмэгдээд ч зөвхөн энэ зардалыг санхүүжүүлж байгаа юм. МАН дэвшүүлсэн хүнээ Ерөнхийлөгч болгохын тулд хууль зөрчсөн, улс орныхоо эдийн засгийг нураахад чиглэсэн бүтэхгүй зүйл амлаж байгаа явдалд харамсаж байна.

    Ерөнхийлөгчийн сонгуульд нэр дэвшигч Б.Бат-Эрдэнэ, МАН-ын сонгуулийн штабын зүгээс иргэдээ гарал үүсэл, яс үндэсээр ялгаварлан гадуурхсан өнгө аястай сурталчилгаа хийж эхэлсэн. Энэ удаад төсөвийн бололцооноос хэтэрсэн зүйл амлаж сонгуулийн хуулийг ноцтой зөрчлөө. Учир иймд, СЕХ-ны зүгээс МАН-ын сонгуулийн штабт анхааруулга санамж өгөхийг “Шударга ёс” бүлгэм хэвлэл, мэдээллийн хэрэгсэлээр дамжуулан шаардаж байна.